کوہلو نا علاقہ ہوسڑی نا ہندی جمعہ خان مری نا مار کاکا خود کشی کرے۔
ہندی حوال تا رد ئٹ جمعہ نا مار کاکا نا تعلقداری تیوہ قبیلہ نا شیفکو ٹک ڈرانی آن اس، پاننگک کہ کاکا نا سن پانزدہ سال نا خڑک اس، خودکشی نا سوب داسکان سما تمتنے۔
یاتی مرے کہ برجاء تُو کوہلو ٹی خودکشی نا دا ارٹمیکو تدینی ءِ، داکان مست کوہلو نا علاقہ تحصیل تمبو ٹی سلام شیرانی نا زائیفہ تینے پھاؤ ترسا خودکشی کریسس۔
تیبہ بلوچستان ئٹ خودکشی نا تدینیک ہڑدیئی بنداو آ رپورٹ مننگ ءُ۔
بلوچستان ئٹ تیوئی وڑ ئٹ خودکشی تا کچ، علاقہ غا تا مُر مننگ و حولکاری بست و بند نا نیستی نا سوب آن رپورٹ مفسہ، واہم بلوچستان ئٹ کاریم کروکا چاگڑدی گل آتا رد ئٹ دا کچ بھاز زیات ءِ۔
بلوچستان ئٹ خودکشی تا تدینیک جتا علاقہ غا تیان رپورٹ مرسا کرینو۔
دا تنظیم آتا پاننگ ءَ کہ بلوچستان ئٹ نیزگار سوشل سروس آتا مننگ اسہ بھلو سوب اسے، اندنو تدینی ہم رپورٹ مسنے ہراڑے ریاستی ادارہ آتا دو آن زوراکی نا بیگواہی تیٹ بیم تننگ نا سوب آن خودکشی تا تدنیک مونا بریرہ۔