بلوچستان نا ضلع نوشکی ئٹ نادرست سلہہ بند بندغ آتا سم کاری آن اِرا پولیس کارندہ مرگ ئنا گواچی مسر۔ سم کاری نا تدینی غریب آباد نا علاقہ ئٹ مون آ بس۔
پولیس نا رد ئٹ کارندہ غاک ہڑدے نا گشت آ ئسر کہ موٹر سائیکل آ سوار نادرست جلہو کار آک اوفتیا سم کاری کریر، ہرا نا سوب اِرا کارندہ ہمو وخت مرگ ئنا گواچی مسر۔
کہوک آتا چاہنداری عبیداللہ ہند بٹو لانڈھی و عبدالرزاق ہند غریب آباد نا پن ئٹ مسونے۔
جلہو کار آک جلہو آن گڈ نرنگ ئٹ سرسہب مسر۔ پولیس کالخواہ تا پاننگ ءِ کہ تدینی نا پٹ و پول بناء کننگانے۔
اسلام آباد ئٹ ٹہوک تھنک ٹینک سینٹر فار ریسرچ اینڈ ٹیکنالوجی اسٹڈیز ( سی آر ایس ایس ) تدوک دے تیٹ پاریسُس کہ تدوک مُسہ توہ ئنا وخت سلہہ بند جلہو تیٹ ودکی و انسداد دہشت گردی نا کاروائی تیٹ ترندی نا سوب ملک ئٹ بیدادی نا تدینی تیٹ پاش ودکی مسونے۔
سینٹر فار ریسرچ اینڈ سیکورٹی اسٹڈیز نا مُسہ توہ ئی رپورٹ نا رد ئٹ تدوک مُسہ توہ ئی رپورٹ نا مون ٹی کہنگ آتیٹ 46٪ ودکی ریکارڈ کننگا۔
رپورٹ ئٹ پاننگا کہ 329 بے دادی نا تدینی تا سوب 901 کہنگ مسونے ہندن 599 بندغ ٹپی مسنو، ہرافتیٹ دہشت گردی نا جلہو و انسداد دہشت گردی نا کاروائیک اوار ءُ۔