زہری نا گواڑخ، بولان نا پھل، جالڑی نا دلبر
شہید وہاب، شہید سارنگ و شہید زاہد علی
نوشتہ کار: بارگ بلوچ
دی بلوچستان پوسٹ
بلوچ ورناک اسہ دور ئسے آن بلوچستان نا آجوئی کن جنگ کننگ ءُ ساہ تننگ ءُ دا جہد ءِ ہر سال ہر دے پوسکنو رنگ اس بشخرہ دھرتی آ مخیسہ ندر مریرہ اوفتا قربانی تے نن بیان کننگ کپنہ اندا ورنا تیٹی شہید سنگت وہاب زہری عرف دیدگ شہید سنگت زاہد علی عرف وشدل شہید سنگت رحیم خان مری عرف سارنگ ہم اوار ءُ۔ دھرتی آ ندر مروکا جہد ءِ پوسکنو رنگ اس تروکا شہید وشدل شہید دیدگ شہید سارنگ نا زی آ اینو منہ یاد لکھنگ خواؤٹ ہرافتے ای اوفتون گدارانٹ ہموفتے بیان کننگ خواوہ۔
مہر اسہ اندن ءُ گڑا سے ہرا ہر بندغ تو مننگ کیک ہر بندغ اسٹ ایلو کہ مہر کننگ کیک گڑاس اندن ءُ مہر مریرہ ہرا منہ وخت نا مریرہ گڑا اسہ مہر اس اندنو ارے ہرا بندغ نا ودی مننگ آن ہلیس بندغ نا کذیت آن پد ہم سلک او کہ ارے لُمہ نا مہر ءِ ہرا وخت بندغ ودی مریک لُمہ تو ودی مننگ تو تینا چُنا کہ مہر کیک پورا زند مہر کیک تینا چنا ءِ بھلن کیک تینا چنا کہ گڈیکو ساہ اسکان مہر کیک ساندہ تینا چنا نا خیر ءِ خوائک۔ اوکان پد مہر بریک لمہ وطن نا اسہ لُمہ ہمودے ہراد آن نن ودی مرینہ ایلو لُمہ ارے لُمہ وطن ہمو لُمہ وطن، نن ودی تو لُمہ نا پِڈ آن مرینہ ولے زندہ مننگ وطن آن ہیل کینہ ہمو لُمہ وطن ہرا نا نن چُنکی ٹی مِش تیتو گوازی کینہ ہمو لُمہ وطن ہرا نا نن سینہ ٹی تینے رکھوک تکنہ، اونا سینہ ٹی خاچنہ، ہمو لُمہ وطن ہرا ننے ہیل ایتک زند انت ئسے نی کنا دیر اُس، لُمہ وطن ہیل ایتک ننے نی کنا فرزند اُس، نی کنا چنا اُس، وطن تینا رخت بوچ آتا سیخا ٹی ننے جاگہ ایتک، ننے تینا کوہ و دمن ٹی لولی ایتک ہمو لُمہ وطن ہرا ننے تینا لمئی آ بولی ہیل ایتک ہرا ننے پوہ کیک کہ نم کنا وارث آک اُرے، ہمو لُمہ وطن ننے تینا سینہ ٹی جاگہ تیک، ولے ہرا وخت اودے دڑد اس مریک تو ننے توار ایتک انتئے کہ نن اودے تینا لمہ وطن تکنہ ایلو اودے تینا باغ و چمن منینہ گُڑا اینو ننا باغ و چمن ننا لمہ وطن ہُشنگنگ ءِ گڑا قرض و فرض ءِ لمہ وطن ءِ تینا ہُشنگ آن رکھن اندا اِرا مہر ءُ ہرا تیوہ زند ننتو اوار ءُ، اوکان پد مہر بریک مشی آ سنگت آتا ہرا اسٹ ایلو کہ بے کچ مہر کیرہ مہر اندنو گڑا ئسے ہرا مرگ اسکان نا اُستان ہنپک جہد کار آ سنگت آک لمئی ءُ مہر تیرہ ہر سنگت کوشست کیک ایلو سنگت ءِ لمئی مہر تیک اندا لمئی آ مہر ءِ ای شہید سنگت زاہد علی عرف وشدل تون خناٹ۔
