گلزمین گیمرینگوک ءِ!
نوشت کار: جعفر قمبرانی
دی بلوچستان پوسٹ
مگہ دن مننگ کیک کہ ڈغار نا خواست آک بدل مریسا کار کہ دا سال روچ آک چھپی نا ءُ یا کوکار!
سما اف کنا ڈے آ دُن انتئے مریک کہ کل اسہ وار تون جوڑ تے گنڈیسا چھپ زُنڈیرہ۔ یا کل اسہ وار تون گٹ گلو آن کارہ۔ کوکار کیرہ۔
پک انگا ہیت دادے کہ سخت انگا وخت چھپی اتیک، ولے چھپی ٹی قوم و ڈے انا وارث دیر مریک؟
دن انتئے مریک کہ کنا ڈے آ کوکار اٹ ہرکس تینا توار ءِ خلیک۔ چھپی ٹی کوکار ودی کننگ نا جیرت کس اتون مفک!
ہچ سما اف کہ گلزمین نا خواست آک نزور ءُ یا ننا قومی آ ایمان آک ہچ آن حساب؟
راست ہُننگے تو اینو توار ودی کروک آک زندان تا گواچی ءُ تو کس تینا توار ءِ ایلو تا خف آ شاغنگ پیڑزو کپک۔
نزوری ہراڑے کے؟ پٹبو تا
ببو پٹنبو تا
جوان، کل اتون امنا کیوہ کہ ‘قومی جہد آتیٹی بڑزی شیفی المی ءِ’ ولے شیفی نا مسخت دن مف کہ نن دُون اٹ دڑِن۔ ہندن شیف کان کہ ڈغار ءِ ہم خنپن و دانا خواست آتے پہہ مفن۔
سوج دادے کہ غلام آ قوم اکن زند و مرگ انا انت مانہ؟
سوج دادے کہ نن تینے آجو تکینہ یا آخا؟ اگہ آخا تو گڑا ننا رویہ تیٹی سفا ہندا ویل پاش انتئے مفک؟
ڈکھ انا ہیت دا کہ نن دائسکان وطن نا ویل و خواست آتے پہہ مننگ آن مر اُنک۔
کنا مزغ اٹ تو دا بریک کہ فکر سوگؤ مف، ایمانک نزور مریر، قومی مفاد آتیا زاتی مفاد آک گَڈو مریر، جیب انا خالی مننگ گڑتی جوڑ مرے و پڈ انا لنگڑی خدا نا قانود تکنگے تو گڑا چھپی ءِ مصلحت نا پن تننگ مریک، زندہ مننگ ءِ ہُشاری پاننگک، قومی زمہ واری تے بڈ پہہ مننگک، نیزگاری تے دو تا لکیر (بخت) و غلامی ءِ آزمائش تکنگک۔
ولے دن اسل افک۔ اصل ہیت دادے کہ دا کل استعماریت و و زوراک آتا نیمہ غان بروک ءُ سوچ ءُ۔
انتئے کہ دا تو پک ءِ کہ نن ہشار افن، دا ہم دروغ افک کہ نن موقع پرست اُنک و دا ہم یک پہ ٹِک راست اسے کہ نن قومی مسخت آتیکن تینا سِر ءِ ندر کننگ آن خلینہ یا تینا زاتی مسخت آتے قوم انا غظیم انگا مسخت آتیان زیات تکینہ۔
دا ہم گپ اسے کہ بھیم ( خُلیس) ننا تل تل اٹ جاغہ کرینے۔
سما ءِ نے انت اسے نا بھیم۔۔۔؟ لنگڑی، بے نپادی، نیزگاری، کہنگ یا تو زند انا آسودہی تیان مُری نا بھیم
ولے نن دا پہہ افن کہ ننا ڈے آ ازگار ہم لنگڑ ءِ، نوکری کروک آ ہم خلیس نا گواچی مریسا قومی آ قاتل آتیتون دو لخی کیک، جیب شُپ ہم کہک، آلم ہم بے تغ ءِ، ورنا ہم شوگیر کیک۔
فرخ ارے تو فکر و مسخت نا، ایہن آخا۔
فرخ است آتا ءِ۔ اسٹ نا است چلتن آن بار پوڑؤ سوگؤ و بالادی ءِ۔ کس نا است بُڈی کیک تو کیک۔
بس بھلا ویل دادے کہ غلام انگا قوم انا خوانندہ ہم اسہ نوکری ءِ زند انا مسخت تکک، کسر تا جوڑ، بلف انا روشنائی و نالی نا مننگ ءِ شون ہلنگ پائک و جیب انا شُپ مننگ ءِ آسودہی چاہک۔
دا بھلو ویل اسے کہ ننا تینا گواچن آ مسخت ءِ گیرام کرینن و چنکا دیخر انگا گڑا تا رند اٹ چیچلو کنینہ۔
پک انگا ہیت دادے کہ ننا اینو نا چھپی، جوڑ تا گنڈنگ و خن تے پیہن بڈی دانگ اینگ اڑسنگ دا گڑا نا پاش ءُ شاہدی اسے کہ نن غلامی ءِ غلامی تکنگ افن ولے ننا مزغ آک اسہ غلام اسے آنبار سوچ خلنگ آ بے وس ءُ۔
یانی ننا جون آک آجو ولے سوچ آک قید و بند ءُ۔ پاش پاؤ تو نن فکری غلامی نا گواچی اُنک۔
ننا فکر نزور ءِ۔
ننا بلوچی آ ایمان پختہی نا سیم و حد آتیان بھاز مر ءِ
ننا جیرت تُنگانے، پوشِک۔
ننا قلم ناسیاہیک باریسا مٹ و پہین ءُ دتر جوڑ مسنو، ولے نن گل آن بال اُن کہ نن زندہ اُن۔
زند ہندن مریک۔۔۔۔۔؟ بے توار بے چکار، بے میار و نن زندہ اُن؟
ایڑکوک زندان تیٹی و وطن گیمرینگوک ءِ۔
نن زندہ اُن
مگہ جاہیکہ نن زندہ اُن۔۔۔۔۔؟
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