بلوچستان نا ضلع خضدار نا علاقہ اورناچ ئٹ استو سلہہ بند ڈیتھ اسکواڈ نا کارندہ غاک اسہ اُرا ئسے آ جلہو کریر۔
حوالکار تا ردئٹ جلہوکار آتا مسخت اُرا ٹی ساڑی اسہ ورنا ئسے برمتہ کننگ ئس، واہم خاہوت نا پارہ غان ترند مزاحمت نا سوب اوفتا دا کوشست بے سہب مس۔
ہندی حوالکار آک پاریر کہ ہراتم خاہوت برمتہ نا کوشست ءِ بے سہب کننگ کن مزاحمت کرے گڑا جلہوکار آک تینا مون سم کاری کریر۔ جلہوکار آتا سم کاری آن اوفتا تینا ہی سنگت ہمو ہند آ مرگ ئنا گواچی مس۔
تدینی آن پد ایلو جلہوکار آک تینا سنگت نا جون ءِ اِلیسہ ہند آن نرنگ ئٹ سرسہب مسر۔ کوالخواہ تا پارہ غان دا بابت دائسکان ہچو ہیت اس مونا بتنے اندن جون دائسکان ہموڑے تموک ءِ۔
خیال ئٹ مرے بلوچستان ئٹ پاکستانی لشکر نا سروکی ٹی سلہہ بند ٹولی جوڑ کننگانے ہرافک السی بولی ئٹ ”ڈیتھ اسکواڈ“ نا پِن ئٹ چائنگرہ۔
راج دوست آتا پاننگ ءِ کہ دا ٹولیک نئے بیرہ سیاسی و چاگڑدی باسک آتے کسفنگ و بیگواہ کننگ ئٹ اوار ءُ بلکن نشہ، زر اکن برمتہ، و ایلو ڈوہ تیٹ ہم اوار ءُ۔ دا ٹولی تے ریاستی ادارہ تا پارہ غان تیوہ مُخ تفی دوئی ءِ و کوالخواہ تا پارہ غان دافتے تیوہ آزاتی تننگانے۔