آشوبی آ عمر
نوشتکار: ابرار بلوچ
دی بلوچستان پوسٹ
ای ہرا وخت آ بھلا تا مجلس ئٹی تولیوہ۔ ای اوفتیان ہندا سوج کیوہ کہ نم بھلاک راجی آ جنز ئنا انتئے بشخ مفیرے؟ اگہ نم بھلاک جہد ئنا بشخ مریرے گڑا راجی آ جنز گچینی ئٹ مُستی کائک۔ او ہندا پارہ کہ نن تینا ورنائی ٹی بھاز گام خلکن داسا نم کونا ورنا تا وخت ءِ نم گام خلبو جہد ئٹی گڑا ای چُپ کیوہ۔
اسہ دے کالج ئٹی ہم ہندن کل سنگت آک تولوک ئسون۔ اسہ استاد اس بس ننا مجلس نا بشخ مس۔ ای اوڑان ہندا سوج کریٹ۔ ماسٹر صاحب نم انتئے بلوچ قوم نا جہد ئنا بشخ مفیرے؟ نم بھلاک اُرے بائدے نم جہد ئنا بشخ مبو۔ تانکہ ایلو لس مخلوق ہم جہد ئنا بشخ مرے۔ او ہم ہندا وڑ کنے پارے۔ داسا نما وخت ءِ نن تینا ورنائی ٹی جہد ئنا بشخ ئسون، نن بلوچ قوم اکن برانز کرینن، کیز ہم مسونن داسا نن بس کرین جہد کننگ ءِ۔
ای ہندا ٹَک خلکٹہ کہ نن ہم ہندن مرون کے اینو ننا ورنائی ءِ نن جہد ئنا بشخ اُن پگہ نن ہم سرکاری ءُ نوکری اس ہلکن نن ہم چُپ کرون تولون ہندا پارون کے نن تینا ورنائی ٹی جہد کرینن۔
ای کس ءِ پاتوٹہ تینتو تینٹ ٹک خلکٹہ و تینے آن سوج کریٹہ گڑا دیر دا جہد ءِ مزل اسکان سر کرو؟ اگہ کل بیرہ ورنائی ٹی جہد کریر؟ منہ دے آن گڈ ولدا اسہ بھلن عمر ئنا بندغ اسیتون مجلس مس۔ ای اودے پاریٹ ماما نم انتئے جہد ئنا بشخ مفیرے؟ اگے نم بھلاک جہد ئنا بشخ مسرے گُڑا دا بلوچستان نا اُلس کن جوانو کلہو ئسے کہ ہر بھلا بندغ جہد ئنا بشخ ءِ گڑا ہر بندغ جہد ئنا بشخ مریکک۔ او ہم ہندا ورندی تس۔ پائے ای جہد ئنا بشخ ئسوٹ نن کسر ءِ بند کرینہ تینا ورنائی ٹی لَٹ کنگنہ قوم اکن قیذ مسونن بلوچ قوم اکن داسا نم کونا ورنا تا وخت ءِ نم جہد کبو۔
گڑا ہندا ورندی کنے خورہ غان بار کنگکہ۔ ای ولدا ٹک خلکٹ نن ہم ہندن مرون گُڑا جہد امر مُستی کائک بیدس بھلا تیان۔ اسہ دے ای تینا اُست ئنا خڑک ءُ سنگت ئسے آن سوج کریسہ پاریٹ سنگت ننا بھلاک دا وڑ پارہ کہ نن مالو جہد ئنا بشخ ئسون داسا نما وخت ءِ۔ مگہ نن ہم ہندن مرون؟ تینا بروکا ورنا تے ہندا پارون کہ داسا نما وخت ءِ نن جہد کرین تینا ورنائی ٹی؟ او ساعت اس چُپ کرے، ولدا کنے پارے سنگت نی ہم عجیب ءُ ہیت کیسہ!
ای پاریٹ انتئے؟ او پائے بلوچستان نا مُست ئنا جہد کار آک مُسہ بشخ اٹ چانٹ مسر، ریاست نا ظلم و ستم آن گُڈ۔ او تینا ہیت ءِ ایسر کتوسس ای پاریٹ ہرا ہرا بشخ آ چانٹ مسنو؟ او پائے بلوچستان نا جہد کار آتیان ریاست گڑاس ءِ ہمے وخت آ شہید کرے، و گڑاس ءِ تا بے گواہ کرے ہرا دائسکان ریاست نا زندان تیٹی بندی ءُ ایلو گڑاس جہد کار آک مَش تیا ہنار او دائسکان جنگ کننگ ءُ۔ ہرا کہ دائسکان نئے بے گواہ مسنو نئے شہید مسنو نئے مَش تیا ہنانو۔
بے ادبی معاف
او خَسی مسونو۔
بیرہ ہنداڑے ہیت کیرہ کے نن تینا ورنائی ٹی جہد کرین اُن۔ داسا نما وخت ءِ۔ قوم اکن جہد ورنائی یا پیری، نرینہ، نیاڑی ءِ ہرپک بلکن قوم اکن چنا چنا نا جہد المی ءِ۔ گڑا ای ہندا سرپد مسوٹ کہ قوم اکن جہد بیرہ ورناک کپسہ۔ بلکن ہر بندغ کیک بلے کہ ورنا تا کڑد زیات مریک۔ ولے قوم ءِ ہر بندغ نا جہد ئنا بکار ءِ۔ بلے کہ نن پیر مرین ورنا مرین چُنا مرین یا نیاڑی مرین نن کن المی ءِ کے نن راجی آ جُنز ئنا بشخ مرین۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