نوشت انتئے مرے؟
نوشتکار: کوہ زاد بلوچ
دی بلوچستان پوسٹ
راج ئسے نا حالیت نا بابت ئٹ معلوم کروئی مرے گڑا بندغ اوفتا ہمو وخت ئنا لکھوک آ نوشت آتے خوانک۔ دا خواننگ آن پد زند اس سرپند مریک کہ او وخت اسہ راج ئسے نا حالیت انت مسنے۔ آیا او دڑد، ویل و جنجال تون مون تریسہ مسنو یا شادکامی و خوشحالی تا مہر ئنا ہنین آ جھمر آتون ٹاکو خلیسہ بشخندہ تون اختہ مسنو۔ ہیت ءِ گونڈ کین گڑا دا راز پاش مریک کہ راج ئسے نا ادب اونا حالیت آتے پاش کیک۔ ہندا ڈول اوفتا دڑد، ویل و جنجال آتے ایسر کننگ نا کوشست کیک۔ تینا راج ئنا جوزہ و جیرت نا سوب مریک۔
نن جہان نا پڑ آ ہرن تو لیو ٹالسٹائی نا نوشتہ آک ننا مون آ تالان مریرہ ہرا نا نوشتہ آک ہمو وخت نا عظیم انگا روس نا فریشانی و ویل جنگ و امن نا زی آ لکھوک خوانندہ ئسے نا دو ئٹ رسینگرہ۔ ہندن پین کیہی مثیل آک ننا تارمہ انگا آسمان ئٹ استار ئسے نا مثیل ئٹ روشن نن ئنا مون آ پاش مریرہ ہرا ننے دا راز ءِ پہہ کیرہ کہ لکھوک ئسے نا مسخت انت مریک؟
ایلو پارہ غان، نن تینا ڈیہہ ئنا نوشتہ کار آ نظر اس شاغن گڑا کنا راج ئنا لکھوک وخت و حالیت نا خواست آن تینے بے چکار کریسہ تینا زات ئنا مفاد آتیکن لکھنگ نا کسر پٹسہ ءِ. کنا ڈغار نا شاعر نا لوز آک راج ئنا سوگوی نا سوب مننگ کن آخہ بلکن وخت ئنا ٹرینڈ نا بابت ئٹ شینک مریسہ کیرہ، تہو نا رُخ ہرانگ کہ مس کنا شاعر ہمو نیمہ غا لکھنگ نا کوشست اس کیک۔ تاکہ راج اودے واہ واہ کریسہ مرے، اونا پِن اس مرے۔ ہندا ڈول خلق ئٹ کچاری، بیٹھک و بازا ئسے ئٹ خواجہ ءِ سلام تریسہ مننگ مریک۔ ہیت ءِ گونڈ کین گڑا سرپدی مریک کہ کنا شاعر راج ئنا خواست آتا جاگہ غا لکھے، تینا پن کھٹنگ کن لکھسہ ءِ۔ ہندا ڈول ادب نا پڑ آ ایلو نوشتہ کار آتا ہم ہندا حالیت و نفسیات ءِ۔ کس اس اوفتیان سوج کے گڑا اوفتا ورندی ہندا مریک کہ
”ایلم، حالیت آک سخت ءُ سرکار مخلوق ءِ دریسہ و خلیسہ ءِ۔ ہراتم وخت و حالیت آک جوان مسر، گڑا نن تینا لکھوک آتے شینک کینہ۔“
دا نوشتہ کار آتے سرپنداری مفک کہ لکھوک ئسے نا مسخت راج ئسے نا سختی و سوری، دڑد و ویل و جنجال آتے ایسر کننگ نا مریک، یا گڑا ہمو ویل آتا ایسری کن اُلس ءِ پہہ کننگ و سرپنداری نا مریک نئے کہ حالیت آتا رد ئٹ تینا نوشتہ آتے ڈھکنگ و شینک کننگ نا۔
مون مستی، ای تینا ڈغار نا نوشتہ کروک آتا دیہاڑ و کڑد نا پٹ و پول ءِ کیو گڑا کنے سماء مریک کہ دا ہمو لکھوک آک ءُ ہرافک راج ئنا سختی تیٹ پہریز نا پن ئٹ لغوری و خلیس نا گواچی مسنو۔ ولے ہرا وخت و حالیت آک بلوچ جہد کار نا حق ئٹ مسنو گڑا دا خواجہ آک تینا ڈیہہ ئنا بوچ و بئے، مَش و تلار و راجی جہد ئنا حق ئٹ نوشتہ کننگ نا کوشست کرینو۔ تاکہ راج ئنا نیام ئٹ اوفتے لشکر واہ واہ کے۔
نما مون آ گڑاس کتاب آتا ٹائٹل ہرا شینک مسنو یا مرور دنکہ ’بھاز ہنین ءِ دتر نا‘، ’مِزل‘، ’اقبال نا شاہین‘، ’سی پیک‘، براہوئی اکیڈمی نا مرواریک، ننا ہیت ئنا راست مننگ ءِ راج نا مون آ پاش کیرہ و ڈغار نا ادیب نا نفسیات ءِ راج نا مون آ پاش کیرہ۔
گڈ سر ئٹ، تینا ادیب و لکھوک کن ہندا کلہو ءِ کہ او اگہ تینا قلم نا ہُلی ءِ دُودیفنگ خوارہ گڑا اوفتیا دا ڈغار نا ویل و جنجال دڑد و ماتم آتا درشان المی مریک۔ اوفتا قلم نا ہر لوز دا راج ئنا ڈکھ آتے جہان نا مون آ ہتنگ کن کوک کے۔ او بلوچ راج نا گچین آ سہب ئکن تینا راج نا جوزہ جوڑ و راہشون مریر۔ ولے دا سما مرے اگہ کنا ڈغار نا لکھوک تینا راج ئنا سختی و سوری تیٹ بھیم ئسے نا گواچی مریک، راج ءِ خرما تا مون آ تنیا یلہ کیک و اوفتا تربیت و جوزہ جوڑ مننگ کپک، اوفتے خلیس ئسے نا گواچی کیک، و وداری مریک کہ حالیت آک راجی جہد نا حق ئٹ مریر گڑا او تینا پن اسیکن قلم ءِ سُریفک گڑا اودے ہچو حق اس اف کہ او ڈغار نا شہید آتے نازیفہ دا ڈیہہ ئنا بوچ و بئے مَش و تلار تا پن ءِ تینا خلیس آن پُر انگا قلم ئٹ نوشتہ کے، ہچو حق اف!
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