دروشم تا نیمروچ ئٹ جنگ ئنا سیخا
نوشتکار: برزکوہی | مٹ: گواڑخ
دی بلوچستان پوسٹ
دا عکس اگہ دیوال آ خلنگا، گڑا وخت سلو۔ اِرا زالبول ءُ، ہڑتوم آتا دروشم تیا چُھپی ءِ، ولے اسٹ نا چھپی ٹی مخنگ نا توار پِنک، و ایلو ٹی نظریہ کڈ مریک۔ اسٹ سلہہ ءِ شیف کرے، ایلو کاٹم ءِ بڑز کرے۔ سلہہ بِٹوک نا دروشم آ شکست نہ، اطاعت ءِ۔ او تینا خن تے شیف کرینے، دنکہ او توفک آن نہ بلکن ہمو تغ تیان ہم جتا مننگ ءِ ہرافک وخت اس اونا توفک تون اوار ڈغار آ لیٹارہ۔ اونا مونا ہچو دژمن اف، ہچو زمزیر اف، بیرہ پرمان ءِ۔ و پرمان نا منّنگ ئٹ ہرا دڑد ءِ، او ہمو سُم آن ہم بھاز زیات تکلیف تروک ءِ ہرا سینہ ءِ ہَریک۔ سلہہ ءِ شیف تخوکا مسڑ، ہرا وخت اس مَش تا ٹُل آ سلوک دژمن نا ہند آ پام کریکہ، اینو سلہہ تا مونا خن تے شیف کروک سلوک ءِ۔ توفک آک چر ئٹ تخوک ءُ، دنکہ اسہ نادرست جنگ ئسے آن پد جون آک ڈغار آ تالان کروک مریر۔ ہر سلہہ ئٹ اسہ کسہ اس مریک، اسہ سنگر اس، اسہ بارودی سرنگ اس، اسہ موڷ اس، اسہ باگل اس۔
اسٹ مزاحمت ءِ ہلا و ایلو قید ءِ مزاحمت ئٹ بدل کرے۔ مزاحمت ءِ یلہ کننگ ساندہ لغوری مفک، ولے دا ہچبر بے دڑد مفک۔ ہرا سلہہ تمک، اوڑتون اوار یات آک ہم تمرہ، و ہرافتا کوپہ تیا ہمو توفک آک تخنگارہ، اوفتا اُست آتیان باریم دڑنگپک، ودیک۔ و ہرا قید ئٹ مخیک، او تینا جون ئنا دڑد آن نمن مفک، او بیرہ ریاست نا زبان ءِ مات ایتک۔ او مخیک، ہرادے لس خنک خوشی تکرہ، گواچن ئٹ راستکی نا اسہ اندنو خنجر ئسے، ہرا نہ دتر ءِ وہفک، نہ چیہانٹ ءِ بنفک بلکہ سامراجی بیانیہ نا گُٹ ئٹی ہلیک۔
ہمو وخت ہراتم سلہہ تا چر ئنا مونا شیف مروکا خنک فیصلہ کننگ ئسر کہ پدی مننگ اڑزان ءِ، ہمو ساہت عدالت نا در آ ماہ رنگ نا خنک پڑو کننگ ئسر کہ مونی ہِننگ کن المی اف نا دوٹی توفک مرے، وخت وخت مخنگ ئٹی ہم سُم آن زیات بارود مریک۔ جنگ ئنا کسرک توفک ئٹ آخہ عقل ئٹ کٹنگرہ۔ عقل ہمودے ہرا ٹپ آ ملم تخپک، بلکن ٹپ ءِ آدینک جوڑ کیک۔
سلہہ ءِ ڈغار آ تخنگ اڑزان اف۔ دا بیرہ اسہ فوجی کاریم اس اف، دا اسہ فکری تدینی ئسے، ہراٹی جنگ کروک نا یادداشت، اونا کمٹمنٹ، اونا ضمیر غٹ اسہ ساہت اسیٹی بے لباس مریرہ۔ توفک نا نالی آن پیشتموکا سُم بلکہ دژمن ءِ خلیک، ولے توفک ءِ ہِلنگ تینٹ ہمو جہدکار نا تہٹی اسہ گڑا ئسے خلیک۔ اسہ روشنائی ئسے، اسہ اُست خواہی ئسے، اسہ پجار ئسے، ہر گڑا یخ تفک۔
