بلوچستان نا دارالحکومت کوئٹہ ئٹ بلوچ سیاسی بندی تا خاہوت آک برانزی کیمپ اس ٹہیفیر۔

بلوچ یکجہتی کمیٹی نا پاننگ ءِ کہ ڈاکٹر ماہ رنگ بلوچ، صبغت اللہ شاہ جی، بیبرگ بلوچ، گلزادی بلوچ، بیبو بلوچ و ایلو سیاسی بندی تا غیر قانودی و غیر راہبند دزگیری نا برخلاف اوفتا خاہوت آک پریس کلب نا مون آ برانزی کیمپ اس ٹہیفینو۔

پین پاننگا کہ برانزی کیمپ ئنا مسخت ریاستی زوراکی نا برخلاف توار بُڑز کننگ و بندی تا دمدستی یلہ کننگ نا خواست کننگ ءِ۔ سیاسی باسک آتے راہبند آن چپ دزگیر کننگ بندغی حق آتا ترند لتاڑنگ ءِ۔

اوفک پاریر کہ نن کوئٹہ نا کل تپہ، چاگڑدی و سیاسی باسک، بندغی حق آتا جہدکار و شاری بندغ آتیان خواست کینہ کہ اوفک دا برانزی کیمپ ئٹ اوار مریسہ زیمی مروک خاہوت آتون ہم دڑدی کیر۔

سی ٹی ڈی کراچی نا علاقہ سعید آباد آن بی ایل اے نا باسک اس دزگیر کننگ نا دعویٰ ءِ کرینے۔

سی ٹی ڈی نا ترجمان نا رد ئٹ پن کروک بندغ نا کوزہ غان غیر قانودی سلہہ خننگانے۔ دا دزگیر مروک بندغ مالو ہم خون، خون کروک گام و پولیس تون مون تس مقدمہ غاتیٹی ہم دزگیر مسونے۔

سی ٹی ڈی نا ترجمان نا رد ئٹ دزگیر دوبہ دار نا نشاندہی آ محمد شفیع نا دزگیری کن ٹیم ءِ حب آ مون تریسہ ءُ۔ اوفک دعویٰ کریر کہ محمد شفیع نا باوہ ہمسایہ ڈیہہ آن تنظیم نا سلیپر سیل ءِ چلفنگ ءِ۔

بلوچستان نا ضلع سبی آن پاکستانی لشکر کیہی بندغ آتے دزگیر کریسہ بیگواہ کرینے۔

بلوچستان نا ضلع سبی نا علاقہ لہڑی نا نا ایب کیب ئٹ پاکستانی لشکر نا بھلو کچ ئسے آ زمینی و آسمانی لشکر کشی اینو تیوہ دے برجاء مس اندن پاکستانی لشکر دا وخت آ اُرا اُرا ءِ پٹیسہ کرے۔

سبی آن حوال تا ردئٹ پاکستانی لشکر دا وخت آ اُرا تیا چھاپہ خلیسہ علاقہ تیان دہ ئنا کچ بندغ آتے دزگیر کریسہ تینتون درینے۔

پاکستانی لشکر نا دو آن دزگیر آن پد غٹ بندغ آتے نادرست ہند آ دننگانے ہراڑان پد او پاش کننگتنو، اندن گڈیکو حوال آتے اسکان لہڑی و ایب کیب ئٹ پاکستانی لشکر کشی برجاء ئس۔

سبی لہڑی آن بیگواہ کننگوک بندغ تا چاہنداری نا بابت معلومداری رسینگتنے اندن علاقہ ئٹ لشکر کشی نا سوب موبائل نیٹورک و انٹرنیٹ دائسکان بحال کننگتنو۔

بلوچستان نا ضلع کیچ ئٹ پاکستانی لشکر ءِ بمب تراک ئٹ ٹک کننگانے۔

اینو کیچ ئنا علاقہ درچکو ئٹ نادرست بندغ آک پاکستانی لشکر نا بمب ڈسپوزل اسکواڈ پند کروک کارندہ غاتے ہمو وخت تراک ئٹ ٹک کرے ہراتم اوفک کسر ءِ ساف کننگ ئٹ گھٹ ئسر۔

