برجا سال بیست و ہفت جنوری 2026 آ پاکستانی لشکر زاہد بارکزئی نا دزگیری ءِ پاش کرے۔

اینو کراچی ئٹ رینجرز و سی ٹی ڈی دعویٰ کرینو کہ کراچی ئٹ کاروائی نا وخت خوانندہ غاتے بچ تروک مُسہ دہشت گرد ءِ دزگیر کننگانے۔

دعویٰ نا رد ئٹ، کراچی نا علاقہ کورنگی، چکرا گوٹھ ئٹ رینجرز و سی ٹی ڈی کاروائی نا وخت مُسہ کمک کار آتے دزگیر کرے۔

فورسز نا رد ئٹ، دوبہ دار آتا کوزہ غان لیپ ٹاپ، پنچ کلو بارودی مواد، ڈیٹونیٹر دہ میٹر پرائما کارڈ و اسہ کلو اس بال بیئرنگ خننگانو۔ دوبہ دار آک کالج و جامعات نا خوانندہ غاتا ذہن سازی ءِ کریرہ۔

دعویٰ کننگا کہ دوبہ دار آک حساس انگا ہند آتیا گمانی دہشت گردی نا ڈٹ بندی کریسر و اوفتا کوزہ غان انتہا پسندی آ تالان 250 کتاب ہم خننگا۔ دزگیر دوبہ دار آتیٹ یاسر عرفات، خدا بخش و زاہد عرف بارکزئی اوار ءُ۔

یاتی مرے کہ زاہد بارک زئی ءِ بیست و ہفت جنوری نا نن کم و ود دو آن دو نیم اسکان نا وخت سادہ پُچ آتیٹ مروک پاکستانی ڈھکوک ادارہ و فورسز نا کارندہ غاک اُرا غان دزگیر کریسہ نادرست ہند آ سر کننگاسس۔

یاتی مرے کہ دا تدینی بلوچ زوراکی ئٹ بیگواہی نا ڈرامائی دزگیری، عدالت آن چپ خون و دروغ تون مون تِس مقابلہ آتیان بار انگا تدینی تا اسہ پین مثیال ئسے۔

بندی تا بدلی نا سلاہ آ بی ایل اے نا وخت آن داسا بیرہ شش دے بچانو۔

بلوچ لبریشن آرمی نا رد ئٹ برجا سال ضلع خضدار نا علاقہ اورناخ ئٹ مون تِس آتا وخت بندی مروک ہفت پاکستانی فوجی کارندہ غاتا یلئی و بندی نا بدلی نا سلاہ نا وخت آن پین شش دے بچانو۔

بی ایل اے تینا میڈیا چینل “ہکل” آ پاکستانی فوج نا بندی مروک سپاہی محمد شہرام ولد محمد ریاض علی ہند شیخ پورہ، علاقہ امیر سنگھ پنجاب نا ویڈیو ءِ شینک کرے، ہراٹی پاکستان ءِ بندی تا بدلی کن پین شش نا وخت تننگانے۔

شینک کروک ویڈیو ٹی پن کروک کارندہ تینا پجار، علاقہ و رینک ءِ پاریسہ ءِ، ہندن دا وخت او نا دو ئٹ پاکستانی فوج نا سروس کارڈ و ایلو دستاویز آک ہم نشان تننگ مننگ ءُ۔

بی ایل اے درو اسہ بیان اسیٹی بندی کروک کل پاکستانی لشکر نا کارندہ غاتا عکس و شابیتی حوال آتے شینک کریسہ پاریسس کہ آپریشن ہیروف ٹو ئنا وخت پاکستانی فوج نا ہفتدہ کارندہ غاتے بندی کننگا، ہرافتیٹی دہ کارندہ غاتے بلوچ و ہندی پولیس و لیویز آن تعلقداری تخنگ نا سوب تڑی تریسہ یلہ کنگانے۔

ترجمان نا رد ئٹ ایلو ہفت کارندہ، ہرا کوزہ گیر پاکستانی لشکر نا ریگولر یونٹ آن تعلقداری تخارہ، بی ایل اے نا بندی ءُ، اوفتا برخلاف بلوچ راجی عدالت ئٹ باقاعدہ سماعت مس، ہراٹی اوفتا جنگی جرائم، شاری آبادی نا برخلاف کاروائی، زوراکی ئٹ بیگواہی تیٹ اواری و بلوچ زنک ایسری نا عمل ئٹ اوار مننگ نا دوبہ پاش مسونے۔

