بلوچستان ئٹ زوراکی نا بیگواہی تا لڑ ئٹ اسہ وار دوارہ ودکی خننگ ئٹ بریسہ ءِ۔ ساڑی آ تدینی تیٹ کوئٹہ غان کیہی بندغ تے پاکستان لشکر دزگیر ئٹ کننگ آن گڈ بیگواہ کرینے۔
شابیتی حوال تا رد ئٹ، کیچ ئنا علاقہ سری کرکی تجابان آن تعلقداری تخوک آ دہ میکو جماعت نا خوانندہ عبداللہ ولد بائیان ءِ استو کوئٹہ غان او نا کمرہ غان پاکستانی لشکر دزگیر ئٹ کرے، ہراڑان گڈ او نا ہچو ڈس اس ملنگ اف۔
خاہوت والا تا رد ئٹ، عبداللہ نا دزگیری آن گڈ فورسز اونا دزگیرہ نا ہچو پک یا بیان اس تتنے۔
ایلو پارہ غان، کوئٹہ نا بلوچ کالونی جینٹ روڈ آن چار اکتوبر 2025 ئنا ننکان کم و ود سئے بجہ نا وخت ارشاد احمد سمالانی، تنویر احمد سمالانی و ظہیر احمد سمالانی ہرا مُسٹ ایلم و عزیز احمد سمالانی نا مارک ءُ، تے پاکستانی لشکر دزگیر کننگ آن گڈ بیگواہ کرے۔
ہموز دے اسہ پین ایلم نزیر احمد سمالانی ولد عزیز احمد سمالانی ءِ ہم شاہرگ کلی مینگل آباد آن پاکستانی لشکر ننکان نا وخت دزگیر کرے، ہراڑان گڈ اوہم دسکان بیگواہ ءِ۔
بلوچستان ئٹ زوراکی نا بیگواہی تا گیشتر مننگ نا تدینی تیا بندغی حق آتا تنظیم آک اسہ ڈول خلیس نا درشانی ءِ کریسہ کرینو۔ تنظیم آتا رد ئٹ خوانندہ و ورنا تا بیگواہ مننگ نا کیس آتیٹ ساڑی آ سال تیٹ ودکی مسونے۔