ماہ رنگ نا بشخندہ اندا خاطران ترند توار ءِ انتیکہ او اسہ فیصلہ ئسے نا نتیجہ اف، بلکن چرجوئی ئٹ اسہ نمن ئسے نا شاہدی ءِ۔ ہمو مسڑ ہرا تینا مخنگ آتیٹ جیل ئنا دیوال تے ہکل کرے، او اسہ فاتح اس اف، نہ اسہ مجلس ئسے نا مہمان، او بس اسہ بندی ئسے ہرا مزاحمت نا فلسفہ ٹی تینا پجار ءِ کڈ مننگ ہلپک۔ او چائک کہ ریاست اودے جسمانی وڑئٹ پرغنگ کیک، ولے شعوری دروشم ئٹ فتح کننگ کپک۔
ہراڑے سلہہ بٹیسہ ءُ، اوڑے بیرہ توفک آک پرغنگسہ افس، بلکن اسہ تیوہ فکری شون اس دانگ اینگ مریسہ ءِ۔ دا بیرہ اسہ بندغ ئسے نا دم درینگنگ اف، دا ہمو تنظیمی ہورکی نا نشانی ءِ ہراڑے قیادت تینٹ تینا زبان ئٹ نظریہ ءِ بدل کیک، ہراڑے سیاسی عملداری مزاحمتی شعور آن جتا مریک، و ہراڑے مصالحت نمن آ زور تمک۔ مزاحمت نا زیبائی بیرہ سرسہبی ٹی اف، بلکن ہمو سوگوی ٹی ءِ ہرا بیدس اسہ امیت ئسے آن ہم زندہ مریک۔ ہمو دروشم ہرا عدالت ئٹ مخیک، او بیرہ بندغ اس اف بلکہ او اسہ تیوہ ءُ تحریک ئسے نا اخلاقی بڑزی نا چیدہ ءِ۔
ہمو ہرا سلہہ ءِ شیف کیک، بلکہ اودے دا باور تننگ مرے کہ توفک آن بیدس ہم جہد مننگ کیک۔ بلکہ او منّوک مرے کہ توفک داسہ کسر آخہ باریم اس جوڑ مسنے۔ بلکہ ہمو نَنک، ہرافتیٹی او شہید آتا جوْن تے ڈھکاکہ، داسہ تغ جوڑ مروک مریر، ہمو تغک ہرافتیٹی انقلاب چرینگاکہ، داسہ اسہ جلسہ ئسے نا تران جوڑ مروک مریر۔ ولے جنگ بیرہ سلہہ تا نہ، یادداشت آتا ہم مریک۔ و یادداشت آک ہچبر تنظیمی بیان آتیان ایسر مفسہ، او تو ٹپی آ بدن، بے دفن آ جون، و بیگواہ غا لمہ غاتا اُست آتیٹ مریرہ۔ ہراتم اسہ جہدکار اس سلہہ ءِ تخک، او بیرہ تینا دو تے ہورک کپک، بلکہ پد ئٹ ہمو جند ندر آتا زیبائی ءِ ہم ہلیک ہرا خل تیٹ ہم نظریہ ءِ تراشارہ، ہرا بارود آتا نیام ئٹ مہر بشخارہ، و ہرا جنگ ءِ پراد آخہ، تہذیب جوڑ کریرہ۔ اوفتا رند آک ایسر کننگ مفسہ، ولے اوفتیا دوارہ ہِنپننگ نا گچین کاری، تینٹ اسہ ٹپ ئسے ہرا بروکا زنک آتا چاہنداری آ شورانک اس مرو۔ قیادت نا ردیک، دم درینگنگ، و وخت ئنا زور تینا جاگہ غا ولے دا کل آتیان بھلا بھس کاری ہمو مریک ہراتم جنگ ءِ یات تخوک آک کم و گیرام کروک آک زیات مریر۔