بی ایل اے پاش کرے کہ تنظیم نا کمانڈ کونسل فیصلہ کرینے کہ جہانی جنگی اصول و بندی تا بدلی تون تعلق تخوک ضوابط آتے مون آ تخسہ پاکستان ءِ ہفت دے نا وخت تننگے، دا وخت ئنا نیام ئٹ اگہ ریاست باضابطہ وڑ آ جنگی بندی تا بدلی کن منیک گڑا دا ہفت فوجی کارندہ غاک بلوچ بندی تا یلہ کننگ کن بدل مننگ کیرہ۔

اینو شینک کروک پوسکن ویڈیو ٹی پاننگانے کہ پاکستان تون پین شش دے ءُ۔

ایسر ئٹ تنظیم پارے کہ بندی ہفت فوجی کارندہ غاتا یلہ کننگ بلوچ جنگی بندی تا یلہ کننگ تون تفوک ءِ، اگہ بروک آ دے تیٹ کوزہ گیر ریاست نا پارہ غان اسہ عملی و باضابطہ پیش رفت اس متو گڑا بلوچ راجی عدالت نا فیصلہ نا رد ئٹ اوفتیکن مروک آ سزائے موت نا فیصلہ غا عمل کننگ مرو۔

بلوچستان نا علاقہ نوشکی آن پاکستانی لشکر اِرا کماش زوراکی ئٹ بیگواہ کرینے، جتا انگا ہند آتیا چھاپہ نا وخت اُرا تیٹ بندغ آتے تنک کننگ نا تدینیک رپورٹ مسنو۔

درو پاکستانی لشکر نوشکی نا کلی مینگل و قادر آباد نا علاقہ آتے تیوہ پلویڑ کریسہ اُرا تیا چھاپہ خلک۔ فورسز ہندا نیام ئٹ اِرا بھلن سن بندغ حافظ عبدالستار مینگل ہند قادر آباد و میر عبدالرزاق بادینی ءِ دزگیر کریسہ نادرست ہند آتیا سر کرینے۔

یاتی مرے کہ اکتوبر 2022 ئٹ میر عبدالرزاق بادینی نا مار فرید بادینی ءِ سی ٹی ڈی خاران ئٹ اسہ دروغ نا تون مون تسِ اسیٹ کسفیسس۔ فرید بادینی ءِ بیست و ہشت ستمبر 2022 آ کوئٹہ غان زوراکی ئٹ بیگواہ کننگاسس۔

پاکستانی لشکر نوشکی نا جتا انگا علاقہ کلی جمالدینی، کلی مینگل، قادر آباد ئٹ فوجی آپریشن آتیان گڈ اینو غریب آباد ئٹ اُرا اُرا ئٹ آپریشن کریسہ ءِ ہندن دا نیام ئٹ بازار ءِ زوراکی ئٹ بند کرفنگانے۔

بلوچستان نا ضلع پنجگور آن تدوک اسہ ہفتہ ئسے نا نیام ئٹ ہشت بندغ نا جون آک خننگانو۔ ہندی حوالکار و خاہوت آتا رد ئٹ ہرا جون آتا دا وخت اسکان چاہنداری مسونے، او کل زوراکی ئٹ بیگواہی نا گواچی مروک بندغ آتا ئسر۔

پوسکن مروک تدینی ئٹ اینو پنجگور آن پین اِرا جون خننگ نا حوال آکو، ہرافتیٹی اسٹ نا چاہنداری  عبدالرشید نا مار جنگیان نا پن ئٹ مسونے، ہرا پنجگور نا علاقہ پروم نا ہندی اس پاننگک۔ اِرٹمی جون ئنا چاہنداری دائسکان مننگ کتنے۔

خاہوت نا رد ئٹ جنگیان ءِ بیست و شش مئی 2025 آ پنجگور نا علاقہ پروم آن پاکستانی لشکر ایلو چار سیال آتون تہ اوار دزگیر کریسس۔ خاہوت نا پاننگ ءِ کہ اوکان گڈ ایلو چار بندغ ءِ یلہ کننگا، واہم جنگیان نا بابت ئٹ ہچو ڈس اس رسینگتو۔

