پاکستانی بست و بند کشمیر ئٹی “جموں کشمیر پیپلز نیشنل پارٹی” ناکنڈ آن “بلوچ قومی تحریک و برجاء وخت ئٹی ریاستی جبر” آ اسہ اسٹڈی سرکل ئس اڈ تننگا۔
ہفتئی سٹڈی سرکل درو چانڑدہ جولائی آ یک شمبے نا دے دھوندار باغ ئٹی اڈ تننگا۔
جموں کشمیر پیپلز نیشنل پارٹی نا شعبہ شینکاری نا کنڈ آن شنگ کروک پریس رلیز نا رد ئٹ بلال باغی، اویس حفیظ، فراز، احتشام شبیر، ضیاء، رابعہ رابی، مصباح، طیبہ باغی، تبسم حفیظ، مقدس حفیظ، انشاء شبیر، ایم آر خان سرحال آ تینا خیال آتا درشانی ءِ کریر۔
سرحال آ کامریڈ رابعہ “بلوچ قومی تحریک” نا ہاٹی، تحریک نا جتا مرحلہ و بلوچ راج آ ریاستی زوراکی و بےدادی تا دیہاڑ آ تران کرے و ایلو سنگت آک اوڑتون اوار تران کریر ایم آر خان سرحال نا ایسری تران ءِ کرے۔
اسٹڈی سرکل ئٹ اوار مروکا تران ئٹ بشخ ہلِسہ ریاست نا کنڈ آن برجاء زوراکی و بےدادی تا مزمت ءِ کرِسہ پاریر کہ ریاست نا دا سفاکی و زوراکی بلوچ الس آ کیہی دہک آن برجاء ءِ۔ بلوچ راج ئنا اسہ سوگوْ چم بازی ئسے نا رد ئٹ زنک کشی مننگ ءِ و اشتماعی زنک کشی ٹی زوراکی نا بیگواہی و جشوک جون تا وے سلوکا لڑ بلوچ السی تحریک کن سخت ءُ چکاس ئس مسنے ہراڑان مرحلہ وار گدرینگِسہ بلوچ السی تحریک حتمی مرحلہ ٹی سر مسنے۔
اوفتا پاننگ اس کہ داسا ریاست بےدادی و سفاکیت، دہشت گردانہ پالیسی و عمل ئے بلوچ قومی تحریک ءِ لتاڑنگ کپک۔ تیوہ جہان نا بندغ دوست، جمہوریت دوست و شونداری دوست تاغت آک دا ریاستی بربریت نا برخلاف بلوچ تحریک نا مخ تفی ءِ کننگ ءُ۔
او پاریر کہ محکوم راج آتے بلوچ قومی تحریک آن ہیل کرِسہ مونی بروئی تمو و آجوئی کن اوڑدئی ئٹ جہد کروئی مرو۔