ماہ رنگ نا ہمو مخنگ قید آن پیشتمنگ نا امیت آخہ، قید ءِ بے معنہ جوڑ کننگ نا پڑو ئسے۔ ہمو ساہت ہراتم ریاست اودے عدالت ئٹ ہتیک، او بیرہ تینا دروشم ءِ شان تفک، او تیوہ غا ریاست ءِ آدینک شان ایتک، ہراٹی او تینا ظلم ءِ تینا خن تیٹ خننگ آ بیوس مریک۔ و اسہ کوزہ گیر ریاست اس ہچبر تینے دا ڈول ئٹ اُننگ خواپک، ہراڑے توفک آک چھپ مریر، ولے بندیک ہیت کیر۔
تحریک نا روح ہمو راہشون تیٹ مفک ہرا مائیکرو فون نا مونا تولوک پالیسی تے خوانرہ، بلکہ ہمو دروشم تیٹ مریک ہرا عدالت ئٹ بیدس صفائی آن ہم راست مریرہ۔ شہید آتا زیبائی بیرہ داٹی اف کہ او کسکر، بلکہ داٹی ءِ کہ او نظریہ ئٹ کسکر۔ او بشخندہ کریسہ کسکر، او چھپ مریسہ کسکر، او جنگ کریسہ کسکر۔ و اوفتا کہنگ ءِ اگہ اینو نن فیصلہ تا ردئٹ بیرہ ہنوک وخت ئنا کسہ جوڑ کین، گڑا نن بیرہ اوفتا جون آتیتون نہ، بلکہ اوفتا تغ تیتون ہم غداری کرون۔
ہمو ہرا بشخندہ کرے، او ہچ پاش کتو۔ او بس ہچ اس ایسر مننگ ہلیتو۔ ہمو ہرا کاٹم ءِ شیف کرے، او ہچ اس کَٹفتو، ولے ہچ اس رکھنگ ہم کتو۔
دا راست ئسے کہ مزاحمت ساندہ اسہ دروشم اسیٹی مفک۔ وخت ئتون اوار کسرک مٹ مریرہ، ولے اگہ نظریہ نا دروشم ہر عکس ئٹ بیگانہ گمان مرے، گڑا ننے بیرہ دژمن آ آخہ، تینے آ ہم شک کروئی ءِ۔ ننے آن ہر ہمو بندغ ہرا دا ندارہ ءِ اُرک، او اسہ گواہ ئسے۔ نہ بیرہ ہمو سلہہ نا ہرا ڈغار آ تخنگا، بلکہ ہمو مخنگ نا ہم ہرا قید ئٹ ودی مریک۔ ہمو مخنگ فیصلہ بنفپک، نہ کس ئسے ڈوہدار پائک، او بیرہ یات تخک، و یات تخوک آتیان بھلو مزاحمت کار کس مفک۔
تحریک آک خلنگ ئٹ کسپسہ، او ہموتم کہیرہ ہراتم اوفتا مخنگ و ہوغنگ ہڑتوم آک بے سیاسی مریر۔ او ہموتم کہیرہ ہراتم توفک نا وزن ذہن آن زیات مرے، و فیصلہ غاک روح آن ہورک۔ ہمو وخت جنگ ایسر مفک، او بیرہ سلک۔ و ہرا جنگ سلیس ولے ایسر متو، او پدا ہچبر ٹاکو تیٹ ولدا بفک، بیرہ خسکہ تیٹ ودشت تا مریک۔
بلکہ راستی دادے کہ ہرا مخیک، ہمو ایسری سپاہی مریک۔ و ہرا چھپ مریک، او بلکہ ہر ہیت ءِ پاروک مریک۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
