تدوکا دے تیٹ کوئٹہ نا سول اسپتال ئٹ ہتنگوک 23 جون تا چاہنداری کن بروک بیگواہ بندغ تا خاہوت آتے فورسز آک بیدادی نا گواچی کرینو۔
تدوکا دے تیٹ اسپتال ئٹ ہتنگوک 23 نادرست جون تا چاہنداری کن بلوچستان نا کیہی بیگواہ بندغ تا خاہوت آک کوئٹہ سول اسپتال نا مونا مُسہ دے آن مُچ ءُ خاہوت آک اسپتال ئٹ ہتنگوک جون تا چاہنداری نا خواست کننگ ءُ۔
اندن سول اسپتال ئٹ تخوک جون تیان پنچ جون ءِ خاہوت آک چاہنداری آن پد دوئی مسر۔
اسپتال نا مونا جون تیکن مُچ مروک خاہوت آتے فورسز آک بیدادی نا گواچی کریسہ اوفتے یکہ کننگ نا کوشست کریر۔
دا وخت کوئٹہ سول اسپتال نا مونا کیہی زوراکی ئٹ بیگواہ بندغ تا خاہوت آک، سیاسی و بندغی حق آتا باسک آک ساڑی ءُ۔
کوئٹہ سول اسپتال ئٹ ہتوک جون تا بابت فورسز کوالخواہ تا پاننگ ءِ کہ پن کروک بندغ آک جعفر ایکسپریس جلہو آن پد کلیئرنس آپریشن ئٹ خلنگوک سلہہ بند جنگجو ءُ، ولے خاہوت آک اوفتا چاہنداری نا خواست کننگ ءُ۔
داکان بیدس کوئٹہ نا کاسی قبرستان ئٹ پولیس و ایلو کوالخواہ تا پارہ غان نن ئنا تارمئی ٹی 13 جون ئنا کڈ کننگ آ ہم بندغ آتیٹ خُلیس خننگک۔
یاتی مرے بلوچستان ئٹ داکان مُست ہم کیہی تدینی تیٹ زوراکی ئٹ بیگواہ بندغ آتے فورسز آک دروغ نا مونتس تیٹ کسفسہ اسپتال آ ایسنو، ہراڑے خاہوت آک تینا بندغ آتے درست کریسہ جون تے دوئی مسنو۔
فورسز و اسپتال بست و بند نا پارہ غان وار وار جون تا چاہنداری ءِ توننگ، نادرست قبرستان تیٹ کڈ کننگ، خاہوت آتیان حلف نامہ تیا دستخط ہلنگ و پین بھیم نا گواچی کننگ نا تدینیک مسنو۔