بلوچستان نا ضلع سوراب ئٹ جلہو نا گمانی بھیم نا سوب اسسٹنٹ کمشنر سوراب غٹ السی ٹرانسپورٹ خواجہ غاتے، کوچ و ویگن سروسز آتے رکھ ئنا پوسکنو پرمان شینک کرینے۔
سرکاری پڑو نا ردئٹ 21 جولائی 2025 آن تیوہ ضلع ئٹ چلنگوک غٹ پبلک ٹرانسپورٹر آتیا شیف آ تروک رکھ ئنا گام تے ارفنگ المی مرو ہراڑے ہر کوچ و ویگن آ پرائیویٹ سکیورٹی گارڈ نا سلفنگ، بس آتیٹ جی پی ایس ٹریکنگ سسٹم نا خلنگ، الارم بٹن نا مننگ، گاڑی تیٹ سی سی ٹی وی کیمرہ خلنگہ۔
نوٹیفکیشن ئٹ درشان کننگانے کہ الس نا ساہ و مڈی تا رکھ اکن دا گامک المی ءُ و 22 جولائی 2025 اسکان دافتیا تیوہ عمل کپننگ نا دروشم ئٹ سخت قانودی کاروائی کننگو۔
دا گام تا پدندارہ داسہ نا رکھ ئنا حالیت ءِ خاص وڑئٹ درو قلات نا خڑک آ نیمرغ کراس آ کراچی آن کوئٹہ غا ہنوک بس آ مروک جلہو ہراٹی حکومت نا حکومت بلوچستان نا ردئٹ مُسہ بندغ مرگ ئنا گواچی مسر۔
بلوچ لبریشن آرمی جلہو نا ذمہ واری ءِ ارفسہ پاریسس کہ پاکستانی لشکر نا کارندہ غاک ننا نشانہ غا ئسر ہرا السی بس ئٹ سفر کننگ ئسر و دا جلہو ئٹ تنظیم پاکستانی لشکر نا 27 کارندہ مرگ ئنا گواچی کننگ نا پڑو کریسس۔
داکان بیدس بست و بند رکھ ئنا گام ءِ خیالداری گام گوندانے ولے کیہی ہندی ٹرانسپورٹر آک داڑا خُلیس نا درشانی کرینو۔
ٹرانسپورٹر آتا ردئٹ بیدس مالی و تکنیکی کمک آن دا شڑط آتیا عمل مننگ کپک، خاص وڑئٹ مُرغن آ کسر تا بس آتیکن ہرا سہب ئنا پیشتمسہ نن اسکان سفر ئٹی مریرہ۔
یاتی مرے داڑان مُست اپریل 2025 ئٹ ہم ضلع نوشکے آن خڑک بلوچ لبریشن آرمی اسہ کاروائی اسیٹی السی بس ئٹ سفر کروک فوجی کارندہ تے ٹک کریسس ہراڑان پد بلوچستان ئٹ بس آتیا سکیورٹی ودفنگ نا خواست آک مونا بسوسر۔