ضلع اورکزئی ئٹ پاکستان لشکر نا ٹولی آ سلہہ بند بندغ آتا جلہو ئٹ فوج ئنا اِرا افسر تون اوار یانزدہ کارندہ مرگ ئنا گواچی، مُسہ کارندہ ٹپی و شش بیگواہ۔
پاکستانی فوج نا شعبہ تعلقات عامہ ( آئی ایس پی آر) دعویٰ کرینے کہ فورسز نا انٹیلیجنس نا بنداؤ آ ضلع اورکزئی ئٹ کاروائی کننگ نا وخت نوزدہ شدت پسند خلنگانو ہندن کرنل و میجر تون اوار یانزدہ کارندہ مرگ ئنا گواچی کننگار۔
چارشمبے پیشیم نا وخت راولپنڈی ئٹ آئی ایس پی آر آن شینک مروک بیان نا رد ئٹ ہفت و ہشت اکتوبر نا نیامیکو نن علاقہ ئٹ شدت پسند آتا ساڑی مننگ نا انٹیلیجنس نا حوال آ فورسز آپریشن کرے۔
بیان ئٹ دعویٰ کننگا کہ ” آپریشن نا وخت نوزدہ شدت پسند فورسز نا سم کاری آن خلنگار”۔
بیان ئٹ پین پاننگانے کہ ہڑتوما پارہ غاتیان ترند سم کاری ئٹ سی و نوہ سال ئنا لیفٹیننٹ کرنل جنید عارف و سی و سئے سال ئنا میجر طیب راحت تینا نو پین کارندہ تون اوار مرگ ئنا گواچی مسر۔ فوج ئنا ہڑتوم آ افسر آتا تعلق ضلع راولپنڈی آن ءِ۔
آئی ایس پی آر نا رد ئٹ ایلو نو کارندہ آتیٹ نائب صوبیدار اعظم گُل، نائیک عادل حسین، نائیک گُل امیر، لانس نائیک شیر خان، لانس نائیک طالش فراز، لانس نائیک ارشاد حسین، سپاہی طفیل خان، سپاہی عاقب علی و سپاہی محمد زاہد اوار ءُ۔