ورچوئل مون پاشی
ٹی بی پی سرگپ
چانڑدہ اکتوبر آ گوادر جہانی بالی پٹ نا بنائی مجلس رکھ خُلیس آتا سوب آن گوادر نا جاگہ غا اِرا ہزار کلومیٹر مُر پاکستان نا بنجائی شار اسلام آباد ئٹی چین ئنا سروزیر لی چیانگ و پاکستان نا وزیراعظم شہباز شریف نا سروکی ٹی اڈ تننگا، ہراڑے گوادر بالی پٹ نا ورچوئل مون پاشی کننگا۔
گوادر بالی پٹ چین پاکستان اقتصادی راہداری ڈٹ ئنا بشخ ئسے، چین ئنا ملٹی بلین ڈٹ ءِ بلوچ سیاسی و سلہہ بند تنطیم آک استحصالی ڈٹ بندی پارہ، ہرا نا ردعمل ئٹی سیاسی تپہ غاک ڈیہہ ئنا تہٹی و پیشن آ جتا تلہ غا تیا برانز کننگ ءُ و بلوچ سلہہ بند آجوئی خواہوک تنظیم آتا کنڈ آن پاکستان اقتصادی راہداری ڈٹ بندی تون تفوک معاشی و عسکری ماڑی و مڈی تے چرجوئی ئٹ جلہو تا گواچی کننگ ءُ۔
چینی سر وزیر گوادر جہانی بالی پٹ نا پورو کننگ ءِ اہم سنگ میل اس پارے ولے گوادر نا جاگہ غا اسلام آباد ئٹی بالی پٹ نا ورچوئل مون پاشی دا ہیت ءِ پاش کیک کہ بلوچستان چین پاکستان اقتصادی راہداری و ایلو چینی ڈٹ تیکن رکھوک اف و پاکستان دا ڈٹ تا رکھ ئٹی بے سہب مسنے۔
شنگھائی تعاون تنظیم نا اسلام آباد ئٹی بیست و سئیمی مجلس نا وختا گوادر جہانی بالی پٹ نا ورچوئل مون پاشی و لی چیانگ و شہباز شریف نا ہڑتوم کنڈ آن اوڑدئی ٹی “ اواری ئٹ “ رکھوک ماحول ودی کننگ کن “ ہدف جوڑ کننگوک رکھوک گام نا خواست “ آ زور تننگ دا ہیت ئنا درشانی ءِ کہ چین تینا ڈٹ تیٹ سرسہب مننگ آ خلیس نا گواچی ءِ۔ دا اعلامیہ جہان و جہانی سرمایہ دار تیکن پاش کلہو ئسے کہ بلوچ راج ئنا مرضی و منشا آن بیدس استحصالی ڈٹ بندیک قابل قبول مروفس و تاغت نا زور آ بلوچستان ئٹی استحصالی ڈٹ بندیک سرسہب مفرور۔