کنے یاد ءِ درہ ءِ بولان آن منہ وخت مالو کنے سیل ئنا سنگت پارے کہ بر مش آ داسا خوائفوہ نے گڑا ای ہم تیار مسٹ کہ کاوہ سنگت آتا ای بسٹ شہید زورین دوئی کرے ننے نن اسہ نن ئسے نا پند ءِ خلکن گڑا ایلو دے سر مسن وتاخ آ، وتاخ ٹی شہید سنگت یاسر زہری عرف ماسٹر سفر خان، و شہید سنگت فدائی موہند عرف میرک ءِ ہم خناٹ سنگت آک مچھ شار ءِ کوزہ کننگ نا تیاری ٹی ئسر، تو ننے مُستی راہی کریر ایلو وتاخ آ تو شہید ماسٹر سفر خان ءِ ننے تسر پاریر تہ کہ ایلو وتاخ آ در تا گڑا شہید ماسٹر سفر خان ننے ایلو وتاخ آ درے سر کرے اسہ دے ننتو مس ایلو دے ماسٹر پدا مُست ئنا وتاخ آ ہنا، گڑا دا وتاخ ئٹ ای شہید سنگت زاہد علی عرف وشدل ءِ خناٹ شہید زاہد علی ءِ سنگت آک مہر ئٹ وڈّو پاریرہ گڑا اسہ دے نن ہموڑے مسن مُستی پدا پین وتاخ ئسے آ ہِنان ننتو شہید وڈو ئس ایلو شہید سنگت فدائی یاسر زہری عرف شاہویز بولانی ئس و منہ سنگت پین ئسر پوسکنو، شہید وڈو نا مہر آن کنے لمئی مہر نا گند لگاکہ ای نہ بلکہ ایلو کنتو پوسکنا سنگت آک پاریرہ ننے لُمئی مہر ایتک، شہید وڈو ہرا پوسکنا سنگت نا اندن خیال ءِ تخاکہ دن کہ لُمہ تینا ہفت سال ئنا چُنا نا خیال ءِ تخک، شہید وڈو پوسکنا سنگت ءِ بھلو اسُل پند خلفتویکہ پاریکہ کہ سنگت ڈکھی مریک انتئے کہ او شار آن داسا بسنے اوڑے او پند خلتنے اگہ ای داڑے اودے پند خلیفو تو و ڈکھی مریک منّنگ کیک پِنے، شہید وڈو نا مہر اکن نن سِکھنہ لمئی آ مہر ءِ کس استان دپک ای مرگ اسکان شہید وڈو جان نا مہر ءِ اُستان دروفٹ ای نہ بلکہ غٹ سنگت آک دا لمئی آ مہر ءِ اُستان دروفس دا کڑدار ءِ کس استان دپک، بلوچ نا بروکا نسل آتے اسکان چیدہ مرو، تارمہ غا کسر ئٹ شہید وڈو جان نا دتر نا پُڑی پین اندنو ورنا ودی کرو ہرا راج ئنا سپاہی تون لمئی ءُ مہر بشخور۔ ہمو وخت ئٹ نن پوسکن بسوسن تو ای اسہ دے شہید وڈو ءِ پاریٹ کہ ”یار بولان چٹ چُپ ءِ انتئے جنگ کپک ارا وخت کینہ جنگ اس کبو۔“ شہید وڈو مخیسہ پارے کہ ”بولان نا چُپی ٹی بھلو راز ئسے نی غم کپہ جنگ ئسے آ دینہ نے۔“
اوزدے ای سمجاٹ کہ پوسٹ اس مننگ کیک کوزہ کینہ پدا منہ وخت ہنا مچھ شار ءِ کوزہ کننگ نا وخت برابر مسس گُڑا سنگت آک پاریر کانبو کاریم ئسے آ ننا کمانڈر شہید وڈو ئس تو ہِنان کاریم آ سر مسن شام ئنا وخت مس کنے سما الو کہ مچھ کوزہ مریک ہموڑے اسہ سنگت اس پارے کہ ”اینو سرکار ءِ بھلو دھک اس لگیک اینو مچھ شار ءِ لشکر کوزہ کننگ ءِ فتح اسکواڈ، مجید برگیڈ و ایس ٹی او ایس انٹیلی جنس اوار دا کاریم ءِ کیرہ، جنگ ئنا بِنا ءِ مجید برگیڈ کیک۔“ نو بجہ بیست و چار منٹ آ تراک مس اسہ سنگت اس پارے کہ ”ٹرانسفارمر اس ترخا“ تو ایلو سنگت مخیسہ پارے کہ ”نہ مجید برگیڈ“، اونا دروشم آ گل و بالی درشان کننگ ئس۔
