ریاستی ادارہ تا ضد — ٹی پی بی سرگپ
پاکستان نا مقتدر طاغت آک بلوچ یکجہتی کمیٹی نا زالبول سروک آتا آجوئی کن بلوچستان نیشنل پارٹی (مینگل) نا تولوک برانز ءِ ہر وخت آنبار طاغت نا زور آ ایسر کننگ نا پالیسی ءِ برجاء تخانو، و ریاست نا رد پالیسی تا بدلہ ءِ الس و واپاری تے تروئی تمنگ ءِ۔ سرمایہ داری کن پرامن ماحول فراوان کننگ نا دعویدار حکومت، تینا رد انگا فیصلہ تیان ہندی واپاری تے کروڑ آتا نسخان تا گواچی کرینے۔
بلوچستان نا متنازعہ حکومتی اوغدیدار آک پریس کانفرنس آتا ذریعت ئٹ ریاستی تادی نا برخلاف بلوچ یکجہتی کمیٹی نا پرامن السی مزاحمتی تحریک ءِ دہشت گردی تون تفنگ نا ہر وار کوشست کننگ ءُ، ہراڑان اوفتا بے سوبری پاش مننگ ءِ۔ حکومت نا بے سوبر آ گام تا سوب آن بلوچستان نا اِرا اہم ءُ کسر پانزدہ دے آن بند ءُ، و اہم کسر تیا کنٹینر تخیسہ و کڈ خلیسہ مخلوق نا ہن و بر نا غٹ کسر تے بند کننگانے۔
بلوچ راج دوست جماعت آک چرجوئی ئٹ ریاست ءِ خبڑدار کریسہ بسنو کہ پرامن تحریک ءِ طاغت نا ذریعت ئٹ لتاڑنگ مننگ کپک۔ ریاستی تادی نا برخلاف بش مروک تحریک بیدادی ئٹ ایسر مننگ کپک۔ ریاست نا رد پالیسی تا برخلاف تیوہ بلوچستان ئٹ شٹر ڈاؤن ہڑتال آک، ریلی و برانز آک دا ہیت ئنا شاہدی ءُ کہ بلوچ راہشون آتے بندی کننگ آن پد ہم السی مزاحمتی تحریک برجاء مرو۔
ڈاکٹر ماہ رنگ، بیبو بلوچ، بیبرگ بلوچ و صبغت اللہ شاہ جی تون اوار سد آ سیاسی باسک آتا دزگیری نا برخلاف مستونگ ئٹ سردار اختر مینگل نا تولوک برانز پانزدہ دے آن برجاء ءِ، ولے ریاستی ادارہ غاک بلوچستان ئٹ خراب مروک حالیت آتے مارنگ نا جاگہ غا سیاسی باسک آتا دزگیری کن اُرا تیا چھاپہ خلنگ ءُ۔ گل زادی بلوچ ءِ دزگیر کریسہ بیدادی نا گواچی کننگانے۔ پاکستان نا عدالت آتا انصاف نا خواست آتے پورا کپننگ و ریاستی ادارہ تا ضد بلوچستان نا برجاء غا حالیت آتے گیشتر خراب کننگ نا سوب جوڑ مرو۔