بساک نا چارمیکو کونسل سیشن – اواری نا پِڑؤ!
نوشتہ: جعفر قمبرانی
دی بلوچستان پوسٹ
سہب انا روشن آ اِستار، تہاری ٹی ٹمکوک آ جگنو ءِ بساک!
بساک سہب انا مستائی و مزل کن ہنوکا لاری ءِ۔
بساک پِن ءِ اواری و ایلمی نا!
بساک پن ءِ ہمو فکر فریشانی گل بالی تے بشخ و چانٹ کننگ نا ہرا تنیائی ٹی سگ آن پیشن مریرہ۔
بساک اسہ تنظیم اس اف، اسہ فکر ئسے۔
بساک اینو نا دڑد آتا درمان، درو نا یاتگیری تا ڈائری و پگہ نا گچین انگا کلہو ءِ۔
اکتوبر نا تُو اٹ بساک نا چارمیکو کونسل سیشن بیرہ بساک آخا کہ تیبہ بلوچستان و بلوچ اولس کن مہر، اوار یکجہتی و سہب مندی نا کلہو ئسے۔ دا ہڈ ہلوک آ کونسل سیشن دا گڑا نا شاہدی ءِ کہ بلوچ نا زنک آک اوار ءُ اواری ٹی اوفتا آخبت نا آسراتیک گنڈوک ءُ۔
بساک نا بروک آ کونسل سیشن بیرہ کابینہ بدلی نا پروگرام اف بلکن بلوچ راج ءِ اوار کننگ و تین پہ تین تون توڷ بش کننگ، تینا ڈکھ دڑد و خوشی تے خف تورِنگ و بنفِنگ نا اسہ موقع سے۔
بساک نا چارمیکو کونسل سیشن نا ہڈ ہلنگ و سیشن اسکان کابینہ نا جُنز کننگ بلوچ ورنا تا سرسہبی نا پڑو ءِ کہ تونسہ غان ہلیس کراچی و مکران و رخشان آن ہلیس زہری بلبل و ہربوئی نا ٹل اسکان کل اسٹ و اوار ان۔
بھلو بختاوری اس دا مس کہ نن ہم بلوچستان نا پِڑ آ بھلا تنظیم بلوچ اسٹوڈنٹس ایکشن کمیٹی ٹی تینا چنکا فورم ءِ اوار کرین و اینو نن ہم بلوچستان نا ہمو ورنا تیتون اوار ہم کوپہ ان ہراکہ تینا راج ڈیہہ و بولی تا ذمہ واری ارفیسا ہر ڈکھ و ویل ئٹی اسہ ایلو تون اوڑدہی کریسا دانگ اینگ چک و پد مفسا۔
بساک نا پن نا معنہ ءِ اگہ براہوئی ٹی ارن تو داوڑ ءِ کہ بلوچ راج نا ہمو بندغ آک ہرا خوانندہ ءُ، اوفتے اسہ جا کریسا عمل نا میدان اٹ دڑیفسا اوار و اسہ جا کننگ۔
اگہ نن پان کہ اینو بلوچ راج ءِ کل آن زیات خواست ءِ ہم تو اندا گڑا نا کہ راج ئنا کل خوانندہ غاک اسہ جا مریسا تینے، تینا دیہاڑ و بندغ مال مڈی و داڑسکان کہ تینا سیال و دژمن تے ہم پہہ مریر گڑا اوار مریسا تینا سرسہبی و سیال نا مِڑنگ و پدی کننگ کن گام گیچ کیر۔ اینو ضرورت ہم اندا گڑا نا ءِ کہ بلوچ تون بساک نا وڑو تلہ مرے و اندا تلہ غاتیا بلوچ نا زنک آک اوار و ہم کوپہ مریسا تینا سرسہبی و مِزل آ رسیفنگ کن سرہ مُسن مریسا ٹک خلیر۔
باور کیس، بختاوری ئسے کہ اینو پدی بساک نا دروشم اٹ کسس ارے کہ بلوچ راج ءِ اوار کیک۔ ہندا تو وخت ءِ اواری و ہم کوپہی نا۔ ہندا وخت ءِ کہ بلو راج اسِٹ مرے مستی گام خلیسا کائے۔
جنزان باتے سنگتاں
سرسہب مریرے شالہ!
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
