بلوچ راجی آجوئی سنگر (براس) نا ترجمان بلوچ خان میڈیا غا شینک کروک بیان ئٹ پارینے کہ براس نا کنٹرول ئٹ خضدار نا علاقہ زہری ئٹ کوزہ گیر پاکستانی فوج لشکر کشی نا نیت ئٹ بس، ہرانا سوب آن ترند جھڑپ تا بنا مس۔ دا جھڑپ آتیٹ کوزہ گیر پاکستانی لشکر نا کیہی کارندہ غاک مرگ ئنا گواچی مسر ہندن بلوچ راجی آجوئی سنگر (براس) نا شش سرمچار وطن نا رکھ ئٹ شہادت دوئی کریر۔
او پارے کہ شہید انگا سنگت آتیٹ سنگت حافظ محمد عمر بلوچ و سنگت عبد العزیز بلوچ 26 ستمبر، و سنگت ثناءاللہ بلوچ، سنگت عبدالعزیز بلوچ، سنگت راشد احمد بلوچ و سنگت فیاض بلوچ 30 ستمبر آ شہید مسر۔
ترجمان پارے کہ شہید سنگت حافظ محمد عمر بلوچ عرف جانان ولد نوراللہ نا تعلقداری کوئٹہ غان ئس۔ او اِرا سال مالو بلوچ لبریشن آرمی تون تفوک مس۔ حافظ عمر بلوچ خواننگ نا وخت سیاسی شعور دوئی کرے و ریاستی ظلم نا برخلاف مزاحمت نا کسر ءِ تینا کرے۔ پدا بی ایل اے ئٹ اواری آن گڈ عسکری تربیت دوئی کرے و کیہی کاروائی تیٹ بھلنی نا کڑد ءِ سر تس۔ او تینا نظریاتی سوگوی، تنظیمی نظم و ضبط و وے خلوک طب نا سوب آن سنگت آتیٹی جتا ءُ ہند اس تخاکہ۔ او نا سوچ ئنا کچ اسہ آزاد، خودمختار و شرفدار بلوچستان نا ٹہفنگ ئس، ہراڑکن او تینا زند ءِ ندر کرے۔
او پارے کہ شہید سنگت عبدالعزیز بلوچ عرف کلیم اللہ ولد پیر محمد نا تعلقداری قلات نا علاقہ کھڈی آن ئس۔ او پنچ توہ مالو بلوچ لبریشن آرمی تون اوار مس۔ او نا عسکری سفر گؤنڈ مس، ولے او تینا ارادہ و جیرت ئٹ پاش کرے کہ آزادی نا جہد سن یا آزموندہ نا آئری اف۔ کلیم اللہ تینا سنگت آتیٹی جُوان ہیت کروک، اخلاق و پرعزم ورنا ئسے نا پن آن درست مسکہ، ہندن جنگ ئنا پڑ آ او دلیر، نظم و ضبط و بیدس معمولی ثابت قدمی نا مثیل جوڑ مس۔
ترجمان پارے کہ شہید سنگت ثناء اللہ بلوچ عرف بٹے خان ولد پیر ولی بھٹار نا تعلقداری زہری آن ئس۔ او چار توہ مالو بلوچ لبریشن آرمی ئٹ اوار مسونے۔ مچٹ وخت ئٹ تینا ذہانت، جوزہ و عسکری لائخی تیان اسہ ہند اس دوئی کرے۔ اسہ شاری گوریلا ئسے نا ڈول او تینا دژمن نا سُر پر ءِ ہُریسہ، حوال تروک آ نیٹورک و زمینی رکھ ئنا بے مٹ ءُ کڑد اس سر تس۔ تینا ایسری دم اسکان او تینا وطن نا رکھ ئکن دژمن تون دلیری ئٹ مون تس۔
او پارے کہ شہید سنگت عبدالعزیز بلوچ عرف محمد ابراہیم ولد عبد الحکیم نا تعلقداری ہم کھڈی، قلات آن ئس۔ او مزاحمتی سیاست نا بشخ اس ئس ہرا بلوچ ورنا تا تہٹی سیاسی شعور و راجی چاہنداری ودی کننگ کن ڈھکوک تنظیمی کاریم کرے۔ پدا بلوچ لبریشن آرمی ئٹ اوار مننگ آن پد او فیلڈ آپریشنز ئٹ فعال ءُ کڑد اس سر تس۔ او نظم، بردباری و نظریاتی استقامت نا مثیل اس سرپند مسوکہ، ہرا جہد ءُ فکری ءُ بنداو اس تس۔
ترجمان پارے کہ شہید سنگت راشد احمد زہری عرف جمال خان ولد محمد اشرف زہری نا تعلقداری نورگامہ زہری آن ئس۔ بیرہ نوزدہ سال نا عمر ئٹ تینکن آزادی نا کسر ءِ گچین کرے و مُسہ توہ مالو بلوچ لبریشن آرمی ٹی اوار مس۔ چنک سنی آن گڈ ہم تینا دلیری، و ارادہ آن دا پاش کرے کہ آزادی کن بے جاراتی ایمان نا چیدہ ءِ۔
او پارے کہ شہید سنگت فیاض جتک عرف شاہویز ولد فضل جتک نا تعلقداری زہری آن ئس۔ او برجاء سال جنوری ئٹ بلوچستان لبریشن فرنٹ ئٹ اوار مس۔ او نظم، چُپی و ثابت قدمی نا مثیل اس ئس، ہرا محاذ آ مدام ذمہ واری و قربانی نا درشانی کرے۔ اونا باور ئس کہ راجی آجوئی قربانی آن بیدس ممکن اف، و او تینا دتر ئٹ دا باور ءِ راست پاش کرے۔
ترجمان پارے کہ زہری نا دا جھڑپ آک بلوچستان ئٹ برجا مزاحمتی تحریک نا چرجوئی نا شاہدیک ءُ ہرا کوزہ گیر ریاست نا زوراکی آن گڈ ہم نزور متور بلکن ہرا شہیدی آن گڈ سوگو، نظریاتی وڑ آ سوگو مسونے۔ زہری نا شہید آتا دتر بلوچ راجی آجوئی نا جہد ئٹ اسہ پین خشت ئسے، ہرا تحریک ءِ پوسکن ءُ کسر، پوسکن ءُ است بڈی و پوسکن ءُ دیہاڑ اس تریسہ ءِ۔
او پارے کہ بلوچ راجی آجوئی سنگر (براس) دا وخت آ دا عہد نا درشانی ءِ کیک کہ غٹ سیوتی محاذ، بلوچ لبریشن آرمی، بلوچستان لبریشن فرنٹ، بلوچ ریپبلیکن گارڈز و سندھو دیش ریولوشنری آرمی ثانوی برخلافی تان بڑز مریسہ راجی آجوئی نا جہد ئٹ اوار مرور۔ براس نا سیوت نئے بیرہ عسکری محاذ بلکن سیاسی و تنظیمی تلہ غا ہم بلوچ راج ئنا اجتماعی و اسٹی نا چیدہ ءِ، ہرا دژمن نا تیوہ چم آتیان گڈ ہم برجاء مرو۔