زوراکی ئٹ بیگواہ کننگوک بلوچ آتا آجوئی کن خلوک بین برانزی کیمپ ءِ 5362 دے مس، برانزی کیمپ ئٹ تربت آن بیگواہ غا بندغ آتا خاہوت آک اوار مسر، و اوڑدئی نا درشانی کروکا تیٹ نیشنل پارٹی نا سروک حاجی نیاز محمد، علی محمد و ایلو بندغ آک اوار اسر۔
دا وختا وی بی ایم پی نا وائس چیئرمین ماما قدیر بلوچ پارے کہ بلوچ شہید آتا قربانیک، ڈیہی تلہ غا بلوچ السی چاہنداری، برانزی عمل ئٹ اواری و جہانی سفارت کاری نا سوب آن بلوچ تحریک اسہ گواچن ئس جوڑ مسنے و اسہ اہم ءُ چوٹ ئسے آ سر مسنے، ہراٹی غٹ فکری تپہ غا تا بندغ آتے اوڑدئی و سیوتی ئٹ تینا کڑد ءِ سر تروئی ءِ۔
او پارے کہ پاکستانی عسکری قیادت تینا غٹ ریاستی مشینری ءِ بلوچ زنک کشی و بلوچ باسک آتے کھسفنگ، اوفتے زوراکی ئٹ بیگواہ کننگ ئٹ خلکنے، ریاستی زوراکی تے توننگ کن بلوچ آتے اسہ پوسکنو صف بندی ئس بکار ءِ تاکہ اوڑدئی ئٹ دا زوراکی ءِ توننگ مرے یا جہانی برادری نا پام ءِ بلوچ آتیا مروکا زوراکی تا کنڈ آ ہتنگ مرے۔
او ودیک پارے کہ ننے خلیس ءِ کہ بروکا دے تیٹ دا ریاستی زوراکی تیٹ پین ودکی برو، ریاست بلوچستان ئٹ اسہ خونی آپریشن ئس بناء کننگ نا فیصلہ کرینے ہرادے بناء بولان و مکران آن کننگ ءُ۔ بولان آن بلوچ چُنا نیاڑی تے پاکستانی لشکر نا دو آن بیگواہ کننگ نا حوالک رسینگانو و مکران ئٹ دشت ئنا مش تا لڑ ئٹی ہم فوجی سُر پُر ئٹ ودکی خننگ آ بسنے۔