گریشہ آن پنچ بیگواہ بندغ تا آجو مفننگ نا برخلاف برانز مسٹمیکو دے ہم برجاء، برانز نا سوب شار ئٹ پوریا بند مس۔
برجاء تو 19 جولائی آ بلوچستان نا علاقہ خضدار ئٹ پاکستانی لشکر اُرا تیا جلہو کریسہ اُرا تیٹ ساڑی نرینہ تیتون اوار زالبول و چنا تیا بیدادی کریسہ اوفتے ٹپی کریسس اندن دا وخت آ فورسز آک پنچ بندغ ءِ دزگیر کریسہ تینتون دریر۔
تدینی نا برخلاف خاہوت آک و ہندی بندغ آک تدوکا مُسہ دے آن تولوک برانز کننگ ءُ و بیگواہ بندغ تا یلہ کننگ نا خواست کننگ ءُ۔
دا بابت درو بیگواہ بندغ تا خاہوت آک پریس کانفرنس کریسہ پاریر کہ جمعہ نا نن 4 بجہ نا وخت آ وردی و سادہ پُچ بینوک بندغ آک سلیم جان نا مار عبدالواحد، محمد جان نا مار خیر جان، شامیر نا مار عبدالرحمن نا اُرا ٹی زوراکی ئٹ توفک نا زور آ پترینگسہ اُرا تیٹ لٹ و پل کریر سولر آتے نسخان تسر و زور ئٹ سلیم نا مار شاہ جان، خیر جان نا مار گور خان، عبدالرحمن نا مار عارف، لعل بخش نا مار محمد جان، لعل بخش نا مار معیار، صبرو نا مار منیر احمد ءِ تینتون دریر۔
خاہوت آتا پاننگ ئس کہ تدوکا مُسہ دے آن کسر تیا تولوک برانز کننگ اُن، درو سی پیک گری گریشہ و اینو سی پیک ٹوبڑو نا ہند آ تولوک اُن، بست و بند ننا ایف آئی آر ءِ نوشتہ کننگ اف۔