گُڑا پدا شہید وڈو آسک ننے آن مُستی ہِنار پین کاریم اسیٹ، شہید وڈو تو شہید فدائی پرویز دودا شہید یاسر شاہویز بولانی اوار ئسر اندا جنگ ئٹی شہید وڈو اسہ گشتی کماندار اس ئس، و لائخ تکڑا ءُ سنگت اس ئس۔ شہید وڈو مہر ئنا کتاب ئسے شہید وڈو مسخرہ ئٹ پاریکہ ای کتاب ئسے اُٹ کنے خوانبو، شہید وڈو گواچنی کتاب اس ئس، شہید وڈو کن کونا بھاز آتا استاد ءِ، دا جہد دا پند دا کسر ڈکھ آتا باروئٹ اسہ حوصلہ نا کتاب ئسے ہرادے خواننگ آن پد اینو ای دا جہد ئٹی گام خلیسہ اُٹ پند کریسہ اُٹ شہید آتا فکر ئتو روان اُٹ شہید وڈو پوسکنا سنگت ءِ اندن مہر تسکہ، ننے ہچ تینا خلق لمہ باوہ نا کمی محسوس متوکہ، شہید وڈو ننا جہد نا کسر ئٹ اسہ اندنو ڈیوا ئسے ہرا آجوئی اسکان رژنائی کرو، بروکا زنک آتے کسر نشان ترو، دا جہد ئٹی ننا تنخواہ مہر ءِ اسٹ ایلو سنگت ءِ مہر تینہ سنگت آک مسخرہ ہم کیرہ مخیرہ، دا گیاوان آ مش تیٹی ٹاکو خلیرہ، شہید وڈو پوسکنا سنگت نا انداخہ خیال ءِ تخاکہ، پوسکنا سنگت نا مونا مسخرہ مذاق بھاز کتویکہ۔
اسہ دے شہید کاشف عرف روکین شہید وہاب زہری عرف دیدگ اوار بسر منہ سنگت ءِ دوئی کننگ کن توسر سلام دعا مس چاہ کُنگر گڑا شہید وڈو شہید کاشف مسخرہ مذاق ءِ بِنا کریر تو شہید وڈیرا وڈو شہید کاشف مسخرہ ئٹ بانکُر کریر جنگ کریر تو شہید کاشف ءِ مسخرہ ئٹ کُٹا شہید وڈو گُڑا بس کریر، پدا شہید وڈو ننے آ کوک کرے پارے یار غصہ کپیرے نن مسخرہ کینہ دا اٹ دے نن دا سوب آن مسخرہ بھاز کتنن انتئے کہ مننگ کیک نم ننا ماحول آن بیزار آ بریرے ذہن ئٹی پین وڑو سوال ہرفرے مننگ کیک پِنرے اندا سوب آن مسخرہ کتنن ایہن نن بھاز مسخرہ مذاق کینہ۔
انداخہ شہید وڈو پوسکنا سنگت نا خیال ءِ کریکہ اندنو ماحول اس تسکہ پوسکنا سنگت ءِ محسوس متوکہ کہ تہ ای مش ٹی اُٹ اندا تکاکہ کہ ای شار ٹی اُٹ، اسہ سنگت اس مش آ بریک تو اونا نفسیات ءِ اول بندغ ہیل کیک گڑا ہمو حساب آ اوڑتو چلیک ہمو وڑا پوسکنا سنگت ءِ چلفیکہ، شہید وڈو تو دا تیوہ غا ہنر آک ئسر ہرا پوسکنا سنگت بسکہ، شہید وڈو اودے اونا نفسیات نا وڑ چلفیکہ، ای مش اٹ پوسکن بسٹ تو سخت بے واک ئسٹ یعنی کہ ای ہِچ کاریم ناس الوٹ، ہِچ کاریم کتوٹہ، دا کنا خامی ئس ای منیوہ ولے اندا کنا بے کاری ٹی بے واکی ٹی کنا کنے شہید وڈیرہ سنبھالانے، اینو ای شہید وڈو نا سدخہ اٹ داڑے تولوک اُٹ، شہید وڈو آن ای بھاز گِڑا ہیل کریٹ، شہید وڈو گواچن ئٹ اسہ فلسفی ءُ کتاب اس ئس، ای ہر شہید نا قربان مریو ہر سنگت نا نت تا مِش مریو ای پاوہ اینو ای مش اٹ سلوک اُٹ تو دا تیوہ قربانیک شہید وڈو نا ءُ، ای پاوہ پوسکنا سنگت بریک اونا ماحول ءِ جوڑنگ کے اونا ذہن ءِ برابر کننگ کہ اودے شہید وڈو ءِ ایت ، شہید وڈو بولان مکران کاہان ناگاہو نا محاذ تیٹ قوم اکن خذمت کرینے ہر سنگر اٹ دشمن نا خلاف جنگ کرینے۔
