28 مئی و بلوچستان
نوشت: زبیر بلوچ
دی بلوچستان پوسٹ
28 مئی 1998 ہمو دے ءِ ہرادے پاکستان یوم تکبیر نا پن ئٹ اڈ ایتک و خوشی کیک ولے ہمو 28 مئی بلوچ ءِ دا مارشت ایتک کہ اسہ حاکم ئس تینا حاکمیت ءِ پین زیات وڑ ئٹ بلوچ آ چَٹی کرے۔ دا ہمو دے ءِ کہ ہراتم چاغی نا مشک ایٹم بمب نا گواچی مسر، ہمو دے آن اخس کہ قدرتی چشمہ ئسر ہرا بیوس آ مخلوق نا دیر کننگ نا زریعہ ئسر ہراکان او تینا ساہدار تے دیر تسرہ ہموکان پد دا چشمہ غاک ام بند مسر۔ دا ہمو وخت ئس کہ راسکوہ نا مش تیٹی پنچ ایٹمی بمب اسہ جاگہ غا ترخفنگا و پاکستان تینا قہر ءِ بلوچ نا زی آ پین شاغا۔
دا پین ہیت ئسے کہ بلوچ نا نسل کشی اسہ بھلا وخت ئسے آن کننگانے داڑے، ہرا دے آ کہ ایٹمی تجربہ مریک راسکوہ آ ہمو دے آن چاغی نا لس مخلوق ءِ اسہ وڑ ئٹ چُپ و مرگ ئنا گواچی کننگک۔
دا ہمو وخت مریک کہ انڈیا تینا ایٹمی آزموندہ ءِ کیک و پاکستان دا گڑا ءِ خنک تو اودے ام دا مارشت مریک کہ ای تینا دشمن ءِ اسہ وڑ ئٹ شکست ایتو، ولے داڑان بھلا ہیت دادے کہ او بلوچ قوم ءِ اسہ وڑ ئٹ شکست تننگ خوائک، اسہ وخت ئسے آن پاکستان بلوچ نا نسل کشی ءِ کننگے او بلوچ ءِ بیگواہ کیک او جشوک جون تے بِٹک، پاکستان 70 سال آن گیشتر بلوچستان ءِ چُپی ئٹ مرگ، زوراکی نا بیگواہی و لُٹ و پُل آن بیدس پین ہچ ام تتنے۔
ہراتم کہ پاکستان نیوکلیئر ٹیسٹ ءِ کیک گڑا اوفک دا پارہ کہ دا بیرہ ٹیسٹ ئسے، ولے پاکستان نا حکمران و سائنسدان آتے دا علم مفک کہ ایٹمی تراک نا انت نتیجہ مرو، ہراتم کہ ایٹمی تراک مریک تو اوکان گُڈ لس بندغ آتا ساہدارک کہیرہ، ہمو ہندی بندغ آتا پاننگ نا ردئٹ کہ دا تدینی آن پد نن دیر کُنگنہ تو ننا باہ آن دتر بسکہ، دا نیوکلیئر ٹیسٹ آن گڈ مخلوق نا کشت و کشارک بھس مسر ڈغار نا تہٹی ریڈیشن ارے ہراکہ فصل آتا زریعت ئٹ خوراک ٹی اوار مریرہ، تو او ولدا کُننگ نا لائخ مفسہ۔
دا ہمو زار ءِ کہ ہراڑان سال ئنا کیہی بندغ آک کینسر نا ناجوڑی نا گواچی مریرہ و کیہی بندغ آک تینا ساہ ءِ بائیفرہ، اسہ پٹ و پول ئسے نا ردئٹ سال ئنا بلوچستان ئٹ 12 ہزار بندغ کینسر نا ناجوڑی نا گواچی مریرہ۔
بلوچ نا اخس کہ قدرتی وسائل اریر اوفتے بھلو وخت ئسے آن پاکستان زوراکی ئٹ لٹ و پل کننگ ءِ چائے او گیس، خیسن یا ایلو وسائل آک مریر پُلنگ و کُننگ ءِ، اگر کس ئس تینا حق اکن ہیت کرے تو اودے بیگواہ کننگک و اونا جون خسنگک۔
بلوچ نا بیوسی و لاچاری تے بلوچ شاعر ئس محسوس کرے، او ہرا کہ بلوچستان ٹی چاغی نا مش تا است ءِ کپ خنا تو منظور بسمل دا باروئٹ شعر اس پارے:
راسکو ءِ اسپیتیں کوہانی سرا
چو کفن پوشیں بلوچ ءِ زندگی
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