بلوچستان نا علاقہ اوتھل ئٹ پاکستانی لشکر نا پارہ غان بس اتا مرغن پٹ و پول نا وخت اسہ ناجوڑ ءُ چنا اس وخت آ سر مفننگ نا سوب آن کسکونے۔
خن خنوک بندغ آتا رد ئٹ ننکان بنا مروک آ پٹ و پول سہب اسکان برجا مس، ہرا نا سوب کیہی سفر کروک آک گھنٹہ آتے اسکان گٹ ئسر۔
سفر کروک آتا رد ئٹ تدینی سئے شمبے و چار شمبے نا نن مون آ بس، ہراتم بلوچستان آن کراچی آ ہنوک آ کیہی بس آتے اوتھل چیک پوسٹ آ تورنگا۔
سفر کروک آتا پاننگ ءِ کہ بس نن ئنا سئے بجہ غا اوتھل ئٹ سر مسوسس، ولے فورسز کل ءِ بس آتے توریفے۔ پٹ و پول بھاز سستی ئٹ مریسہ ئس۔ سہب مننگ نا خڑک سما تما کہ اسہ بس اسیٹ اسہ چنا سے نا طب خراب مسونے۔ لمہ باوہ کمک خواہسہ کریر، ولے کس ئسے مونی ہننگ نا اجازت تننگتو۔
اوفتا پاننگ ءِ کہ اگہ فورسز آک سفر کروک آتے مونی ہننگ یا خڑک اسپتال آتے اسکام سر مننگ نا اجازت تسورہ گڑا چنا ءِ بچفنگ مسکہ۔
اوفتا پاننگ ئس کہ نن کل خواست کننگ ئسن کہ بس ءِ ہننگ ہلیر انتئے کہ چنا بے سار مسوسس۔ ولے ننے پاننگا کہ پٹ و پول ایسر مننگ اسکان اسہ گاڑی اس ہم ہمپرو۔ مچٹ آن پد چنا دم تِس۔
سفر کروک آتا پاننگ ءِ کہ اوتھل چیک پوسٹ آ بھاز وخت بس آتے گھنٹہ تا گھنٹہ تورنگ مریک، ہراڑان نئے بیرہ لس سفر کروک آک سختی تو مون تیرہ بلکن بھاز وخت، وخت آ ناجوڑ آتے اسپتال اسکان سر کننگ ہم مشکل مریک۔ دا اولیکو تدینی اف۔ سفر کروک آتے بھاز وخت ودار کروئی تمک۔ اگہ پٹ و پول المی ءِ گڑا دا نا اسہ وڑ اس مروئی ءِ تاکہ بندغی ساہ تے نسخان مف۔
بلوچستان نا جتا انگا ضلع آتیٹ پاکستانی لشکر نا پارہ غان پٹ و پولی پوسٹ آک ٹہفوک ءُ، واہم شاری تا پارہ غان وخت بے وخت پٹ و پول نا وڑ و ڈول تیا ہور ارفنگ خننگ ئٹ بریسہ کرینے۔ بندغی حق آتا تنظیم آک تدوک وخت ئٹ مرغن آ سیکورٹی پٹ و پول نا وخت شاری تا سختی تیتون مون تِس آ خلیس درشان کرینے۔