”کسہ“
نوشت: ضیاء دلجان بلوچ
مٹ: فہیم بلوچ
دی بلوچستان پوسٹ
ہراتم او لمہ ءِ تینا خنا احترام ئٹ نت تیا تے شیف مس، بھلو وخت ئسے آن گڈ او تینا لمہ تون ملنگ ئس لمہ ہم تینا جغر نا ٹکر ءِ بھلو وخت ئسے آن پد خننگ ئس۔ مار ءِ تینا خمب ئٹ النگ تون اونا خنک دجلہ و فرات نا ندارہ ءِ تننگ ئسر۔ او ہم تینا خڑینک آتے تورنگ کتئو، مار ءِ خننگ تون بھلو سال ئسے آن پد خشک آ خن تیان تینٹ خڑینک آک وہار۔ لمہ دوارہ مار ءِ سینہ ٹی خلک و اوڑان گند کشّا، لمہ و مار ئٹ اندا ردئٹ ساہت اس مس، ساہت ئسے آن گڈ لمہ ءِ ہوش بس کہ مار ئتون ملنگ کہ اونا باوہ ہم ودار ئٹی سلوک ءِ، باوہ مار ئتون ملا۔ ہر مُسٹ آک توسر ہیت گپ مس۔
لمہ اُرا کہ مار اسل نزور مسنے، ریش کرینے، مار کنا داسہ بھلن مسنے، اونا کوپہ آتا پارہ غا اُرا ہرا توفک نا جابہ آتا باریم آن بھاز نزور لگارہ۔ اونا پچ آک بھازا جاگہ آتیان ارنگاسر، اونا بوٹ آک متکن مسوسر اندن لگاکہ دا اسل پالش متنو۔ پژہ آک تے بھاز بھلن مسوسر لمہ ءِ اونا اسکول نا وخت یات بس ہرا وخت پژہ آک تے گر مچے بھلن مروسر تو زور ئٹ پیسہ الککہ کہ اسکول ئٹ استاد آن پژہ آتا بھلنی کہ خلنگپر، بیدس استری آن او پچ بینتوکہ، ولے داسہ جون آ تے ہرا پچ آک ئسر اوتا رنگ بھازا جاگہ آن ہناسس۔
کم و ود باوہ ہم مار ئنا اندا گڑا تیا سوچیسہ ئس، ساہت ئسے آن گڈ لمہ مار آن ہرفے مار امر اس؟ امرو نا کل سنگت آک جوان ءُ نہ؟ مار ہمو بھاز بھلو آپریشن اس ئس، ہراٹی امیر جان، شیر جان و گزین جان شہید مسر؟ ای بنگٹ کہ دژمن نا بھلو فوج ئسے تون اوار ہفتاد ہیلی کاپٹر ہم آپریشن ئٹ بشخ الکسر۔ ۷ اپریل ۲۰۱۴ ٹی چنکا ایلم نا کنے پارے کہ سرکار ٹی وی آ تینا آپریشن نا بناء مننگ نا پڑو کننگ ءِ، ای ہراتم آپریشن نا بنگٹ جائے نماز ءِ ارفیٹ، نا و نا سرمچار آ سنگت آتا سرسہبی کہ خدا نا مونا سجدہ ٹی تماٹ، نم کل اکن خدا نا مونا دو ارفیٹ اوغاٹ، شام ئنا ہراتم دژمن اعلان کرے کہ آپریشن ایسر مس و چل (۴۰) سرمچار ءِ خلنگ نا دعویٰ کرے۔ تو کنا است تمّا، مچ نن سمائی ٹی گدرینگا ہر پاس اندا ہیت است ئٹ کنا بسکہ کہ گر (۴۰) چل خلنگانو گڑا بچانے دیر۔ ولدا تینے تسلی تسوٹہ کہ سرکار دروغ تڑنگے۔ شام ئنا ارغ آ توسن تو اسہ باخو اس ہم گٹ آن گدرینگتو۔سہب ئنا ایلم نا بی ایل اے نا بیان اس خوانا بنفے کنے کہ میرک بلوچ پارینے ننا مسہ سنگت شہید مسنو تو است ءِ مچے تسلی رسینگا ہراتم ایلو اِرا پن ءِ بنگٹ تو است اوغا ہراتم امیر المک نا پن ءِ بنگٹ تو است کنا باٹی بس۔ امیر نا پن ءِ بھلو وخت ئسے آن بنگسٹ کہ دژمن امر خلق ئٹ تا جلہو کرے، امر اونا ایلم و سیال آتے بیگواہ کرے ہراتا اینو اسکان اچ سماء تمنگ اف کہ او زندہ ءُ کہ خلنگار۔
مار نی و نا سنگت آک قربانی ایتنگ ءُ، و گڑاس تینا قربانی تا سودا ءِ خلنگ ءُ۔ مار کنا اینو پگہ انت مننگ ءِ۔ حاجی قلاتی آن پد ہڑدے حوال بننگ ءِ کہ بھاز آ سرمچار آک سلہہ بٹینو، اول ئٹ تو ای اندن سرپند مسٹ کہ سرکار دروغ تڑنگ ءِ ولدانا نا سنگت آغا و ثناء نا پن ءِ بنگٹ کہ اوفک سرکار آن معافی خوائسر تو سرکار نا ہیت آتیا مچے مچے یخین بس دا انت مننگ ءِ ای تو پین تپرہ نی پا کہ دا انت مننگ ءِ؟
