تنظیم سازی و تنظیم

 نوشت: بابل ملک بلوچ

دی بلوچستان پوسٹ

تنظیم نا معنہ، بندغ آتا یا گڑاتے جوان وڑ اٹ (منطقی ترتیب اٹ) شون تنگک۔ سیاسی جماعت آتیٹی، تنظیم سازی نا کمیٹی تا ڈھانچہ جوڑ کننگ، اختیار تننگ، و حکمت عملی جوڑ کننگ اوارو۔ سیاسی پارٹی تیٹی تنظیم سازی نا معنہ بناوٹ،  دروشم، بروکا وخت کن راہشون تیار کننگ، فیصلہ سازی نا عمل ءِ۔ پارٹی نا راہشون دانا حکمت عملی ءِ جوڑ کیک۔ پارٹی نا زانت کار آتا ٹولی (مرکزی کمیٹی) پارٹی ٹی مروکا کار کرد نا نگرانی کیک۔ او اہم ءُ فیصلہ کیک۔ پارٹی نا ممبر آک، سیاسی کارکرد اٹ اوار مننگ، و پارٹی نا گچین کاری ٹی ووٹ تننگ۔ علاقہ آتے ٹی پارٹی نا شاخ جوڑ کننگ، شیف سطح آن کمک کننگ و پارٹی ءِ منظم کننگ۔

پالیسی کمیٹیک پالیسی تننگ، اوفتے ہیت و گپ کننگ۔ پارٹی نا راہبند، اقدار و حکومت کننگ نا قانود آتا خاکہ یا نقشہ۔ ہراٹی مرکزی کمیٹی، صوبائی کونسل، تحصیل کونسل، ولدا یونٹ جماعت نا اوار ءُ۔ ہر اسٹ نا تینا طاقت و نزوریک مریرہ۔ ہرا پارٹی نا حمایت ءِ فعال تخنگ، پالیسی تیار کننگ، و الیکشن آتیٹی مقابلہ کننگ نا صلاحیت جوڑ کیرہ۔ تنظیم سازی کاریم تے باقاعدہ و منظم وڑاٹ کننگ نا عمل ئسے۔ ہراٹی مخلوق نا وسائل و کاریم تے اسہ خاص ءُ مقصد ئسے آ یکجاہ کیک۔ تنظیم سازی اسہ دنو عمل ئسے ہراٹی اسہ تنظیم، جماعت یا پارٹی نا تہہ ٹی موثر وڑ اٹ کاریم کروئی مریک۔ دا عمل تنظیم نا ڈھانچہ، راہشونی، و کاریم تا بشخ کننگ کروئی مریک تانکہ تنظیم تینا مقاصد آتے پورا کننگ کے۔

اسہ سیاسی پارٹی ٹی تنظیم سازی کن دا کاریم تے کروئی مریک۔ تنظیمی ڈھانچہ پارٹی کن اسہ واضح ءُ تنظیمی ڈھانچہ اس تیار کروئی مریک، ہراٹی جتا جتا انگا عہدہ و ذمہ واری تے ہتیرہ۔  رہنما اصول (راہشونی نا اصول)  پارٹی کن رہنما اصول و پالیسی جوڑ کروئی مریک۔ ہرا پارٹی نا مقصد و ٹارگٹ (اہداف) آتے گواچن اٹ بدل کیک۔

کاریم تا بشخ و بانٹ پارٹی نا راہشون و کارکن آتا نیامہ کاریم تا بشخ و بانٹ مریک،  تاکہ ہر اسٹ تینا ذمہ واری تے جوان وڑ اٹ کیر۔  تربیت و ترقی پارٹی نا سنگت آتے تربیت و ترقی نا موقع تننگ،  تانکہ اوفتا صلاحیت آک زیات مریر ، و پارٹی کن جوان کاریم کننگ کیر۔