جنگیان نا بھلا ایلم ملک میران سوشل میڈیا غا اسہ بیان اسیٹ پاریسس کہ او نا ایلم ءِ پاکستانی لشکر و او نا مخ تف سلہہ بند ٹولی ہرافتے ہندی تلہ غا “ڈیتھ اسکواڈ” پاننگک، برمتہ کریسہ پاکستانی لشکر نا کیمپ آ سر کننگاسس۔

ہندی چاگڑدی کاریم کروک آتا رد ئٹ ساڑی آ اسہ ہفتہ ئسے نا نیام ئٹ پنجگور آن ہشت جون خننگانو۔ اوفتا پاننگ ءِ کہ ہرا جون آتا چاہنداری مننگ کرینے، او کل ہندن انگا بندغ آتا ئسر ہرافتا خاہوت آک اوفتا زوراکی ئٹ بیگواہی تا رپورٹ آتے مالو درج کریسر۔

بلوچستان نا ضلع نوشکی ئٹ پاکستانی لشکر نا پارہ غان جتا انگا علاقہ آتیٹ کاروائی نا حوال آک رسینگانو۔

ہندی حوالکار آتا رد ئٹ غریب آباد و بنجائی شار نا علاقہ آتے پلویڑ کریسہ دکان آتے بند کرفنگانے، ہندن علاقہ ئٹ اُلس نا سر و پر کچ ئٹ ءِ۔

حوالکار آتا پاننگ ءِ کہ پاکستانی لشکر پن کروک علاقہ آتیٹ آپریشن ءِ بنا کرینے ہراڑان گڈ علاقہ ءِ فوج تینا پلویڑ ئٹ کرینے۔ واہم سرکاری کالخواہ تا پارہ غان دا بابت ئٹ دسکان اسہ ہم بیان اس مون آ بتنے۔

یاتی مرے کہ درو ہم نوشکی نا کلی مینگل و قادر آباد نا علاقہ آتیٹ کاروائی کننگا ہندن اوکان مالو کلی جمال دینی ئٹ آپریشن کننگا۔ پدا ہندی بندغ آتا دعویٰ ءِ کہ دا نیام ئٹ اُرا تیٹ پترینگ و پٹ و پول ہم کننگا و گڑاس اُرا تے نسخان ہم تننگا۔

ہندی حوالکار آتا رد ئٹ ساڑی آ آپریشن نا نیام ئٹ کم و ود بیست و دو بندغ ءِ دزگیر کننگ نا حوال آکو ہرافتے نادرست ہند آتیا سر کننگ نا دعویٰ مریسہ ءِ۔ دزگیر مروک بندغ آتا چاہنداری نا شابیتی حوال آک مون آ بتنو۔

بلوچستان نا ضلع پنجگور آن اسہ پین جون اس خننگانے۔

پولیس کالخواہ تا رد ئٹ دا جون پنجگور نا علاقہ وشبود ئٹ رخشان ڈور آن خننگا۔ کہوک بندغ نا چاہنداری نواب ولد عبدین نا پن ئٹ مسونے، ہرا پروم نا ہندی اس ئس۔

ہندی حوالکار آتا رد ئٹ کہوک بندغ ءِ 2025 ئٹ او نا اُراغان پاکستانی لشکر دزگیر کریسس، ہراڑان گڈ او بیگواہ ئس۔

خاہوت والا تون اوار ہندی بندغ تا پاننگ ءِ کہ مرغنو وخت ئسے اسکان او نا ہچو ڈس اس مون آ بتو، واہم داسا او نا جون خننگانے۔

یاتی مرے کہ پنجگور ئٹ اسہ ہفتہ ئسے نا نیام ئٹ ضلع پنجگور نا جتا انگا علاقہ غاتیان کم و ود شش جون خننگانو۔ ہرافتے جتا انگا وخت آتیٹ پاکستانی لشکر بیگواہ کریسس۔

آپریشن ہیروف نا زہم آک – ٹی بی پی سرگپ

سی و یک جنوری اِرا ہزار بیست و شش آ آپریشن ہیروف نا بھلا و شابیت عسکری مہم آن پد بلوچستان نا حالیت آک مٹ مسنو و دا عسکری مہم نا بلوچ چاگڑد آ بھلو معاشی و سیاسی زہم تمنگ ءِ۔ ریاستی ادارہ غاک باقاعدہ پڑو کریسہ اشتماعی سزا نا پالیسی تے عملی دروشم تننگ نا درشانی کرینو و ہموڑے ایلو پارہ غان بلوچ راج دوست پارلیمانی جماعت آک ریاستی پالیسی تے بلوچستان و پاکستان نا زور ئنا سیالی نا ایسری نا پارہ غا گام خلنگ نا پِن تننگ ءُ۔

