آپریشن ہیروف نا زہم آک – ٹی بی پی سرگپ
سی و یک جنوری اِرا ہزار بیست و شش آ آپریشن ہیروف نا بھلا و شابیت عسکری مہم آن پد بلوچستان نا حالیت آک مٹ مسنو و دا عسکری مہم نا بلوچ چاگڑد آ بھلو معاشی و سیاسی زہم تمنگ ءِ۔ ریاستی ادارہ غاک باقاعدہ پڑو کریسہ اشتماعی سزا نا پالیسی تے عملی دروشم تننگ نا درشانی کرینو و ہموڑے ایلو پارہ غان بلوچ راج دوست پارلیمانی جماعت آک ریاستی پالیسی تے بلوچستان و پاکستان نا زور ئنا سیالی نا ایسری نا پارہ غا گام خلنگ نا پِن تننگ ءُ۔
بلوچ لبریشن آرمی نا مٹ مروکا حکمت عملیک و جنگی لائخیک ہراڑے بلوچ چاگڑد ءِ زہمی کرینو، ہموڑے دانا زہم آک پاش مریسہ ءُ کہ بلوچستان ئٹ جہانی کان کنی نا ڈٹ بندی و پیشن ملکی سرمایہ کاری نا اقتصادی ڈٹ بندی تا برجاء مننگ نا نشان آک ہم کم مریسہ ءُ۔ چین پاکستان اقتصادی راہداری و چاغی ٹی کان کنی نا ڈٹ بندیک وختی آن بلوچ سلہہ بند ادارہ تا جلہو آتا پلویڑ ئٹی ءُ و داسہ آپریشن ہیروف آن پد امریکہ، سعودی عرب و ایلو ملک آک ہم بلوچستان ئٹ سرمایہ کاری آ دُرینگپسہ۔
بلوچستان نا اسمبلی ٹی مسلط کروکا وزیر اعلی سرفراز بگٹی نا جذباتی و اُست کٹہ غا ہیت آتیان پاش ءِ کہ اوفک ریاستی رٹ ئنا ہرا بیانیہ ءِ سال آتیان تالان کننگ ئسر، بلوچ لبریشن آرمی نا آپریشن ہیروف او بیانیہ نا گواچنی ءِ جہان نا مونا پاش کریسہ بلوچستان ئٹ ریاستی رٹ ءِ برجاء تخنگ نا زی آ سوالیہ نشان خلکنے۔ پاکستان نا ریاستی ادارہ تا پارہ غان بلوچ راہشون تا اُرا تے تراک ئٹ بھس کننگ، ہُشنگ و اوفتا لمہ باوہ غاتے زوراکی ئٹ بیگواہ کننگ کون آک گام تیٹ ریاستی ادارہ غاک تینا رٹ ءِ طاغت نا زور آ بحال کننگ نا بے سہب ءُ کوشست کننگ ءُ۔
پاکستان نا ریاستی ادارہ غاک اسہ بیانیہ ئسے جوڑ کریسر کہ بلوچستان نا گڑاس جذباتی ورنا ءُ ہرافتے ریڈیکلائز کننگانے۔ واہم آپریشن ہیروف ئٹ اوار انگا جند ندر و مزاحمت کار آتیٹ بلوچ چاگڑد نا جتا تپہ تیان ہر سن ئنا بندغ آتا اوار مننگ و صنفی برابریک ریاستی بیانیہ ءِ ایسر کرینو و جہان ءِ کلہو تسنو کہ دا جہد ئٹ ہلوکا فیصلہ غاک ریاستی پالیسی تا ردعمل افس بلکہ راجی آجوئی نا دوئی کننگ کن شعوری فیصلہ ءُ۔
آپریشن ہیروف نا عسکری مہم اسہ کثیر الجہتی تدینی ئسے، اونا اُرے اسکان زہم آک مرور و بلوچ چاگڑد نا ہر تپہ غا اونا سیاسی،معاشی و ادبی زہم آک تمور۔ دا عسکری مہم بلوچ جنگی دیہاڑ ئٹ اسہ اہم جنگ ئسے نا دروشم ئٹ اُرے اسکان یات تخنگو و دن انگا جنگی مہم آک بلوچستان نا بروکا وخت ئنا فیصلہ تیٹ فیصلہ کن مرور۔ آپریشن ہیروف کون آ عسکری مہم آک نہ بیرہ ساڑی آ جنگی حکمت عملی تیٹ بدلی نا سوب جوڑ مرور بلکہ بلوچ راجی آجوئی نا جہد ئنا مستین نا جنگی ندارہ ءِ مٹ کننگ ئٹ ہم بھلو کڑد اس سر ترور۔