شہید جمشید ساتکزئی عرف حاجی رضوان، اسہ دلیر ءُ شاری گوریلا اس
نوشتکار: بارگ بلوچ
دی بلوچستان پوسٹ
بلوچ آجوئی نا دا جنگ اسہ گوریلا ءُ جنگ ئسے، انتئے کہ تینے آن طاغت ور آ فوج ئتو جنگ ئکن گوریلا جنگ المی ءِ انتئے کہ نی نزور اُس نا وس ہلپک گُڑا نی گوریلا جنگ کیسہ گوریلا ہمو جنگ ءِ سنگت آک پارہ کہ گوریلا ءِ تینا تہ سیخا ہم خمپ تاکہ نی اسہ طاغت ور ءُ فوج اس مریس اوکان مالو نے اول گوریلا جنگ کروئی ءِ تینا آجوئی کن۔ گوریلا جنگ ئنا اِرا بشخ ءُ اسٹ بریک مشی آ گوریلا ہرا گوریلا طریقہ ئٹ بریک دشمن ءِ خلیک پدا کائک تینا مش تیٹی وتاخ آ تینا گوریلا طریقہ ئٹ رہینگک ایلو گوریلا اربن گوریلا وار فیئر دا ہمو گوریلا ءِ ہرا سرکار نا نیام ئٹی ءِ اندن پار کہ شار ئٹی ءِ گُڑا سرکار ءِ دھک خلیک پدا سرکار نا نیام ئٹی مریک سرکار تپک تہ گوریلا اندا گِڑا ءِ پارہ کہ نی جنگ کر نے کس خمپ گُڑا بلوچ نا دا جنگ ئٹی شاری گوریلاک بے مثال ءُ دن ننا اسہ ترند ءُ شاری گوریلا اس پاننگک شہید مجید ثانی ہرا بے کچ گوریلا کاریم کریسس اندا شاری گوریلا تیٹی ای شہید سنگت جمشید ساتکزئی عرف حاجی رضوان جان نا بابت ہیت کروٹ۔
شہید سنگت جمشید ساتکزئی عرف رضوان جان تون کنا اوڑدئی ہمو وخت مس ہراتم ای پوسکن مش آ بننگ ئسٹ گڑا شہید شکیل ساتکزئی عرف زورین ننے دوئی کرے پدا مُستی روان مسون تو اسہ جاگہ ئسے آ ہنان گڑا ہموڑے ننے شہید زورین پارے نم انداڑے سلبو گڑاس مڈی ارے ای ہتیوہ تا بریوہ تو نن ہموڑے توسن گڑا مچٹ آن پد منہ سنگت بسر مڈی تے ہیسر، سلام دعا مس کنا اوڑدئی ہموڑے شہید رضوان تو مس اوکان پد نن مڈی تے ارفین مش ئنا کُنڈ روان مسون گڑا جاگہ ئسے آ سنگت آتے رسینگان وتاخ آ گڑا شہید زورین پدا ہِنا پدا منہ توہ مس آپریشن ہیروف نا جنگ آ ہنار سنگت آک پدا واپسی بسر گڑا شہید رضوان تُد ئس سنگت آتون ارٹمیکو اوڑدئی کنا انداڑے مس اوڑتون۔
شہید رضوان جان اسہ دلیر و تیز ءُ شاری گوریلا اس ئسک او پنچ سال شاری گوریلا کاریم کریسُس کیہی جاگہ غا دشمن ءِ تیز و ترند ءُ دھک خلکسس، سنگت دوئی کریسس، و مڈی سر کریسس سنگت آتے شہید شکیل زورین، شہید نعیم شاہد شہید جمشید رضوان اسہ جاہ شاری کاریم کریرہ شہید رضوان دلیر ءُ جنگجو اس ئسک او بھاز آ کاریم تیٹی بشخ شاغاسس او اسہ خوانندہ ءُ ورنا اس ئس شہید رضوان ہڑدے پاریکہ کہ کنا ہِچ اُست پاپک