بی وائی سی نا سروکی ٹی بلوچ زوراکی نا بیگواہی تا برخلاف کوئٹہ ئٹ برانز کننگا۔
بلوچ یکجہتی کمیٹی نا سروکی ٹی زوراکی نا بیگواہی تا برخلاف و بیگواہ بندغ تا آجوئی کن ڈاکٹر ماہ رنگ بلوچ و بیگواہ بندغ تا خاہوت آتا سروکی ٹی سریاب روڈ یونیورسٹی چوک آن ریلی اس کشنگا ہرا جتا کسر تیٹ مریسہ عبدالستار ایدھی چوک آ سر مریسہ برانز نا دروشم ہلک۔
ریلی ٹی اوار مروک آک بینرز، پلے کارڈ و بیگواہ بندغ تا عکس آتے ارفیسر، برانز ئٹ بلوچ بیگواہ بندغ تا خاہوت و شاری تا بھلو کچ اس اوار مس۔
بلوچ یکجہتی کمیٹی نا مہم، ”چپی ءِ پرغنگ: زوراکی نا بیگواہی تا برخلاف بش مننگ“ نا سرحال ئٹ بلوچستان نا جتا علاقہ تیٹ برانز آتا لڑ برجاء ءِ ہراڑے داکان مالو کراچی، حب چوکی، خضدار، تربت، پنجگور، خاران و اینو کوئٹہ ئٹ برانز ریکارڈ کننگا۔
برانز ئٹ تران کریسہ ڈاکٹر ماہ رنگ بلوچ، غلام نبی مری و ایلوفک پاریر کہ ننا برانز نا مسخت بیگواہ بندغ تا آجوئی و داٹی اوار انگا بندغ آتے بلوچستان آن کشنگ ءِ۔
اوفک پاریر کہ ننا پرامن برانز و بیگواہ بندغ تا خاہوت آتے تینا بندغ تا آجوئی کن اخس توننگا و اخس رکھ خلنگانے نن ہموخس سوگو مریسہ بش مسونن ننا دیہاڑ گواہ ءِ کہ ہراتم ادارہ غاک بلوچ آتے زور ئٹ توننگ نا کوشست کرینو نن گیشتر ترندی، طاغت و سوگو دروشم ئٹ بش مسونن و پیشتمانن، بلوچستان ئٹ زوراکی نا بیگواہی تا برخلاف و بیگواہ بندغ تا رکھوک آجوئی کن اینو دا ریلی و تولوک برانز ہمو طاغت آتیکن اسہ پاش کلہو ئسے۔
برانز ئٹ تران کریسہ اوفک پاریر کہ اندا وڑ نا برانز آتیان ذاکر مجید پیشتمانے و پین ہم پیشتمو انتئے کہ دا اشتماع و برانز دلیر آتے ودی کرو ہرا زندان ئٹ ہم بلوچ آتیکن نعرہ خلور ہرا تینا ضمیر ءِ بہا کتو ہمو ننکن شرف مند ءِ۔
تران کروک آتا پاننگ ئس کہ دا پرامن برانز نا ذریعت ئٹ خواست ءِ کہ ننا ڈغار آ زوراکی نا بیگواہی تیٹ اوار مروک بندغ آتے کشوئی ءِ و دا برانز نا ذریعت ئٹ نن زوراکی ئٹ بیگواہ بندغ تا خاہوت آتے پاننگ خوائنہ کہ او تینا بیگواہ بندغ تا شابیتی حوال تے بلوچ یکجہتی کمیٹی تون جمع کرفر تاکہ او بیگواہ بندغ تا آجوئی ممکن جوڑ مننگ کے۔
ودیک برانز کروک آک بیگواہ بندغ تا آجوئی و تینا خواست آتا حق ئٹ نعرہ خلیسہ ایمنی ئٹ یکہ مسر۔