28 جولائی آ گوادر ئٹ اڈ تروک بلوچ یکجہتی کمیٹی نا بلوچ راجی مُچی نا تیاری تا وخت آ کراچی آن پاکستانی لشکر چار بندغ ءِ دزگیر کریسہ بیگواہ کرینے۔
شابیتی حوال تا ردئٹ درو کراچی ٹی بلوچ راجی مچی نا بابت چاکنگ و پمفلٹ بشخنگ نا وخت آ بی وائی سی نا چار باسک ءِ فورسز آک دزگیر کریسہ نادرست ہند آ درینو۔
بی وائی سی نا ردئٹ نوالین ئٹ بلوچ یکجہتی کمیٹی نا مُسہ باسک شہداد بلوچ، صدام بلوچ و باسط بلوچ ءِ بلوچ راجی مچی نا بابت وال چاکنگ و پمفلٹ بشخنگ نا وخت آ ڈی ایس پی کلاکوٹ دزگیر کرے۔ ہر مُسہ بلوچ ورنا تے تھانہ غا دننگ آن پد ڈھکوک ادارہ تا دوٹی تننگانے و منہ گھنٹہ غان پد بی وائی سی کراچی نا اسہ پین باسک عبدالرحمن شاہمیر بلوچ ءِ ہم فورسز آک اُرا غان ارفسہ بیگواہ کرینو۔
ترجمان پارینے کہ نن پاش لوز آتیٹ ریاست ءِ پاننگ خوائنہ کہ بلوچ یکجہتی کمیٹی نا دا السی جنز ءِ طاغت نا ذریعت ئٹ ایسر کننگ مننگ کپک۔ طاغت ءِ کاریم ئٹ ہتیسہ ریاست بلوچ الس ءِ سوختہ کننگ ءِ، ہراڑان پد السی ردعمل نا غٹ ذمہ واریک ریاست آ مرور۔
ایلو پارہ غان بلوچ یکجہتی کمیٹی چاگڑدی حوالکاری تلہ تیا پریس کانفرنس نا پڑو کریسہ پارینے کہ بی وائی سی اینو بیگہ نا چار بجہ غا کوئٹہ پریس کلب ئٹ پریس کانفرنس کرو۔ ہراڑے بی وائی سی نا باسک آک بلوچ راجی مچی نا بابت برجاء پیش رفت آتا باروئٹ میڈیا ءِ پارور۔ میڈیا تون تفوک غٹ بندغ آتے دا اہم پریس کانفرنس ئٹ اوار مننگ نا دعوت تننگک۔