سیاسی پارٹی تے ٹی تنظیم سازی نا معنہ دادے کہ پارٹی نا ورکر آتے و حمایتی تے جوانو وڑ اسیٹی سیاسی کاریم ہیل تننگ و پارٹی مضبوط کننگ۔ دانا سوب آن پارٹی تینا سیاسی مقصد آتے دوئی کننگ و مخلوق اٹ تینا کلہو ءِ سر کننگ اٹ سرسہب مریک۔ گواچن اٹ تنظیم سازی سیاسی پارٹی تا بنیاد مریک۔ ہرا دافتا قوت نا ذریعہ ارے۔ دا پارٹی تا مقصد و اہداف آتے دوئی کننگ کن سوگو ءُ ڈھانچہ اس ایتک۔

اسہ سیاسی جماعت نا تنظیم سازی کن دا گڑا تا مننگ المی ءِ۔ راہشون پارٹی نا بھلا، ہرا پارٹی نا پالیسی و فیصلہ غاتے کیک۔    مرکزی کمیٹی پارٹی نا زانت کار و عہدہ دار آتا اسہ کمیٹی اس، ہرا پارٹی نا پالیسی و فیصلہ غاتے جوڑ کیک و ترتیب ایتک۔ صوبائی او ضلعی تنظیم پارٹی نا صوبائی او ضلع نا تہہ ٹی تنظیم، ہرا پارٹی نا پروگرام آتے تہہ کریرہ۔

عہدہ دار پارٹی نا جتا جتا انگا عہدہ غاتے، جتا جتا ءُ بندغ مریرہ، ہرا پارٹی نا فیصلہ غاتے عمل کریفیرہ۔

ارکان پارٹی نا رکن، ہرا پارٹی نا پالیسی و پروگرام آتے مخلوق اسکان سر کیرہ۔ سیاسی پارٹی تیٹی تنظیم سازی یا تنظیم کاری نا اہم انگا مراحل آک دن مریرہ۔

یونٹ آتا جوڑ کننگ کل آن مست پارٹی جتا جتا انگا سطح یا یونٹ یا شاخ آتے جوڑ کیک۔ دنکہ ضلعی یونٹ، تحصیل یونٹ و یونین کونسل نا یونٹ، کارکن آتا ممبر سازی دا یونٹ آتے ٹی کاریم کروکا (فعال) کارکن آتے ممبر جوڑ کریرہ۔

تربیتی پروگرام کارکن آتے پارٹی نا نظریہ، تاریخ و سیاسی پروگرام آتا بارہ اٹ تربیت تنیگک۔ رابطہ کننگ مخلوق تون رابطہ جوڑ کننگ و اوفتا ویل آتے مر کننگ کن کاریم کننگ۔ الیکشن مہم ووٹ آتا وختا، ورک کننگ۔  تنظیم سازی نا اہمیت سیاسی پارٹی تیٹی تنظیم کاری نا اہمیت دا سوب آن ارے کہ  قوت/طاقت اٹ گیشتری اسہ منظم ءُ پارٹی سیٹی مخلوق تینا طاقت نا درشان ءِ کیک۔  پیغام رسائی / پیغام سر کننگ پارٹی تینا پیغام ءِ جوانو وڑ اسیٹ تینا مخلوق اسکان سر کیک۔ الیکشن ٹی سرسہبی ووٹ آتیٹی سرسہبی کن سوگو تنظیم کاری المی ءِ۔ مخلوق نا خذمت مخلوق نا خذمت کن جوانو وڑ اسیٹ خذمت کننگ کیک۔

قومی یکجہتی قومی یکجہتی ءِ فروغ ملیک۔ ہراٹی

 1-یونٹ آتا جوڑ کننگ اوفتا ذمہ واریک۔ یونٹ نا قسماک۔ ضلعی۔ تحصیل۔ یونین کونسل آن بیدس پارٹی ورکر آتا تعداد و علاقہ نا آبادی نا لحاظ اٹ پین ہم یونٹ جوڑ کننگ کیسہ۔ یونٹ آتا ذمہ واریک۔ کارکن آتا ممبر شپ کارڈ آتا جوڑ کننگ اوفتا تربیت مخلوق توں رابطہ  پارٹی نا فیصلہ غاتے عمل درآمد۔ الیکشن مہم چلیفنگ۔ یونٹ نا ساخت۔ ہر یونٹ ٹی صدر۔ سیکرٹری و ایلو عہدہ غاک مریرہ۔ ہرافتا ذمہ واریک مالو آن طے مریرہ۔