لمہ پاننگ ٹی ئس کہ مار لمہ نا ہرفنگ تو پارے کہ حالت آک سخت آن سخت مننگ ءُ اندا خاطر گڑاس بندغ واپس ہنار گڑاس تینا تنظیم نا نزوری تے خنار نزور مسر، گڑاس تینا ہمراہ غا سنگت آتا رویہ آن نا امیت مسر۔ ہراتم او مار ئنا مون آ اُرا تو اودے اونا مون ئٹ آغا، ثناء و قلاتی نا دروشم نظر بس، اونا مننگ اودے بوج اس لگا۔ زرہ اس مست ہرا مار ءِ او تینا سینہ آن مر کننگ خواتوکہ داسہ اونا دروشم ئٹ پشیوانی ءِ خننگ تون اودے اونا جغر نا ٹکر نا سوچ آ افسوز مس، اونا خن تیان خڑینک آک وہار کوک و پاڑو ٹی اوغیسہ او مار ءِ پارے، مار ای نا لمہ اُٹ نی تینا نزوری و نالائخی ءِ پین نا کوپہ غا انتئے تخنگ اس مار صاف صاف انتئے پاپیسہ کہ ای دم درینگانٹ، دژمن نا طاغت ءِ خننگ آن پد خُلینگ اٹ، انتئے دا ہیت ءِ منپیسہ کہ کہنگ آن زیات نے زند دوست ءِ۔
مار پارے آخہ، اما نی سادہ اس، نی اچ اس تپیسہ، دا کل تینا کمانڈری نا پد ئٹ تموک ءُ۔ ای دافتا کمانڈری کہ نم کل ءِ خوار و درپدر کننگ خواپرہ۔
لمہ پارے او مار نی سہی پاسہ ای دا جنگ ئنا بابت اچ تپرہ ولے دژمن نا ظلم ءِ خننگ آن گڈ ہڑدے بلوچ ورنا تا جون آتا تمنگ آن نا مُری کنے بھاز گڑا ہیل تس۔ مار کنے اخہ خواری و درپدری خنوئی ئس ای خناٹ۔ نا مَش تیا ہِننگ آن پد نا سیال آتیان امرو امرو ہیت بنگن، اوفک ننے آ ہننگ بننگ ءِ بند کریر۔ نے سماء ءِ نا اِلہ نا مار ہرا فوج ئٹ ئس اونا برام آ نا الہ ننے پاتئو بس اندن چھپ چھپ برام ءِ تے کرے۔ مار نن نا جہد نا مونا بتون۔ ہراتم ننے گڑاس دا جنگ ئنا بابت سماء تما تو نن مدام کل ئنا سرسہبی کہ دعا کرین، اینو ہراتم ای دا جہد ءِ سرپند مننگ اٹ تو نے اینو انت مس نی تو تینٹ کنے دژمن نا بابت پاریسہ، و اینو نی پاسہ کہ تنظیم نزور ءِ، یا پاسہ بھلا سنگت آتیٹی نزوری ارے، یا او نے کون آتے تینا کمانڈری کہ استعمال کننگ ءُ، تو کنا مار کنے سماء ءِ نی و نا سنگت آک استعمال مننگ اُرے ولے اسہ ذات ئسے کہ نہ بلکن بلوچ ڈغار کہ استعمال مننگ ارے، او لمہ نا دڑد ءِ ہمو مار سرپند مریک ہرا لمہ تون مابت کیک۔
باوہ چھپ تولوک مار و لمہ نا ہیت آتے خف توریکہ تینا زائیفہ ءِ پارے: نیک بخت مار جارات نا زند اس گدریفنگ خوائک و نی اودے ولدا رادہ کننگ خواسہ، مننگ کیک او داڑے مرے گِڑاس کٹے تو ننا پیری نا دیک جارات اٹ گدرینگرہ۔
زائیفہ تینا ارغ ءِ پارے: کہ نا مار اگہ اُرا ٹی تولنگ خوائک تو کائے ہمو بیگواہ انگا ورنا تے ہتے، ہراتا لمہ آک اندا ودار ئٹ زندہ ءُ کہ کنا مار ئنا سنگت آک دژمن تو جنگ کریسہ ءُ۔ کائے امیر جان ءِ ہتے ہرا نا لمہ اودے سال آتا ءِ خنتوسس، شیر جان ءِ کائے ہتے ہرا نا چناک اونا ودار ئٹی ہڑدے درگہ آ اُریرہ، کائے کنا نثار جان ءِ ہتے ہرا نا گڈیکو دیدار ہم اونا لمہ ءِ نصیب متو، حق نواز ءِ یات کے ہرا نا جون ءِ او تینٹ تینا دو تیٹ گاڑی ٹی تخا اونا لمہ کن روانہ کرے تے۔ کائے ہمو کل لمہ آتے ورندی ایتے ولدا برے گڑا کنا کوپہ ٹی ڈھکے تینے۔
اونا خن تیان برجائی ئٹ خڑینک آک وہنگ ئسر۔ او تینا لمہ نا ہیت آتیان پد بھاز ماندہ مس۔ ہموتم اونا خنک ملنگار، بش مس توس، دانگ ہینگ اُرا او تینا جہگ آنبار انگا کمرہ ٹی ئس او تینا امیل و توفک ءِ ارفے وتاخ نا پارہ غا رادہ مس و تینا نزوری تا بابت سوچیسہ سنگت آتے سر مس۔