ملیر نا علاقہ شاہ لطیف ٹاؤن ئٹ سئے شمبے نا نن اسہ گمانی پولیس مون تِس اسیٹ چار ورنا ءِ خلنگ نا دعویٰ مون آ بسونے۔ سندھ پولیس نا محکمہ سی ٹی ڈی دعویٰ کرینے کہ خلنگوک بندغ آتا تعلقداری بلوچ سلہہ بند تنظیم بلوچ لبریشن آرمی آن ئس و اوفک اسہ کاروائی ئسے نا نیام ئٹ خلنگار۔
ڈی آئی جی سی ٹی ڈی کیپٹن اظفر مہیسر نا رد ئٹ کاروائی دزگیر مروک دوبہ دار آتا شاہدی تننگ آ کننگا۔ اوفتا پاننگ ئس کہ ہراتم پولیس ٹیم اسہ اُرا ئسے آ سر مس گڑا اوڑے سم کاری ہڑتوم آ پارہ غان مس، ہرا نا سوب چار بندغ خلنگا ہندن اِرا پولیس کارندہ ٹپی مسر۔ پولیس نا رد ئٹ تدینی مروک ہند آن سلہہ و تراک کروک مواد ہم خننگانے۔
خلنگوک مُسہ بندغ نا چاہنداری جلیل ولد نور محمد، نیاز قادر ولد قادر بشخ و حمدان عرف حکیم ولد محمد علی نا پن تیٹ مسونے، ہندن اسہ بندغ ئسے نا چاہنداری دسکان مننگتنے۔
واہم تدینی آن دمدستی گڈ خاہوت پولیس نا ہیت آ شرہ کریسہ اودے رد پارے۔ اوفتا پاننگ ءِ کہ خلنگوک بندغ آک مالو آن بیگواہ ئسر و اوفتا یلہ کرفنگ کن عدالت آتیٹ درخواست ہم تننگانے۔
دا اولیکو وار اف کہ سی ٹی ڈی نا کاروائی تا سوال ارفنگانے۔ تدوک وخت ئٹ ہم بلوچستان و کراچی ئٹ گمانی مون تِس آتیان گڈ زوراکی ئٹ بیگواہی و عدالت آن چپ خون آتا دوبہ غاک مون آ بریسہ کرینو، ہرافتا پاش پٹ و پول ءِ کننگ نا خواست ءِ کننگانے۔