بلوچ لبریشن آرمی نا مٹ مروکا حکمت عملیک و جنگی لائخیک ہراڑے بلوچ چاگڑد ءِ زہمی کرینو، ہموڑے دانا زہم آک پاش مریسہ ءُ کہ بلوچستان ئٹ جہانی کان کنی نا ڈٹ بندی و پیشن ملکی سرمایہ کاری نا اقتصادی ڈٹ بندی تا برجاء مننگ نا نشان آک ہم کم مریسہ ءُ۔ چین پاکستان اقتصادی راہداری و چاغی ٹی کان کنی نا ڈٹ بندیک وختی آن بلوچ سلہہ بند ادارہ تا جلہو آتا پلویڑ ئٹی ءُ و داسہ آپریشن ہیروف آن پد امریکہ، سعودی عرب و ایلو ملک آک ہم بلوچستان ئٹ سرمایہ کاری آ دُرینگپسہ۔

بلوچستان نا اسمبلی ٹی مسلط کروکا وزیر اعلی سرفراز بگٹی نا جذباتی و اُست کٹہ غا ہیت آتیان پاش ءِ کہ اوفک ریاستی رٹ ئنا ہرا بیانیہ ءِ سال آتیان تالان کننگ ئسر، بلوچ لبریشن آرمی نا آپریشن ہیروف او بیانیہ نا گواچنی ءِ جہان نا مونا پاش کریسہ بلوچستان ئٹ ریاستی رٹ ءِ برجاء تخنگ نا زی آ سوالیہ نشان خلکنے۔ پاکستان نا ریاستی ادارہ تا پارہ غان بلوچ راہشون تا اُرا تے تراک ئٹ بھس کننگ، ہُشنگ و اوفتا لمہ باوہ غاتے زوراکی ئٹ بیگواہ کننگ کون آک گام تیٹ ریاستی ادارہ غاک تینا رٹ ءِ طاغت نا زور آ بحال کننگ نا بے سہب ءُ کوشست کننگ ءُ۔

پاکستان نا ریاستی ادارہ غاک اسہ بیانیہ ئسے جوڑ کریسر کہ بلوچستان نا گڑاس جذباتی ورنا ءُ ہرافتے ریڈیکلائز کننگانے۔ واہم آپریشن ہیروف ئٹ اوار انگا جند ندر و مزاحمت کار آتیٹ بلوچ چاگڑد نا جتا تپہ تیان ہر سن ئنا بندغ آتا اوار مننگ و صنفی برابریک ریاستی بیانیہ ءِ ایسر کرینو و جہان ءِ کلہو تسنو کہ دا جہد ئٹ ہلوکا فیصلہ غاک ریاستی پالیسی تا ردعمل افس بلکہ راجی آجوئی نا دوئی کننگ کن شعوری فیصلہ ءُ۔

آپریشن ہیروف نا عسکری مہم اسہ کثیر الجہتی تدینی ئسے، اونا اُرے اسکان زہم آک مرور و بلوچ چاگڑد نا ہر تپہ غا اونا سیاسی،معاشی و ادبی زہم آک تمور۔ دا عسکری مہم بلوچ جنگی دیہاڑ ئٹ اسہ اہم جنگ ئسے نا دروشم ئٹ اُرے اسکان یات تخنگو و دن انگا جنگی مہم آک بلوچستان نا بروکا وخت ئنا فیصلہ تیٹ فیصلہ کن مرور۔ آپریشن ہیروف کون آ عسکری مہم آک نہ بیرہ ساڑی آ جنگی حکمت عملی تیٹ بدلی نا سوب جوڑ مرور بلکہ بلوچ راجی آجوئی نا جہد ئنا مستین نا جنگی ندارہ ءِ مٹ کننگ ئٹ ہم بھلو کڑد اس سر ترور۔

بلوچستان نا جتا انگا علاقہ آتیٹ پاکستانی لشکر نا کاروائی و کیہی بندغ آتا زوراکی ئٹ بیگواہ مننگ نا حوال آک مون بسنو۔