ایس ٹی او ایس نا سنگت شہید ناصر بولان نا محاز اٹ شہید مس شہید وڈو نا اِلّہ نا مار ئس، پاکستان نا ظلم وہ تادی بلوچ نا خلاف اسہ وخت ئسے آن برجا ءِ اندا تینا ظلم وہ تادی تو پاکو 2016 ٹی درہ ءِ بولان آ اسہ آپریشن ئسے نا بِنا کیک دا آپریشن ٹی تیوہ بولان نا کونہ غاتیا آپریشن مریک گُڑا دا آپریشن آن کیہی بلوچ آک باہوٹی جوڑ مریرہ، اندا آپریشن ٹی سنگت زاہد علی نا خلق آ آپریشن مریک سنگت زاہد آسک ہم بیوس مریسہ باہوٹی جوڑ مریرہ، داخہ ڈکھ دڑد غم آن پد بلوچ جنگ ئٹی شہید وڈو اوار مس تینا جان ءِ قربان کرے۔
اسہ سنگت اس کسہ کریکہ پارے کہ ”نن گشت ئسے آ ئسن تو بولان نا ہند جالڑی ٹی نن پاکو تو مون پہ مون مسن گڑا سم کاری بنا مس سرکار نا، کیہی سنگت آک ٹپی مسر گڑا گُڑا نن ہمو ہند آ پاسینگاسن گڑا شہید وڈو کنے مخیسہ پارے یار بس داسا آخر وخت ءِ جالڑی ٹی ودی مسن اینو پدا جالڑی ٹی قربان مرینہ کلمہ تے تینا خوان آخر وخت ءِ اینو تینا لمہ ہنکین جاڑلی ءِ خمب کیوہ۔“
شہید وڈو سخت مسخرہ کریکہ تینٹ سخت بھاز سگی ءُ سنگت اس ئس سگ نا سیم آک شہید وڈو آ چُٹرہ، شہید وڈو کڑد ئنا کتاب اس اس شہید وڈو ننا است ئٹ زندہ ءِ، ہر اسٹ نا است ئٹ زندہ ءِ، بلوچ راج ئنا دیہاڑ ئٹ زندہ ءِ، شہید وڈو جان نی تینت اسہ کتاب ئسے اُس نی چڑہ نوشتہ ئسے اُس نن انت لکھون نیکے وڈیرہ جان نا کڑدار ننا لوز آتا آئری اف، وڈیرہ جان نے دھرتی نا ہر اسہ بوچ سجدہ کیک۔
بلوچ ئنا دا جنگ ئٹ ہر کنڈ آن بلوچ آک قربانی تسنو مکران مرے یا کوہ سلیمان مرے یاکہ جھلاوان یا ساروان مرے ہر کنڈ آن بلوچستان نا ورناک قربانی تسنو۔ مکران آن واجہ غلام محمد، لالا منیر، بانُک کریمہ آستا کاروان ئس تو کاہان آن بابا خیر بخش مری بابا نا گچینا مڷ بالاچ نا کاروان ئس، یاکہ جھلاوان آن بابو نوروز خان شہید سفر خان زہری آستا کاروان ئس، اندا وڑ دا غُٹ اسہ جاہ آ سنگر ٹی سلیسرہ جنگ کریرہ اندا وڑ کاروان ہِنیسہ کرے، بس پوسکنا ورنا تا دوٹی جنرل اسلم نا کاروان مس، دا کاروان ٹی شہید ضیاء الرحمان عرف دلجان نا کاروان مس جھلاوان نا غُٹ آ باتی تے کسر نشان تس، دلجان پھل نا اندا وڑ کاروان مُستی ہِنیسہ کرے، شہید حژو نا دروشم ئٹ، شہید امیر جان نا وڑ ئٹ، شہید امتیاز نا وڑ ئٹ دا کاروان بریسہ کرے تو شہید سنگت فدائی یاسر زہری عرف شاہویز بولانی اسکان اندا کاروان ٹی پدا اسہ پوسکنو ورنا اس جنگ ءِ پین پوسکنو دروشم اس بشخا ہمو ورنا ارے دلجان نا کاروان آن شہید سنگت وہاب زہری عرف دیدگ اوار ئس۔
