بلوچستان نا صنعتی شار حب چوکی ٹی تدوکا دے تیٹ راجی مچی نا تیاری تا رد ئٹ بیگواہ غا بندغ آتا خاہوت و بی وائی سی و وائس فار بلوچ مسنگ پرسنز نا سروک نا برخلاف ایف آئی آر کننگانے۔
ایف آئی آر بیگواہ مروک ڈاکٹر دین محمد نا مسڑ سمی دین و بیگواہ مروک راشد حسین نا ایلم نا مسڑ ماہ زیب تون اوار ایلو بندغ آتا برخلاف کننگانے۔
پولیس نا پاننگ ءِ کہ پن کروک بندغ آک پاکستان نا برخلاف خار تالان کروکو تقریر کرینو و ریاست نا برخلاف پمفلٹ بشخانو و وال چاکنگ کرینو۔
خیال ئٹ مرے کہ بلوچ راجی مچی کن تیبہ بلوچستان ئٹ تیاریک برجاء ءُ و بست و بند نا کنڈ آن بندغ آتا دزگیری و بیگواہی تون اوار جتا وڑ ئٹ اوفتے خُلیفنگ نا کوشست نا حوال رسینگانے۔
ایلو کنڈ آن واشک آن حوال رسینگانے کہ راجی مچی کن چندہ مُچ کروکا تے واشک پولیس دزگیر کرینے، ورنا تا دزگیری نا برخلاف واشک نا الس اللہ اکبر چوک ءِ بند کرسا پولیس بست و بند نا برخلاف برانز کننگ ءُ۔
اندن راجی مچی ٹی اوڑدئی کن تربت آن گوادر آ ورنا تا لانگ مارچ بناء کننگانے۔
پیدل لانگ مارچ کروکا تیٹ سیاسی باسک جلال غنی تون اوار بالاچ مولابخش نا ایلم و ایلو ورناک اوار ءُ۔
او دا پیدل مارچ ءِ زیارت تون تعبیر کرسا پارینو کہ دا اوفتا مہر و عقیدت نا درشانی ءِ و برانز ہم ارے۔