سفارتی بے سہبی
ٹی بی پی سرگپ
پاکستان و چین اقوام متحدہ ٹی بلوچستان نا آجوئی کن جہد کروک بلوچ لبریشن آرمی (بی ایل اے) و اونا فدائی کڑدہ مجید بریگیڈ ئے سلامتی کونسل نا 1267 القاعدہ رکھ ئنا کمیٹی نا رد ئٹ “دہشت گرد تنظیم” ئس پن کننگ کن اسہ اوڑدئی قرارداد ئس مونا ایسُر۔ واہم، اقوام متحدہ نا 1267 کمیٹی نا رکھ ئنا بست و بند نا رد ئٹ بلوچ لبریشن آرمی (بی ایل اے) و مجید بریگیڈ ءِ دہشت گرد ٹولی ئس پن کننگ نا سلہ ءِ امریکہ، برطانیہ و فرانس رد کریر۔ او پاریر کہ بی ایل اے ءِ القاعدہ و داعش تون گھنڈنگ نا شاہدیک داخس اف ہرافتا بنداؤ آ اودے دہشت گرد تنظیم ئس پاننگہ۔
چین و پاکستان کیہی سال آن بلوچ لبریشن آرمی ءِ جہانی تلہ غا تیا دہشت گرد تنظیم ئس منفنگ نا کوشست کننگ ءُ۔ شنگھائی تعاون تنظیم و اقوام متحدہ نا سلامتی کونسل ئٹ اوڑدئی قرارداد اندا کوشست آتا اسہ بشخ ئس ءِ تاکہ بلوچ تحریک ءِ مذہبی شدت پسندی تون گھنڈسہ جہانی ادارہ غاتا کنڈ آن رکھ خلفسہ بلوچ راجی آزادی نا سرکڑدہ ادارہ غاتیا دباؤ ءِ ودفنگ مرے۔ واہم دا دیہاڑی گواچن ئسے کہ بلوچ تحریک نا ہچ وخت آ ہم مذہبی انتہا پسند تنظیم آتون تعلقداری اف و دا گواچن آن نمن مننگ منکن اف کہ بلوچ راجی آزادی نا جہد تینا بنداؤ آن ہی شونداری دوست آ فکر ئتون تفوک مسنے۔
اقوام متحدہ نا سلامتی کونسل ئٹ سفارتی بے سہبی تیان بیدس چین و پاکستان بروکا وخت ئٹ زوت جہانی تلہ غا تیا بلوچ سلہہ بند تنظیم آتے دہشت گردی تون گھنڈسہ اوفتیا رکھ خلفنگ نا کوشست ءِ برجاء تخور ولے بلوچستان نا ڈغاری گواچن آتے مٹ کننگ نا سفارتی و فوجی کوشست آتیان بیدس ہم آجوئی کن جہد کروک سلاہ بند تنظیم آک چین ئنا معاشی و فوجی ڈٹ بندی تیا بھلو کچ ئسے ئٹ جلہو ءِ برجاء تخانو ہرا نا سوب آن چین تینا اقتصادی و فوجی ڈٹ بندی تے ایسری تننگ ئٹ بے سہب ءِ۔ پاکستان و سعودی عرب نا نیام ئٹ اوڑدئی دفاعی معاہدہ نا دے ضلع کیچ ئنا علاقہ دشت ئٹ چین۔پاکستان اقتصادی راہداری نا کسر آ پاکستانی فوج ئنا قافلہ غا بی ایل اے مجید بریگیڈ نا فدائی جلہو اسہ پھاش کلہو ئس تخک کہ جہانی تلہ غا تیا مروک سفارتی و دفاعی فیصلہ غاک بلوچ سلاہ بند تنظیم آتا جنگی لائخی آ ہچو زہم شاغپسہ۔