تحصیل زہری نا پلویڑ – ٹی بی پی سرگپ
بلوچستان نا ضلع خضدار نا تحصیل زہری ئٹ پاکستانی لشکر نا آسمانی و زمینی ٹولیک ٹینک، توپ خانہ، گن شپ ہیلی کاپٹر و ڈرون آتیتون اوار شابیت لشکر کشی کننگ ءُ، و دا وخت اسکان یانزدہ بندغ کسفنگانو ہرافتیٹی بھازیک چُنا و نیاڑی ءُ۔
تدوکا اِرا ہفتہ غان زہری نا علاقہ سخت بندغی نیستی نا گواچی ءِ؛ کیہی ہند آک فوجی تا پلویڑ و کرفیو ٹی ءُ۔ شاری تا ہِن و بر و دارو درمان آتے اسکان ہِننگ بند ءِ، انجیرہ، نیچارہ، پندران، نورگامہ و کمبی نا ہندیک خوراک، دیر و اسپتال اسکان ہِننگ ئٹ بھاز سختی تیتون مون تننگ ءُ۔
زہری ٹی دا حالیت آتا بناء 11 اگست آ مس ہراتم بلوچ راجی آجوئی سنگر نا مزاحمت کار آک جھڑپ آتیان پد کیہی علاقہ تیا کنٹرول دوئی کریر۔ شار اِرا توہ اسکان مزاحمت کار آتا دوٹی مس، اوکان پد فوج ئنا آسمانی و زمینی کاروائیک بناء مسر ہراڑان ہزار آ شاریک پلویڑ و بھاز جانی نسخان نا بھیم ودی مس۔
فوجی کاروائی و پلویڑ آتیان پد زہری نا مخلوق بیرہ گیشتر تادی و بے باوری تون مون تننگ ءِ۔ طاغت نا کاریم ئٹ ہتنگ نہ ہنوک وخت ئٹ سیاسی اختلاف آتے ایسر کرینے و نہ داسہ داڑان بھلو وخت ئسے اسکان سلوک سوگوی ممکن ءِ۔ اگہ ریاست گواچن ئٹ ایمنی خوائک گڑا اودے توفک نا جاگہ غا ہیت و گپ، انصاف و سیاسی اواری نا کسر ءِ ہلوئی تمو، نہ گڑا زہری کون آ تدینیک بلوچستان نا دیہاڑ ئٹ اسہ پین المیہ اس جوڑ مریسہ سلور۔