ایسر مفروک آ سیاسی مزاحمت — ٹی بی پی سرگپ
یک و نیم سال مُست بلوچستان نا شار تربت آن زوراکی نا بیگواہی، دزگیر ئٹ خون و ریاستی تادی تا برخلاف اسہ مزاحمتی تحریک اس بش مس، ہرا اسلام آباد ئٹ اِرا توہ تولوک برانز کرے تاکہ بلوچستان ئٹ برجاء ریاستی ظلم و تادی تا پالیسی تے ایسر کننگ مرے۔ واہم یک و نیم سال آن پد، اسلام آباد ئٹ زوراکی ئٹ بیگواہ بندغ تا و بندی آ سیاسی راہشون تا خاہوت آک دوارہ تولوک برانز کننگ ءُ تاکہ اوفتا سیاسی راہشون تا آجوئی کن توار ارفنگ مرے، ہرا ریاستی تادی نا برخلاف اسلام آباد ئٹ متحرک ئسر۔
اسلام آباد ئٹ یک و نیم سال مُست بلوچستان ئٹ ریاستی پالیسی تا برخلاف برانز کروک سیاسی تحریک ہرا ریاستی رویہ تون مون تننگ ئس، اینو اوفتا خاہوت آک ہم ہمو رویہ تیتون مون تننگ ءُ۔ چار دے آن ریاستی ادارہ غاک بندی آ سیاسی راہشون تا خاہوت آتے اسلام آباد پریس کلب نا مونا برانز کننگ آن توننگ نا کوشست کننگ ءُ، و ترند آ پِر ئٹ ہم اوفتے ٹینٹ خلنگ نا موکل تننگ افس۔
بلوچستان نا متنازع سر وزیر سرفراز بگٹی و پاکستان نا مسکوہی سر وزیر انوار الحق کاکڑ ریاستی تادی نا برخلاف بش مروک تحریک ءِ بلوچستان نا خراب حالیت و بے ایمنی نا ذمہ وار گوندارہ، و اوفتا دزگیری آن بلوچستان نا کسر تیا ایمنی ہتنگ نا دعویٰ کریرہ۔ واہم بلوچ یکجہتی کمیٹی نا سروک ڈاکٹر ماہ رنگ بلوچ، بیبرگ بلوچ، صبغت اللہ شاہ جی، بیبو بلوچ و گل زادی بلوچ چار توہ آن بندی ءُ، اندن اوفتا دزگیری آن پد بلوچستان نا خراب حالیت آن جُوان مننگ نا جاگہ غا بتر خراب مسنو۔
پاکستان نا عدالت آک انصاف نا خواست آتے پورا کپسہ و بلوچ راہشون تا کیس ئٹ جانبداری نا درشانی کریسہ ریاست نا مقتدر طاغت آتا پالیسی تا بشخ جوڑ مسنو۔ پاکستان نا مقتدر طاغت آک دا تکرہ کہ ظلم و تادی ئٹ سیاسی مزاحمت ایسر کننگ مریک، واہم بلوچ راہشون آتا چار توہ آن جیل ئٹ ریاستی ادارہ تا بیدس راہبندی گام تیتون اُست ئنا ہُب ئٹ مون تننگ دا ہیت ءِ پاش کیک کہ سیاسی مزاحمت نا کسرک وختی ڈول ئٹ بند کننگ مریرہ، ولے اگہ ریاستی تادی نا پالیسیک برجاء مسر گڑا بلوچستان آن مزاحمتی تحریک آک بش مریسہ کرور۔