2- کارکن آتا تربیت۔ تربیت نا مقصد آک۔ کارکن آتے پارٹی نا نظریہ۔ تاریخ و سیاسی پروگرام آتیان آگاہ کننگ اوفتے تنظیمی نا چلیفنگ ءِ ہیل تننگ اوفتے مخلوق تون رابطہ کن تیار کننگ۔

تربیت نا طریقہ۔ ورکشاپ سیمینار کانفرنس و آن لائن کورس آتیٹی تربیت کننگ۔ تربیت نا سرحال آک، پارٹی نا نظریہ سیاسی معاشیات۔ تاریخ۔ خطابت۔ کمیونیکیشن و لیڈرشپ و پین پین

3. مخلوق تون رابطہ۔ مخلوق تون رابطہ نا طریقہ۔ اُرا اُرا غا ہننگ جلسہ جلوس ریلی و سماجی میڈیا مخلوق نا شکایات۔ مخلوق نا شکایت آتے جوانی اٹ بنینگک و دافتے حل کننگ نا کوشش مریک۔ مخلوق نا خذمت۔ مخلوق نا خذمت کن وڑ وڑ نا پروگرام کروئی مریک۔
4. الیکشن مہم۔ الیکشن مہم نا منصوبہ بندی۔ امیدوار آتا گچین کاری الیکشن نا منشور نا اعلان۔ پیسہ جمع کننگ و مہم کن وسیلہ جوڑ کننگ۔
5. تنظیم سازی نا مشکل آک۔ کارکن آتا کمی۔ جواننگا کارکن آتا کمی اسہ بھلو ویل اس مریک۔ پیسہ نا کمی۔ پارٹی ءِ پیسہ نا کمی ہم مریک۔ سیاسی مخالفین۔ سیاسی مخالفین آک پارٹی نا کاریم تے ٹی رکاوٹ مریرہ۔ مخلوق نا عدم دلچسپی۔ مخلوق نا سیاست اٹ عدم دلچسپی ہم بھلو ویل اسے۔
6. کامیاب تنظیم کاری کن ضروری گڑاک۔ مضبوط قیادت۔ اسہ مضبوط او باصلاحیت او قیادت مننگ ضروری ئے۔ کارکن آتا وفا داری۔ کارکن آتا پارٹی توں وفادار مننگ ہم المی ئے۔ مخلوق نا اعتماد۔مخلوق نا پارٹی ئے اعتماد ہم ضروری ئے۔  مالی وسائل۔ پارٹی کن پیسہ مننگ ہم ضروری ئے۔   موجودہ حالات آتا وڑاٹ فیصلہ۔  پارٹی ئے وخت توں اوار اوار تینا حکمت عملی تے ٹی تبدیلی اتوئی مریک۔    دا اسہ مکمل او جائزہ سے۔اسل سہی۔ اسہ سیاسی پارٹی نا کامیابی او ناکامی نا در او مدار تنظیم کاری ئے زیات مریک۔
   

   ---

   دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

انصاف نا خون – ٹی بی پی سرگپ

پاکستان سپریم کورٹ نا جسٹس اطہر من اللہ بیدس عدالت خون ءِ راہبند و بنداوی بندغی حق آتا ترند لتاڑ گوندسہ تربت ئٹ لمہ باوہ نا مونا حیات بلوچ ءِ کسفوک بلوچستان فرنٹیئر کور نا کارندہ شادی اللہ نا مرک ئنا سزا نا برخلاف تروکا خواست ءِ منتو۔ واہم سپریم کورٹ نا مُسہ باسکی بینچ دو یک نا رد ئٹ ودکی فیصلہ شینک کریسہ ڈوہدار نا مرک ئنا سزا ءِ عمر قید ئٹ بدل کرینے۔