مچھ ئنا جنگ آن پد نن سفر اسیٹی ئسن تو اسہ جاہ لشکر مچ مس تو اندا لشکر ٹی کنا اوڑدئی شہید سنگت وہاب زہری عرف دیدگ تو مس سلام دعا مس گڑا مچھ ئنا جنگ ہم زوت ئٹ مسس گُڑا شہید دیدگ مسخرہ کریسہ پاریکہ ”یار جوان مس ہِنان مچھ ئنا شار ئٹی اسٹنگ اس تو کُنگن۔“ شہید دیدگ مسخرہ کروکو سنگت اس ئس گڑا کنتو چڑہ مسخرہ کریکہ پاریکہ ”ای نے خنانٹ اسہ سنگت ئسے نا عکس ءِ کنے نشان تسکہ پاریکہ دا نا ایلم ءِ۔“ کنتو مسخرہ کریکہ تنک کریکہ کنے، کنے چاوہ شار ئٹی خناسس چڑہ کنے پاریکہ فلان شہید نا خلق آ ہنانٹ فلان شہید نا خلق آ ہنانٹ گڑا ای پاریٹہ تہ قربان ای او جاگہ ناس افٹ۔
پدا منہ دے ہموڑے مسن اوکان پد ننا گشت پین کنڈ ئسے آ پیشتما گڑا منہ وخت ہموڑے ننے تدینگا، پدا نن پین وتاخ ئسے آ پیشتمان گڑا پدا کنا ارٹمیکو اوڑدئی شہید دیدگ تون ہموڑے مس، اسہ دے ہموڑے مسن ایلو دے پدا پین گراونڈ ئسے آ ہِنا شہید دیدگ شہید سگار ءِ بلوچ طارق تو اوار، پدا شہید دیدگ ءِ خنتون شہید دیدگ پین گراؤنڈ ئسے آ ہناس، ریل ئنا جنگ آن پد اسہ سنگت اس ننا وتاخ آ بس تو بلوچی دود ئنا ردئٹ سلام دعا مس چاہ کُنگر پدا ڈیھ ئنا حوال ہرفین گڑا ہمو سنگت پارے کہ مُسہ سنگت تربت ئٹ شہید مسنو، ایلو مسہ سنگت دکی ٹی شہید مسنو دکی والا سنگت آک شہید وہاب زہری عرف دیدگ، شہید زاہد علی عرف وشدل، شہید رحیم خان مری عرف سارنگ شہید مسنو، تو ہمو ہی وخت شہید آ سنگت آتا مہر مابت آک کنا ذہن ئٹی سُرار شہید دیدگ نا ہمو مخوکا چہرہ نظر ئٹ بس، شہید وڈو نا ہمو ہنینا ہیت آک اُست آ سُرار، شہید سارنگ نا مہروانیک بہادریک قربانیک ہمت جوزہ غاک دماغ ئٹ پیری کریر، سنگت وہاب دکی نا ریجنل کمانڈر ئسک، سنگت وہاب اسہ خواری کش ءُ سنگت اس ئس، شہید دیدگ ہرا وخت آ زہری ٹی ودی مس تو قول کرار دھرتی تو مس کہ اے کنا لمہ وطن ای نے آ ندر مروٹ، زہری آن ہلیس بولان، بولان آن ہلیس دکی اِسکان تینا راجی فرض ءِ ادا کریسہ آخر شہید دیدگ تینا قرض فرض ءِ ادا کرے دھرتی آ ندر مس دا جہد دا تحریک ءِ ننے امانت تس اینو اسکان بولان نا سنگت آک وہاب آ ناز ئٹی ءُ، بولان نا تہو ٹی گچینو توار اس بریک دیدگ جان نا، دکی نا گواڑخ آتے دتر تس۔ وہاب جان پدا بریک، ہر اسٹ ئٹ وہاب جان زندہ ءِ۔