کہ راج ئنا ورنا اس برے مش تیٹی خوار مرے جنگ ظالم ءِ ننا ورنا تے خوار کرینے کنا اسُل اُست منیپک کہ راج ئنا چناک خوار مریر اوفتا خواننگ نا وخت ءِ پاکو نا سوب آن ءُ توفک حمیل بڈ آ مش تیٹی پیری کیرہ دشمن ءِ خلنگ کہ پٹیرہ تینا ایڑ لمہ آتا خڑینک آتا بدلہ ءِ ہلنگ کہ ہرا چُنا نا گوازی نا وخت ءِ ہرا نا دوٹی قلم مروئی ءِ سرکار نا سوب آن او سُم تے تو گوازی کیک و قلم نا جاگہ غا توفک ءِ ارفینے ہراد ءِ خوانوئی ئس اودے بیگ ئنا جاگہ غا فکری ءُ حمیل اس بڈ آٹے تہ۔
اونا اِرا کسہ ای کیوہ نم تون ورناک، اونا مُسہ سنگت ئسر سنگت شہید شاہ زیب، شہید صدام شہید و شکیل اوفتا ہننگ آن پد او چٹ کشکا پارے سنگت آک ہنار نن انت ئکن زندہ اُن سنگت نن ہم اوفتا فکر ءِ مون آ دین نوا نن ہم اوفتے تو اوار مرین ولے گواچن او تینا فرض ءِ ادا کرے تینا کڑدار ءِ راج ئنا مون آ تخا ہنا شہید جمشید ساتکزئی شہید شاہ زیب ساتکزئی تینتو بھاز کُڑمب ءُ سنگت ئسر او اسہ دے شار ئٹی استاد میر احمد نا شئیر خف توننگ ئسر کہ نظر تما چوخت چہرہ غا شہید جمشید نا اونا خن تے آن خڑینک آک تمارہ سنگت آن ہریفیٹ انت مس پھل پارے یار سنگت آک تینے ٹُکر کننگ ءُ ننکن نن داسکان غلامی کننگ اُن۔
شہید رضوان جان مسخرہ مذاق کروک سنگت اس ئس شہید رضوان ریل ئنا جنگ ئنا واری آ ڈرون جلہو ٹی ٹپی ہم مسوسس، نن ریل ئنا جنگ آ ہِننگ ئسن گڑا او مسخرہ کرے پارے کہ یار بارگ بس برام ئسے آ ہِننگ اُن اینو شام ہنام ءِ پگہ برام ءِ، جنگ آ ہِنان پدا بسن وتاخ آ ننکان ڈرون جلہو مس شہید رضوان انداڑے ٹپی مسک پدا مُستی سنگت آک پیشتمار گڑا ای اودے ہموڑے خناٹ اونا درمان مننگ ئس، شہید رضوان مسخرہ کرے مخیسہ پارے یار بارگ دا برام ننے آ تمتو نن برام آ ہِنان جَنیک ننے کُٹار برام تمتو ننے آ۔
شعر ئسے نا منہ بند ءُ شہید رضوان جان کن
ساتکزئی آ مڑد آتا کل نن کسہ ءِ چانہ
ولے نی اوفتا رہبر اُس رضوان نے پانہ
امر رندٹ ہِناس نی ودود ءُ شکیل شاہد نا
فکر ئتو نی شاہ زیب نا اریس اونا دیوانہ
ڈغاری ءِ نُم کونا مڑد آتا ضرورت ءِ یار
نُما فکر ءِ نن بڈ ہرفیسہ ہڑدے پند آ کانہ
منہ لوز ئٹی نی پیوند مفیسہ نا کڑدار
ننا لوز آتے ئٹ بیان مفک ولے نیکن لکھانہ
ولے یار بارگ ءِ ہوغفیر نا ہنینا یاداک
نا ہیت اُست آ بسُرہ تو نن ہڑدے ہوغانہ
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