کراچی یونیورسٹی نا خوانندہ حیات بلوچ ءِ 13 اگست 2020 آ تربت نا علاقہ آبسر ئٹ اونا لمہ باوہ نا مونا ایف سی کارندہ شادی اللہ ہشت سُم خلیسہ کسفیسس۔ حیات بلوچ نا بے ڈوہ آ خون بلوچستان ئٹ ترند السی ردعمل ودی کرے، ہرا ریاستی تادی نا برخلاف اسہ مزاحمت اس ودی کرے ہرا اینو ہم جتا دروشم آتیٹ برجاء ءِ۔ واہم السی مزاحمت و عدالتی فیصلہ تیان پر ہم بلوچستان ئٹ سیاسی باسک آک و زوراکی ئٹ بیگواہ بندغ آتا بیدس عدالت خون تا لڑ ایسر مننگ کتو۔

حیات بلوچ نا خون ءِ پنچ سال پورو مسنے، ولے دا سال تیٹ پولیس نا دروغ نا مونتس تا پِن آ سد آ بلوچ ورناک بیدس عدالت کسفنگانو۔ بلوچستان ئٹ ہر بھلا تدینی آن پد بلوچ ورنا تے کسفسہ اوفتا جونک بیابان تیٹ خسنگ نا عمل دائسکان برجاء ءِ۔ ریاستی بیدادی نا دن انگا تدینی تا برخلاف بش مروکا توار آک طاغت نا زور آ ایسر کننگسہ ءُ، اندن ایلو پارہ غان اندا علاقہ تیٹ ایمنی و دیمروی نا دعویٰ ہم مریسہ ءِ۔

بلوچستان ئٹ عدالت آتا فیصلہ غاک عملی دروشم ئٹ ہچبر نافذ متور۔ مقتدر طاغت آتا زور آ انصاف ءِ کسفسہ تینا فیصلہ تے الس آ مسلط کریسہ بسنے۔ زوتیٹ بلوچستان نا حالیت آتا بدل مننگ نا ہچو آثار خننگپک۔ واہم عدالتی انصاف نا مفننگ آن پد ہم حیات بلوچ و ایلو ورنا تیکن بلوچستان آن توار بش مریسہ کرو۔

نوشت انتئے مرے؟

نوشتکار: کوہ زاد بلوچ

دی بلوچستان پوسٹ

راج ئسے نا حالیت نا بابت ئٹ معلوم کروئی مرے گڑا بندغ اوفتا ہمو وخت ئنا لکھوک آ نوشت آتے خوانک۔ دا خواننگ آن پد زند اس سرپند مریک کہ او وخت اسہ راج ئسے نا حالیت انت مسنے۔ آیا او دڑد، ویل و جنجال تون مون تریسہ مسنو یا شادکامی و خوشحالی تا مہر ئنا ہنین آ جھمر آتون ٹاکو خلیسہ بشخندہ تون اختہ مسنو۔ ہیت ءِ گونڈ کین گڑا دا راز پاش مریک کہ راج ئسے نا ادب اونا حالیت آتے پاش کیک۔ ہندا ڈول اوفتا دڑد، ویل و جنجال آتے ایسر کننگ نا کوشست کیک۔ تینا راج ئنا جوزہ و جیرت نا سوب مریک۔

نن جہان نا پڑ آ ہرن تو لیو ٹالسٹائی نا نوشتہ آک ننا مون آ تالان مریرہ ہرا نا نوشتہ آک ہمو وخت نا عظیم انگا روس نا فریشانی و ویل جنگ و امن نا زی آ لکھوک خوانندہ ئسے نا دو ئٹ رسینگرہ۔ ہندن پین کیہی مثیل آک ننا تارمہ انگا آسمان ئٹ استار ئسے نا مثیل ئٹ روشن نن ئنا مون آ پاش مریرہ ہرا ننے دا راز ءِ پہہ کیرہ کہ لکھوک ئسے نا مسخت انت مریک؟

