لمہ حوری نا دڑد – ٹی بی پی سرگپ
لمہ حوری نا تیوہ زند ریاستی تادی نا سیخا ٹی تدینگانے۔ لمہ حوری و اونا خاہوت ہمو ہزار آ بلوچ باہوٹی تیتون اوار ئسر ہرافک 1973/1977 ئٹ ذوالفقار علی بھٹو نا حکومت ئٹ بلوچستان نا علاقہ کوہلو، کاہان و سبی ٹی خونی لشکر کشی نا وخت آ ریاستی تادی نا سوب تینا علاقہ تیان ہمپ و لڈ کریسہ افغانستان ئٹ کیہی سال تے اسکان ڈیہہ آن پیشن مسوسر۔ لمہ حوری نا خاہوت و مری قبیلہ پاکستان ئٹ ضیاء الحق نا فوجی آمریت آن پد نوزدہ سد و نود نا دہائی ٹی بلوچستان آ پدا بسر و کوئٹہ ٹی کوہ چلتن نا دامان ئٹ نیو کاہان ءِ آبات کریر و ہموڑے رہینگار۔
بیست و یکمی صدی ٹی بلوچ انسرجنسی نا بنا آن نیو کاہان نا ہندیک ریاستی زوراکی نا گواچی ءُ۔ بلوچ موکش خیربخش مری نا دزگیری تون اوار 11 جنوری اِرا ہزار آ نیو کاہان آن یک سد و پنجاہ آن زیات ہندی تے ہم دزگیر و زوراکی ئٹ بیگواہ کننگا۔ اِرا دہائی آن زیات گدرینگنگ آن پد ہم نیو کاہان نا ہندیک زوراکی ئٹ علاقہ بدری، اشتماعی سزا، ریاستی تادی، زوراکی نا بیگواہی و دزگیر ئٹ خون تیتون مون تننگ ءُ۔
لمہ حوری نا زند زوراکی نا علاقہ بدری، ریاستی تادی ءِ سگنگ و زوراکی نا بیگواہی تا برخلاف جہد آ تالان ءِ۔ انصاف نا پٹوک اماں حوری تینا پیری نا ٹیک ئنا آجوئی کن ریاستی در آتے ٹھکیفسہ کرے و تینا مار ئنا آجوئی نا امیت و ودار ئٹ گمان مفروک تکلیف سگسہ دا کوڑی آن موکل کرے۔ واہم، زوراکی نا بیگواہی تا برخلاف اونا پیر انگا توار دیہاڑ نا گیرام مفروک ءُ بشخ اس جوڑ مسنے۔
بلوچستان آن ہزار آ زوراکی ئٹ بیگواہ تیٹ لمہ حوری نا مار گل محمد مری ہم اوار ءِ، ہرادے اِرا ہزار دوانزدہ ئٹ زوراکی ئٹ بیگواہی نا گواچی کننگا۔ مار ئنا آجوئی کن لمہ حوری ہشتاد (80) سال نا سن ئٹ ہم پاکستان نا بنجاہ اسلام آباد ئٹ تولوک برانز و کوئٹہ ئٹ زوراکی نا بیگواہی تا برخلاف برانزی تحریک آتیٹ ساڑی مسنے۔ بلوچستان ئٹ ہزار آ لمہ غاک تینا مار تا آجوئی نا جہد ئنا ذمہ واری ءِ ارفینو و ریاست بلوچ لمہ آتا تکلیف ءِ ودفنگ کن زوراکی نا بیگواہی تا گواچنی آن ہی نمن مروک ءِ۔
بلوچستان ئٹ سد آ لمہ غاک ریاستی تادی و اشتماعی سزا نا پالیسی تا دڑد آتے سگنگ ءُ و لمہ حوری کون آ لمہ غاتا ہمت آن دا جہد برجاء ءِ۔ لمہ حوری تینا مار ئنا کیہی سال ودار کریسہ، اونا زوراکی نا بیگواہی نا دڑد ئتون دا کوڑی آن موکل کرینے۔ واہم، لمہ حوری کون آ لمہ غاتا دڑد اینو راج ئنا اشتماعی شعور نا بشخ جوڑ مسنے، ہرا بلوچ راج ئنا ریاست پاکستان تون سیالی ءِ نزور کریسہ کرو و دا اوار انگا راجی دڑد بلوچ سیاسی شعور ءِ ودفنگ نا سوب ہم مرو۔