بلوچ ئنا دا جنگ ئٹی قربانیک چٹ اسل لازوال ءُ، پاکستان نا فوج بھاز ظلم و تادی کرینے کسس پیشن ملک آ ہنانے کسس، انداڑے ظلم تو مون تسنے، کسس تینا خلق آن بے وارث مسنے تو دا جنگ ئٹی اسہ جنگ زدہ ءُ ماحول ئسے آن پیشتموکو ورنا ئسے نا منہ یاد نمکہ فاش کیوہ بلکہ اونا کڑدار نما مون آن فاش ءِ ای اندا اونا کڑدار ءِ بیان کروٹ اسہ جاگہ ئسے آ شعر اسیٹی عیسٰی نادان پائک کہ ”کڑدار نما فاش ءِ امر پا نن پردہ ٹی شاغن“ ای اینو اسہ بولان نا غم خنوکو ڈکھ آتیان تدوکو ورنا ئسے بیان کیوہ او ورنا کہ ارے شہید سنگت رحیم خان مری عرف سارنگ ءِ۔
نومبر نا تُو ئٹی منہ سنگت ناگاہو آن بولان آ بسر گڑا ہمو سنگت آتیٹی کنا اوڑدئی شہید رحیم خان مری عرف سارنگ تو مس، شہید سارنگ نا سنگت آک کسہ کریرہ پاریرہ کہ اسہ دلیر ءُ جنگجو ئسے بھاز آ جنگ آتیٹی بشخ ہلکنے۔ شہید سارنگ اسہ گشتی کمانڈ اس ئس، شہید سارنگ نا بھلو وخت ئسے آن خلقی آ بندغ آک مزاحمت کننگ ءُ۔ اِرا ہزار بیست و سئے نا آخری تُو تیٹی سرکار آپریشن اس کیک اِرا سنگت مون پہ مون دشمن تو جنگ ئٹی شہید مریرہ ہمو سنگت آتان اسہ سنگت اس شہید سارنگ نا ایلم ءِ و سنگت شہید غنی عرف حسن روکی ءِ اسہ سنگت اس کسہ کریسہ پارے کہ ”اِرا ہزار بیست و یک ئٹی ہراتم شہید ناصر آستا آپریشن کیک سرکار گڑا شہید سارنگ ہم ہنداڑے وتاخ ئٹ مریک انداڑے اسہ پٹھان فوجی اس شہید سارنگ ءِ چُنک خنک گڑا کوک کیک پائک تا توفک ءِ نے بِٹ خلپنہ نے گڑا شہید سارنگ تینا بہادری ئٹ منہ سُم خلیک بس تینکہ سنگر اس ہلیک جنگ ایتک پدا تینے گھیرہ غان کشک۔“
شہید سارنگ چُنکی آن توفک ہرفینے جنگ کننگ ءِ، شہید سارنگ دلیر و بہادر ءُ جنگجو اس ئس، بولان ئٹی ماروڑ نا جنگ آ بشخ ہلوک مریک، باز آ جنگ آتیٹی بشخ ہلکنے و بہادری و مخلصی ئٹ جنگ کرینے شہید سارنگ نا ڈکھ مخلصی نا ہر اسہ سرمچار گواہی ایتک، بولان تینا فرزند نا تینٹ گواہ ءِ کے اودے ای جنگی ءُ لولی بِنفینٹ، بولان تینٹ شہید سارنگ آ ناز کننگ ءِ، بولان آن ہلیس ناگاہو، ناگاہو آن ہلیس دکی اسکان ہر ہر اسہ بوچ ہر ہر اسہ خل نا بہادری، مخلصی، خواری، ڈکھ و قربانی تا گواہی ایترہ، دا ہمو ورناک ءُ ہرا ودی مریرہ جنگ ئنا توار بمب بارود آتیٹی رُدیرہ، ہرا چنکی آن سُم تے گوازی کیرہ، ہرا مخیسہ تینا خلق خاہوت کل ءِ مخیسہ قربان کیرہ، ہرا تینا بروکا ایلم سنگت چناتے جنگ ئنا کنڈ آ گامزن کیرہ۔
یاراک دلبراک سنگت آک ننا خنتا دیدہ غاک
وہاب جان زاہد علی رحیم کسر نا چیدہ غاک
نُمے آ ناز کننگو زہری بولان جاڑلی نا پھلاک
نوروز اسلم بالاچ مری نا نم اریرے قصہ غاک
نما دا مخلصی جہد پند ڈکھ آتے شہید آک
جہان ءِ حیران سوچ ئٹی ہبکہ ءُ بندہ غاک
خڑینکی آ ڈیھ ئنا امید ارمان اُرے یاراک
باز اوغار ننا ایڑاک امبلاتے کہ نم مودہ غاک
بارگ ءِ کسر نشان تسورے بنگل آ ورناک
بارگ نا نم خنکرے اریرے نم کنا اُزبہ غاک
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
