بیبو بلوچ ءِ استو اسہ وار پین بے رحم آ بیدادی آن گڈ ہدہ جیل آ سر کننگا ۔ بی وائی سی

بلوچ یکجہتی کمیٹی نا شینک کروک بیان ئٹ پاننگانے کہ تنظیم نا ایکٹوسٹ بیبو بلوچ ءِ درو شام ئنا پشین جیل ئٹ پولیس و ڈکوک ادارہ آتا کارندہ غاک بیدادی تا گواچی کریر، ہراڑان بیبو بلوچ نا حالیت بھاز خراب مس۔ اودے بد انگا حالیت ئٹ کمبائنڈ ملٹری اسپتال کوئٹہ سر کننگا، ہراڑے مچٹ وخت النگ آن گڈ بیدس علاج آن اودے دوارہ اندا حالیت ئٹ ہدہ جیل کوئٹہ سر کننگا، ہراڑے او نا حالیت اسہ رنگ خراب ءِ۔

یاتی مرے کہ 24 اپریل نا نن 8 بجہ غا کوئٹہ پولیس و سی ٹی ڈی نا کارندہ غاک جیل ئٹ بیدس قانودی وڑ ئٹ پُترینگسہ ڈاکٹر ماہ رنگ بلوچ، بیبو بلوچ و گلزادی بلوچ ءِ بیدادی تا گواچی کریر۔ اندا وخت بیبو بلوچ ءِ ہدہ جیل کوئٹہ غان زوراکی ئٹ بیگواہ کننگا۔ 24 گھنٹہ زوراکی ئٹ بیگواہی آن گڈ بیبو بلوچ ءِ پشین جیل سر کننگا، ہراڑے او نا بیرک و واشروم اسکان نظر تخنگ کن کیمرہ خلکر۔

بیان ئٹ پاننگانے کہ بیبو بلوچ پشین جیل سر کننگ آ و بے رحم آ بیدادی تا برخلاف اسہ رنگ بین برانز آ تولوک ئس۔ داستو دوارہ ہدہ جیل سر کننگ آن گڈ بین برانز ءِ ایسر کرے۔ اسہ رنگ دہ دے آن بین برانز و بے رحم آ بیدادی تا سوب او نا حالیت دا وخت بھاز خراب ءِ و ننے او نا جانجوڑی نا بارسٹ بھاز خلیس ءِ۔

او پاریر کہ نن اقوام متحدہ غان خواست کینہ کہ او بلوچ سیاسی راہشون آتا جیل ئٹ رکھ و اوفتا یلہ مننگ کن تینا کڑدار ءِ سر ایتر، انتئے کہ جیل ئٹ ننا راہشون آتون اسہ رنگ بیدادی نا تدینی تا سوب ننے اوفتا زند آتا بابت ئٹ ترند خلیس ءِ۔