بلوچستان نا علاقہ نصیر آباد آن اِرا بندغ ءِ زوراکی ئٹ بیگواہ کننگار۔
ٹی بی پی نیوز ڈیسک ءِ رسینگوک حوال تا ردئٹ نصیر آباد نا علاقہ نوتال آن اِرا بندغ زوراکی ئٹ بیگواہ کننگانو ہرافتا چاہنداری مکسی ڈومکی نا مار اوشاک و حمزہ ڈومکی نا مار اختیار نا پِن تیٹ مسنے۔
علاقائی حوالکار تا پاننگ ءِ کہ تدینی درو بیگہ نا پنچ بجہ نا وخت آ مس ہراڑے پاکستانی ڈھکوک ادارہ تا کارندہ غاک پِن کروک بندغ آتے زوراکی ئٹ بیگواہی نا گواچی کریر۔
خیال ئٹ مرے تیوہ بلوچستان ئٹ زوراکی نا بیگواہی تا تدینی تیٹ ودکی بسنے اندن اوفتیٹی ورنا خوانندہ تا بھلو کچ اس اوار ءِ۔
دا تدینی تا برخلاف بلوچ یکجہتی کمیٹی تیوہ بلوچستان ئٹ برانز آتا کال تسنے و دا ردئٹ جتا شار تیٹ برانز آک مریسہ ءُ۔
کوالخواہ تا پارہ غان زوراکی نا بیگواہی تا تدینی تیا ہچو ہیت اس مونا بتنے واہم بلوچ یکجہتی کمیٹی نا برانز آتے کراچی، حب و پنجگور ئٹ توننگ نا کوشست کننگا اندن او وخت آ جتا شار تیٹ موبائل نیٹ ورک آک بند کننگار۔