ایلو پارہ غان، نن تینا ڈیہہ ئنا نوشتہ کار آ نظر اس شاغن گڑا کنا راج ئنا لکھوک وخت و حالیت نا خواست آن تینے بے چکار کریسہ تینا زات ئنا مفاد آتیکن لکھنگ نا کسر پٹسہ ءِ. کنا ڈغار نا شاعر نا لوز آک راج ئنا سوگوی نا سوب مننگ کن آخہ بلکن وخت ئنا ٹرینڈ نا بابت ئٹ شینک مریسہ کیرہ، تہو نا رُخ ہرانگ کہ مس کنا شاعر ہمو نیمہ غا لکھنگ نا کوشست اس کیک۔ تاکہ راج اودے واہ واہ کریسہ مرے، اونا پِن اس مرے۔ ہندا ڈول خلق ئٹ کچاری، بیٹھک و بازا ئسے ئٹ خواجہ ءِ سلام تریسہ مننگ مریک۔ ہیت ءِ گونڈ کین گڑا سرپدی مریک کہ کنا شاعر راج ئنا خواست آتا جاگہ غا لکھے، تینا پن کھٹنگ کن لکھسہ ءِ۔ ہندا ڈول ادب نا پڑ آ ایلو نوشتہ کار آتا ہم ہندا حالیت و نفسیات ءِ۔ کس اس اوفتیان سوج کے گڑا اوفتا ورندی ہندا مریک کہ

”ایلم، حالیت آک سخت ءُ سرکار مخلوق ءِ دریسہ و خلیسہ ءِ۔ ہراتم وخت و حالیت آک جوان مسر، گڑا نن تینا لکھوک آتے شینک کینہ۔“

دا نوشتہ کار آتے سرپنداری مفک کہ لکھوک ئسے نا مسخت راج ئسے نا سختی و سوری، دڑد و ویل و جنجال آتے ایسر کننگ نا مریک، یا گڑا ہمو ویل آتا ایسری کن اُلس ءِ پہہ کننگ و سرپنداری نا مریک نئے کہ حالیت آتا رد ئٹ تینا نوشتہ آتے ڈھکنگ و شینک کننگ نا۔

مون مستی، ای تینا ڈغار نا نوشتہ کروک آتا دیہاڑ و کڑد نا پٹ و پول ءِ کیو گڑا کنے سماء مریک کہ دا ہمو لکھوک آک ءُ ہرافک راج ئنا سختی تیٹ پہریز نا پن ئٹ لغوری و خلیس نا گواچی مسنو۔ ولے ہرا وخت و حالیت آک بلوچ جہد کار نا حق ئٹ مسنو گڑا دا خواجہ آک تینا ڈیہہ ئنا بوچ و بئے، مَش و تلار و راجی جہد ئنا حق ئٹ نوشتہ کننگ نا کوشست کرینو۔ تاکہ راج ئنا نیام ئٹ اوفتے لشکر واہ واہ کے۔

نما مون آ گڑاس کتاب آتا ٹائٹل ہرا شینک مسنو یا مرور دنکہ ’بھاز ہنین ءِ دتر نا‘، ’مِزل‘، ’اقبال نا شاہین‘، ’سی پیک‘، براہوئی اکیڈمی نا مرواریک، ننا ہیت ئنا راست مننگ ءِ راج نا مون آ پاش کیرہ و ڈغار نا ادیب نا نفسیات ءِ راج نا مون آ پاش کیرہ۔

گڈ سر ئٹ، تینا ادیب و لکھوک کن ہندا کلہو ءِ کہ او اگہ تینا قلم نا ہُلی ءِ دُودیفنگ خوارہ گڑا اوفتیا دا ڈغار نا ویل و جنجال دڑد و ماتم آتا درشان المی مریک۔ اوفتا قلم نا ہر لوز دا راج ئنا ڈکھ آتے جہان نا مون آ ہتنگ کن کوک کے۔ او بلوچ راج نا گچین آ سہب ئکن تینا راج نا جوزہ جوڑ و راہشون مریر۔ ولے دا سما مرے اگہ کنا ڈغار نا لکھوک تینا راج ئنا سختی و سوری تیٹ بھیم ئسے نا گواچی مریک، راج ءِ خرما تا مون آ تنیا یلہ کیک و اوفتا تربیت و جوزہ جوڑ مننگ کپک، اوفتے خلیس ئسے نا گواچی کیک، و وداری مریک کہ حالیت آک راجی جہد نا حق ئٹ مریر گڑا او تینا پن اسیکن قلم ءِ سُریفک گڑا اودے ہچو حق اس اف کہ او ڈغار نا شہید آتے نازیفہ دا ڈیہہ ئنا بوچ و بئے مَش و تلار تا پن ءِ تینا خلیس آن پُر انگا قلم ئٹ نوشتہ کے، ہچو حق اف!

