اے تم آ ایسس قرآن
نے کہ نن زی آن دڑان
جیل اٹی داخس سڑان
نی ننے کنگس اناس
پٹ ء دا سردار تے آ
قوم ئنا غدار تے آ
سوہر و دلار تے آ
نی ننے کنگس اناس
نسلے نا چٹے فینہ
دے تے نا کٹے فینہ
داکا نے نرے فینہ
نی ننے کنگس اناس
مرّی نا سنگت امان
سٹینہ پر آ تغ آن
کشکنہ نن رغ رغان
نی ننے کنگس اناس
خلکنس چندی تے نی
جیل ئنا بندی تے نی
تورے نس گودی تے نی
نی ننے کنگُس اناس
نی کنا تینا اوسک
غیر اتو یکجا اوسک
دشمن اُس پکّا اوسک
نی ننے کنگُس اناس
طوبے و استار تے اُر
ڈے ئنا دلدار تے ار
مش تا زیا مار تے ار
مزہ ء مشتیٹی بر
سر مریرہ خواجہ غاک
مشتیان شہزادہ غاک
ہس مرور نا جاگہ غاک
مزہ ء مشتیٹی بر
پختہ او لاڈی آ جیک
خیسنا گوادر نادیک
مش کنیرک ڈب خنیک
مزہ ء مشتیٹی بر
او کریر فکر آ عمل
دشمن ء تسور چغل
مرگ ء ہم کیرہ بغل
مزہ ء مشتیٹی بر
جنگ ئنا ہڑدُڑ مریک
رقص بس دڑکّڑ مریک
ڈوڈی و بُلّڑ مریک
مزہ ء مشتیٹی بر
نرہ اِن خانہ وسم
او اریر ثابت قدم
کپسہ جنگ ء ختم
مزہ ء مشتیٹی بر
زالان بلوچ