بلوچستان نا دریابی شار گوادر ئٹ درو ڈھوریہ اسکول نا مونا کتاب اسٹال خلنگ آ چار بلوچ خوانندہ غاتیا ایف آئی آر کننگانے۔
خیال ئٹ مرے درو پولیس کتاب اسٹال آ جلہو کرسا خوانندہ و کتاب آتے تھانہ غا دریسس و پدان ہراتم پولیس اوفتے یلہ کرے تو ڈھکوک ایجنسی تا ادارہ غاک اوفتے توریر و اوفتیان سر سوج کریر و اوفتیا ایف آئی آر کننگا۔
بساک خوانندہ غا تیا ایف آئی آر کننگ نا مذمت ءِ کرسا پارینے کہ بلکن دا جہان نا اولیکو تدینی مرو ہراڑے کتاب اسٹال خلنگ و کتاب بہا کننگ و چائنداری تالان کننگ نا ڈوہ ئٹ خوانندہ غا تیا ایف آئی آر کننگہ و جیل ئٹ شاغنگہ۔
بساک اینو آن گوادر ئٹ بلوچستان کتاب کاروان نا کتاب مُچی اڈ تننگ آ پولیس نا کنڈ آن چھار خوانندہ ءِ کتاب آتون اوار دزگیر کرسا جیل ئٹ شاغنگ و بلوچستان نا ایلو علاقہ تیٹ برجاء کتاب مُچی تیا پولیس نا پارہ غان اسہ وڑ ہڑاند شاغنگ نا برخلاف بلوچستان نا جتا شار تیٹ برانز اڈ تننگ نا پڑو کرینے۔
اولیکو بشخ ئٹ کوئٹہ، تربت، ڈی جی خان، نصیرآباد ئٹ برانز کننگو۔