بلوچستان نا علاقہ کوہلو آن پاکستانی لشکر نا دو آن اِرا بندغ زوراکی ئٹ بیگواہ اندن مستونگ و تربت آن اِرا بندغ یلہ مریسہ اُرا ءِ سر مسنو۔
حوال آتا ردئٹ بلوچستان نا علاقہ کوہلو و کاہان آن اِرا بندغ ءِ پاکستانی لشکر دزگیر کریسہ بیگواہ کرے۔
حوال آتا ردئٹ درو پاکستانی لشکر طارق ولد میر حسین لانگھائی و فضل چیل چیک پوسٹ کاہان آن عبداللہ شاہ ولد میراب مری ءِ دزگیر کریسہ بیگواہ کرے۔
ہندی حوالی تا رد ئٹ طارق درزی ئسے، ہرادے پاکستانی لشکر درو دزگیر کرے ہراڑان گڈ او بیگواہ ءِ۔
خیال مرے کہ داکان مالو طارق نا ایلم دلوش ءِ پاکستانی لشکر ہفت سال مالو سبی آ ہننگ نا وخت آ دزگیر کریسس ہراڑان گڈ او بیگواہ ءِ داسا لشکر اسہ پین ایلم ئسے دزگیر کرینے۔
ایلو پارہ غان بلوچستان نا علاقہ مستونگ و تربت آن پاکستانی لشکر نا دو آن بیگواہ اِرا بندغ یلہ مریسہ تینا اُرا تے سر مسنو۔
حوال آتا رد ئٹ 2 فروری 2024 آ بلوچستان نا ضلع مستونگ آن پاکستانی لشکر نا پارہ غان دزگیری آن گڈ زوراکی ئٹ بیگواہ مروکا ورنا عامر عالیزئی یلہ مریسہ درے ننکان اُرا ءِ سر مسنے۔
عامر عالیزئی ءِ مستونگ آن پاکستانی لشکر زوراکی ئٹ بیگواہ کریسس ہرانا یلہ مننگ ءِ خاہوت پک کرے۔
اندن تربت آپسر ڈاکی بازار نا ہندی عابد ولد وشدل یلہ مریسہ اُرا ءِ سر مس۔
یاتی مرے کہ عابد وشدل پنی آ ورنا آپسر آن 21 مارچ 2023 آ زوراکی ئٹ بیگواہ کننگا ہرانا زوراکی ئٹ بیگواہی نا بر خلاف خاہوت تولوک برانز کریسس۔