ہندی حوالکار آتا رد ئٹ ہشت فروری 2026 ئنا نن ضلع حب چوکی نا علاقہ گلشن امیر آباد ئٹ چھاپہ خلنگا و ہراڑان گڈ کیہی بندغ تے دزگیر کننگا۔

خاہوت نا پاننگ ءِ کہ چھاپہ نا وخت عبدالرب ولد جمعہ، محمد رحیم ولد جمعہ، عبدالرزاق ولد جمعہ و عبدالمالک ولد جمعہ ءِ تینتو اوار دننگا۔ پاننگک کہ دا چار انگا ایلم ءُ و دافتا تعلقداری مشکے نوکجو آن ءِ۔

خاہوت نا رد ئٹ عبدالرب نا مار شاہ زیب، محمد رحیم نا مار جہانگیر، عبدالرزاق نا مار نوروز و شاہ میر ءِ ہم دزگیر کننگا۔ داڑان بیدس داد شاہ ولد فضل کریم ءِ ہم تینتو اوار دریر۔

خاہوت آک دوبہ خلکنو کہ کاروائی نا وخت زالبول و چنا تا ہم بیدادی کننگانے۔

زہمی خاہوت نا رد ئٹ فضل کریم، ہرا کہ سرکاری ملازم و پولیس نا شعبہ غان تعلق تخک، ءِ ضلع خضدار آن برمتہ کننگا۔ او نا مار نواز نا بابت ئٹ ہم پاننگانے کہ او سرکاری ملازم ئسے و اودے ہم دزگیر کننگانے۔

ہندا وڑ داد شاہ ولد فضل کریم ءِ حب چوکی آن دننگ نا دوبہ خلنگانے۔

ایلو پارہ غان ضلع نوشکی نا علاقہ کلی جمال دینی و ایب کیب ئٹ پاکستانی لشکر نا بھلو کچ اسیٹ آپریشن نا حوال آکو۔ ہندی حوالکار آتا رد ئٹ علاقہ ءِ پلویڑ کریسہ اُرا اُرا نا پٹ و پول ءِ کریسہ ءُ، ہندن شاری تے تنگ کننگ و موبائل فون آتے ہلنگ ہننگ نا دعویٰ ہم مون آ بسونے۔

بلوچستان نا ضلع نوشکی ئٹ کیہی دے آن کرفیو برجا ءِ، ہراڑے پاکستانی لشکر نا بھلو کچ اسیٹ ہِننگ برجا ءِ۔ فورسز شار ئٹ کل ءِ دکان تے بند کننگ و شاری تا اُرا تے اسکان مننگ نا حکم تننگانے۔

حوال آتا رد ئٹ کیہی اُرا تے بُھس کننگانے، ہندن آبادی ئٹ فورسز نا بھلو کچ ئسے نا ساڑی مننگ نا سوب ہندی بندغ آتے بھیم نا گواچی کننگانے۔

بلوچستان نیشنل پارٹی (بی این پی) نا مسکوہی سینیٹر ثناء اللّٰہ بلوچ نوشکی ئٹ پارٹی نا بنجائی سروک و سینٹرل ایگزیکٹو کمیٹی نا باسک حاجی بہادر خان مینگل نا بیٹھک ءِ بُھس کننگ و بخار سے بھیم نا گواچی کننگ نا عمل کن ترند لوز آتیٹ مذمت کرینے۔

یاتی مرے کہ داکان مالو پاکستانی فوج بی ایل اے نا راہشون بشیر زیب بلوچ تون اوار ایلو بندغ آتا باوہ پیرہ ئی اُرا تے ہم بُھس کریسس۔

یاتی مرے کہ سی و یک جنوری آ بلوچ لبریشن آرمی آپریشن “ھیروف” نا رد ئٹ ایلو ضلع آتون اوار نوشکی آ ہم کنٹرول دوئی کننگ نا دعویٰ ءِ کریسس، ہراڑے او شش دے اسکان تینا ساڑی مننگی ئٹ سرسہب مسور۔

بی ایل اے شش دے آن گڈ آپریشن نا ایسری نا پڑو کریسہ پاریسس کہ دا نیام ئٹ اوفک پاکستانی فوج ئنا کیہی کیمپ و آئی ایس آئی ہیڈکوارٹر آتے ٹک کرینے، ہندن مون تس آتیٹ درزن آ کارندہ غاتے مرگ ئنا گواچی کننگ نا دعویٰ ہم کرے۔