کسر شون

نوشتکار: جعفر قمبرانی

دی بلوچستان پوسٹ

بلوچستان نا گواچن آ کسر شون آک ہمود ءُ ہرا بلوچ راج ءِ مزاحمت، کاٹم بڑز و زوراک تون مون پہ مون سلنگ ہیل ایتر، نئے کہ ہرا بھیم تالان کیر، پارلیمنٹ آ دُزی کن دیر و جی ہئو، جی ہئو نا زند گدارینگ نا سبخ ءِ ایتر۔

دیہاڑ نا پنّہ غاتے چپی راستی کننگ آن گڈ بلوچ نا ہر چنا تینا راجی راہشون تے گچین کننگ ئٹ سرسہب مریسہ کرینے۔ اینو ہم نن سرپند اُن کہ ننا و تیوہ غا راج ئنا راہشون آک دیر ءُ۔

مثیل اسیکن میر عمر و میر بجار میرواڑی آن پد بلوچ راج میر نوری نصیر خان ءِ بلوچ راج نا ہیرو و موکش دا سوب آن امنا کیک کہ او بیرہ بلوچستان نا سیم آتے پک کتو بلکن تیوہ غا بلوچ راج ءِ اسٹ کریسہ اوار کننگ ئٹ سرسہب مس و تینا سیبو کن زغم ارفنگ نا پارت ہم تس۔

داکان بیدس، محراب خان شہید ءِ اینو اسکان بلوچ راج ئٹی اسہ گچینو پن اسیٹ یات کننگ نا سوب ہم ہندادے کہ او تینا لائخی نا کچ بلوچ راج ئنا رکھ و انگریز دژمن ءِ مڑنگ کن جنگ تس و تینا دتر ءِ وہیفنگ آن ہم چک و پد متو۔ راستی دادے کہ محراب خان شہید تینا ساہ ءِ تریسہ بلوچ راج ءِ مزاحمت و سیال ئنا خن تیٹی خن خلنگ نا کلہو تس و بلوچ راج ئٹی مزاحمتی دیہاڑ نا اولیکو خشت ءِ تخا۔

اوکان پد انت؟

ریاست قلات نا گڈیکو کالخواہ خان میر احمد یار خان ہم ہمو محراب شہید نا پدریچ ئسک ولے اینو تیوہ غا راج ئٹ اونا خلیس آن پُر و لپڑزہ انگا فیصلہ تا دو آن ہر لس بندغ ءِ اوڑان بد بریسہ ءِ انتئے؟ اسہ پوسکنو مسلمان ملک ئسے نا موکش بریک و اودے سنگتی یاری نا پن آ ریفسہ نزور کیک و اونا ریاست ( قلات) نا زی آ جلہو کیک ولے احمد یار خان تینا بلوچی دود آتے گیرام کریسہ جی ہئو کریسہ مزاحمت اسکان کننگ کپک۔ پک انگا ہیت دادے کہ احمد یار خان تینا باوہ پیرہ ئی آ دود ’مزاحمت‘ ءِ گیرام کرے گڑا اینو تیوہ غا راج اودے گیرام کرے۔ یخینن اینو کس اس اودے یات کپک اگہ کیک ہم تو مُرمٹیسہ۔

ایلو پارہ غان خان عبدالکریم خان اینو ہر بلوچ زنک ئنا است ئٹ زندہ ءِ انتئے کہ او مزاحمت کرے و زوراک نا مون آ سلیس۔ حق ءِ حق و دروغ ءِ دروغ پارے۔ غوث بخش بزنجو کہ بلوچستان ئٹ بھلو پن ئسے ولے اینو راج دوست آتا نغد آتا مون ٹی ءِ انتئے؟ دا سوب آن کہ او آزاتی نا جاگہ غا غلامی تون امنا کریسہ ریاست قلات نا آزاتی آخہ بلکن ’ون یونٹ‘ نا پِرغنگ کن جہد کرے۔ دن ہم تو مننگ کریکہ کہ او ہمو وخت ون یونٹ آخہ بلکن ریاست قلات نا الحاق و اواری نا برخلاف پڑوْ ءِ کریسہ راج ءِ اوار کروس۔ غوث بخش بزنجو ہم اینو بیرہ تینے آنبار انگا غلامی ءِ امنا کروک آتا نیام ئٹ زندہ ءِ بس! ننکہ او ہم ہنوکا لڑ ئنا بشخ ئسے۔

