کوئٹہ ہزار گنجی نا علاقہ ئٹ نادرست سلہہ بند بندغ تا سم کاری نا سوب چار بندغ مرگ ئنا گواچی مسنو، ہرافتا تعلقداری ہزارہ برادری آن پاننگسہ ءِ۔ تدینی آن گڈ علاقہ ئٹ بھیم تالان مس۔
حوالکار آتا رد ئٹ بندغ آک سبزی بہا کروک ئسر۔ ہرافتے نادرست بندغ آک ٹک کریر۔ حوال رسینگ تون پولیس و ایلو سیکیورٹی ادارہ غاک تدینی نا ہند آ سر مسر و جون آتے المی کاروائی کن ہسپتال آ سر کننگا۔
تدینی نا برخلاف ہزراہ برادری نا مخلوق ‘مغربی بائی پاس’ نا کسر ءِ ہن و بر کن بند کریر۔
برانزیک حکومت آن خواست کرینو کہ تدینی نا بشخ بندغ آتے دمدستی دز گیر کننگ و انصاف تننگے و برادری ءِ رکھ تننگ مرے۔
یاتی مرے کہ کوئٹہ ئٹ ہزارہ برادری تدوک آ وخت ئٹ ہم ٹارگٹ کلنگ نا کیہی تدینی تا گواچی مسونے، ہرانا سوب برادری ئٹ بے ایمنی نا احساس خننگ ئٹ بریک۔ ساڑی آ تدینی ہم ہندا لڑ ئنا بشخ اس پاننگسہ ءِ۔