دلجان بلوچ نا خاہوت و ہندی بندغ آک برانز کریسہ کراچی آواران کسر ءِ بند کرینو۔
زوراکی ئٹ بیگواہ دلجان بلوچ نا آجوئی کن اونا خاہوت و ہندی بندغ آتا برانز برجاء، برانز کروک آک آواران نا ڈپٹی کمشنر (ڈی سی) نا دفتر نا مونا تولوک برانز کننگ ءُ اندن دا وخت آ آواران آن کراچی بنجاہی کسر ءِ بیدی نا ہند آ بند کرینو۔
برانزی تا ردئٹ او ترند یخ تون پاش آسمان نا شیف آ تولوک برانز کننگ ءُ انتئے کہ ٹینٹ خواجہ غاک ریاستی تڑی تا سوب برانزی تے آسراتی تننگ آن نمن کرینو۔
برانز کروک آتا ردئٹ، پاکستانی لشکر و پولیس چرجوئی ئٹ بھیم ئنا گواچی کننگ ءُ تاکہ برانز ءِ ایسر کرفنگ کیر، ولے اوفک ہموتم اسکان برانز ءِ برجاء تخور ہراتم اسکان دلجان بلوچ آجو متنے۔
یاتی مرے دلجان بلوچ ءِ 12 جون 2024 آ پاکستانی لشکر آواران آن دزگیر کریسس، و اونا بیگواہی آن پد اونا خاہوت 3 اکتوبر 2024 آ ڈی سی آفس آواران نا مونا چار دے تولوک برانز کریسس۔
خاہوت نا ردئٹ ہمو وخت ڈی سی آواران و ایلو ضلعی کوالخواک معاہدہ کریسر کہ دلجان بلوچ ءِ 10 دے ئٹی یلہ کننگو، ولے اینو اسکان ہچو گام اس ارفنگتنے۔ خاہوت نا پاننگ ءِ کہ دروغ وعدہ و دروہ تننگ نا سوب او دوارہ برانز کننگ آ بیوس مسنو۔
برانز کروک آک دا وخت آ ٹرانسپورٹ خواجہ غاتیان و لس مخلوق آن خواست کرینو کہ او اوفتا برانز ئٹ اوار مریسہ ظلم ئنا برخلاف سیوتی نا درشانی کیر، برانزی تا پاننگ ءِ کہ اگہ تولوک برانز ئٹ اوار مروک آتے اسہ نسخان اس رسینگا گڑا اونا ذمہ واری ضلعی بست و بند و ساڑی آ حکومت آ مرو۔
دلجان بلوچ نا خاہوت گیشتر پارے کہ ہنوک وخت ئٹ برانز ءِ ایسر کرفنگ کن دروغ دلاسہ تننگا، ولے داسہ اوفک باوری ترفنگ آن بیدس برانز ءِ برجاء تخور۔
اوفتا پاننگ ءِ کہ دلجان بلوچ نا آجوئی اوفتا بنداوی خواست ءِ و اوفک ہچو دروشم اسیٹ داڑان پدی مروفس۔