پاش انگا ہیت دادے کہ اینو بلوچ راج نا ہیرو احمد یار خان افک، بزنجو اف بلکن کریم خان ءِ، خیر بخش ءِ و سرلٹھ آن ہلیس سیاجی و شور آن ہلیس ہربوئی نا ٹُل ئٹی ہندی ورناک ءُ ہرافتا پن آ جیرت نا چیدہ غاک جوڑ مریرہ۔ ہرا تینٹ ہم مزاحمت کریر و مزاحمت نا کسر تیکن در ملار۔ پک انگا ہیت دادے کہ بلوچ مالو آن بار داسا ہم، بلکن داسا پین زیات، دا ہیت آن سرپند ءِ کہ بلوچ راج نا گواچن آ راہشون، موکش و ہیروک دیر ءُ۔

ہمو ہرا مزاحمت ہیل ایتک، مزاحمت لکھک و مزاحمت نا ہیت آتے کیک۔ ساڑی وخت ئٹ ہرن تو چارمیکو شیڈول آن پد بھاز انگا ادیب و شاعر آک تینا کڑد ءِ گیرام کریر، بھاز انگا سیاسی سنگت آک تینا مول مراد آتیان پد ہنار و بھاز انگا سنگت آک بھیم ئنا گواچی مریسہ نئے بیرہ تینٹ چُپ کریر بلکن لس مخلوق ءِ ہم چُپی پہریز نا پارت تریسہ راجی جہد آن پد و چک کننگ نا کوشست کننگ ٹی ءُ۔ داسا آخہ ولے بلوچ دیہاڑ ئٹ یخینن دن انگا خواجہ تا جاگہ اسہ ادیرہ ئسے آن بار بھاز تنک و چُنک مرو۔ دیہاڑ ہر ہیت ئنا پک انگا شاہدی ءِ پک ایتو۔ باور کیس کہ ہر ہمو سیاسی آ بندغ ہرا مزاحمت کیک چیئرمین زبیر آن بار مدام زندہ سلک۔ و ہر ہمو ادیب ہرا مزاحمت لکھک، چیئرمین غلام محمد آن بار مدام کندیل نا وڑ ئٹ روشن مریک۔ داڑیسکان کہ ہر ہمو لس بندغ ہرا مزاحمت نا ہیت کیک و بلوچ راج ئٹی اسہ چیدہ ئسے نا وڑ ئٹ مدام سوگو جِک سلوک مریک، مدام راج ئکن مثیل اس جوڑ مریک۔ مدام یات کننگک۔

ولے خن شیف، کاٹم لڑونج و عمل ئٹ چک و پد انگا ہر بندغ اسہ وار دا کوڑی آ جہان آن ہنا تو او اسلی کن ہنا۔ دن چا ودی متو۔ اینو ہُر کہ ننا اخس سیاسی بندغ، ادیب شاعر و استاد ماشٹر میر سڑدار و ازگار آک مدامی کہنگ کن زندہ ءُ کہ بروکا پدریچ آن پِٹ مِٹ جلیسہ تینا گڈیکو خاچوک جاہ (ادیرہ) ٹی جہی مننگ کن زند تدیفنگ ءُ۔ بروکا وخت تینٹ ننے آن سوج کرو کہ راج ءِ انت تسوس؟ پدریچ نا مون ءِ ارانگ ہڑساس و انتئے ہڑساس؟
دا ہیت ئٹ ہچو شک اس اف کہ بلوچ راج ئنا بھلا گرج مزاحمت ءِ و کل آن بھلا سبخ ہم ہندادے۔ داڑے زندہ ءُ گڑا بیرہ جک سلوک، خن تیٹی خن خلوک و سینہ کشوک آک، ایلو تیوہ غا راج ادیب، شاعر، سیاستدان، میر، سڑدار، مُلا زگری نمازی کل کہوک ءُ۔ سفا کہوک!