بلوچستان و سندھ ئنا بنجائی شار کراچی ٹی ہار ئنا بھس کاری تیان بیدس بیگواہ غا بلوچ آتا خاہوت آک تینا برانز آتا لڑ ءِ برجاء تخانو۔
کراچی ٹی اِرا دے آن برجاء ہار بھس کاری کرینے، ہرانا سوب آن کاروباری زند سلوک ءِ۔ ولے کراچی ٹی بیگواہ غا بندغ آتا خاہوت آک قدرتی طوفان آتتون ہم مون تننگ ءُ و اینو ہم تینا بندغ آتا آجوئی کن کراچی پریس کلب نا مونا چار شمبے نا دے آن خلوک برانزی کیمپ ئٹی بسوسر۔
دا وختا کراچی نا علاقہ لیاری آن بیگواہ مروک شوکت بلوچ نا لُمہ اسہ وڈیو کلہو ئسے ٹی پارے کہ کنا مار بے ڈوہ ءِ۔ اودے زوراکی ئٹ بیگواہ کننگانے۔ ننکن کھٹیائی کروکو کس افک۔ او پارے کہ کنا مار ئنا بیگواہ مننگ آن گڈ نن سخت گڑتی ٹی اُن۔
بیگواہ شوکت نا لمّہ حکومت آن خواست کریسہ پارے کہ کنا مار ءِ زوت آجو کننگ مرے۔
کراچی ٹی بیگواہ مروک آتا خاہوت آک تینا بندغ آتا آجوئی نا خواست کریر۔ برانزیک ریاستی ادارہ آتا دو آن بلوچ آتا زوراکی نا بیگواہی تا برخلاف سخت نعرہ ہم خلکُر۔
کراچی پریس کلب نا پیشن آ بیگواہ مروک بندغ آتا خاہوت آتا برانزی کیمپ ءِ بلوچ یکجہتی کمیٹی نا مخ تفی ہم تُد ءِ۔ کیمپ ئنا موہکشی ءِ بلوچ یکجہتی کمیٹی کراچی نا آرگنائزر آمنہ بلوچ کرے۔ برانزی کیمپ ئٹی عبدالحمید زہری، سعید احمد، محمد عمران، شوکت بلوچ و نور بخش حبیب نا خاہوت آک ہم ساڑی ئسر۔
ایلو نیمہ غان بلوچستان نا بنجائی شار کوئٹہ ٹی ہم زوراکی نا بیگواہی تا برخلاف کاریم کروک تنظیم وائس فار بلوچ مِسنگ پرسنز نا برانزی کیمپ برجاء ئس ہرا ٹی بیگواہ غا بلوچ آتا خاہوت آک ہم اوار مسر ہرا بلوچستان نا مُر مُر ئنا علاقہ آ تیان بریرہ و کیمپ ئٹ اوار مریرہ۔
کیمپ ئٹ اوار مروک بیگواہ اخلاص نا لمّہ نور خاتون نا پاننگ ئس کہ کنا مار ءِ 8 تو مُست تربت آبسر ایف سی چیک پوسٹ آن پاکستانی فورسز آک بیگواہ کرینو۔
اونا پاننگ ئس کہ ای وام کریسہ کوئٹہ آ بسونُٹ تاکہ کس کنا داہ ءِ بنے و ای غٹ فکری تپہ آ تیان خواست کیوہ کہ او کنا مار ئنا آجوئی کن توار بڑز کیر۔
اندن بلوچستان نا ضلع پنجگور و حب چوکی نا جاگہی بیگواہ غیاث الدین نا مسڑ خدیجہ ہم کیمپ ئٹی اوار مریسہ تینا باوہ نا آجوئی نا خواست کرے۔
اونا پاننگ ئس کہ کنا باوہ غیاث الدین ءِ اکتوبر 2013 ٹی پاکستانی لشکر کراچی آن زوراکی ئٹ بیگواہ کرینے ہرا داسکان ہم بیگواہ ءِ و ننا چُنکی بیدس باوہ نا سیخا آن گدرینگ ءِ۔
اونا پاننگ ئس کہ نن باوہ نا مابت و سیخا آن پد تموک اُن، اگہ کنا باوہ آ دوبہ اس ارے تو اودے عدالت ئٹی ہتنگ مرے، ننے باوہ نا مابت نا مارشت ہم اف کہ او ننتون اخس مابت کیک انتئے کہ نن تینا باوہ ءِ دہ سال آن خنتنون، نن چُنک اسُن ہرا وخت ننا باوہ بیگواہ کننگاسس۔