علاقائی حوالکار آتا رد ئٹ تراک ئٹ کم و ود اسہ کارندہ اس بیران و اِرٹ ٹپی مسونو واہم کالخواہ تا پارہ غان دا بابت ئٹ ہچو شابیت حوال اس تننگ تنے۔

بلوچستان نا ضلع پنجگور آن درو بیگواہ مروک پین اِرا بندغ نا چاہنداری مسونے۔

شابیتی حوال تا رد ئٹ پاکستانی لشکر درو پنجگور نا علاقہ پروم ئٹ آپریشن نا بنا ءِ کریسہ اُرا اُرا ءِ پٹا و زالبول و چنا تون اوار کیہی بندغ آتے دزگیر کرینے۔

درو بیگواہ مروک بندغ آتیٹی پین اِرا بندغ نا چاہنداری مس، ہرافتیٹی سمیر ولد ابراہیم ہند تربت و نظام ولد حاجی عیسی اوار ءُ۔

حوالکار آتا رد ئٹ سمیر تربت نا ہندی ئسے و دا وخت او پروم آ تینا سیال آتتون اوڑدئی کن بسوسس کہ اودے تینا اسہ پین سیال اسیتون اوار آپریشن نا وخت دزگیر کننگا۔

یاتی مرے کہ درو آن پروم ئٹ آپریشن برجا ءِ، آپریشن نا وخت پاکستانی لشکر کیہی بندغ آتے دزگیر کرینے دائسکان 8 بندغ نا چاہنداری مننگ کرینے۔

پروم ئٹ آپریشن و بندغ آتا زوراکی ئٹ بیگواہی نا برخلاف علاقئی مخلوق نا پارہ غان اینو اسہ ریلی اس کشنگا، ہرا پروم جائین آن بنا مریسہ ایف سی کیمپ نا مون آ تولوک برانز نا دروشم ءِ دوئی کرینے۔

ایسری حوال آتا رد ئٹ دا وخت بھلو کچ اسیٹ بندغ ہرافتیٹی زالبول و چنا تا اسہ بھلو کچ اس اوار ءِ ایف سی کیمپ نا مون آ تولوک برانز کریسہ ءُ۔

ضلع کچھی نا علاقہ بھاگ ئٹ ساڑی پولیس تھانہ غا نادرست بندغ آتا پارہ غان چغلی بمب جلہو کننگا۔ ایس ایس پی کچھی رانا محمد دلاور نا رد ئٹ جلہو کار آک بمب ءِ خسنگ آن گڈ نرار۔

بنائی حوال آتا رد ئٹ تراک ئٹ اسہ ہم جانی نسخان اس متنے، واہم پولیس نا اسہ گاڑی ئسے دیخہ در نسخان رسینگانے۔ ایس ایس پی کچھی نا رد ئٹ تراک نا نوعیت ءِ چاننگ کن کمک کروک کڑدہ آتے ہند آ مون تننگانے۔

پولیس تدینی آن دمدستی گڈ علاقہ ٹی ہننگ و پیشن مننگ نا کسر تے تفیسہ چیکنگ نا عمل ءِ بنا کرینے۔

بلوچستان نا ضلع پنجگور آن پاکستانی لشکر چار بندغ ءِ دزگیر کریسہ بیگواہ کرینے۔

بیگواہ مروک آتا چاہنداری رشید نا مار ظریف، محمد علی نا مار اصغر، محمد حیات نا مار ماجد و محمد علی نا مار عتیق نا پن تیٹ مسنے۔

پن کروک بندغ آتے پاکستانی لشکر اینو پیشیم آ پنجگور نا تحصیل پروم آن دزگیر کرینے ہراڑان پد او بیگواہ ءُ۔

خضدار آن اسہ ورنا ئسے نا جون اس خننگانے ہرادے بیدادی آن گڈ کسفنگانے۔

بلوچستان نا ضلع خضدار آن رسینگوک آ حوال آتا رد ئٹ نال نا علاقہ غان بست و بند ءِ اسہ ورنا ئسے نا بیدادی نا گواچی مروک جون اس رسینگانے، ہرادے دوئی کریسہ اسپتال آ سر کننگا ہراڑے جون ئنا چاہنداری فاروق بلوچ نا پن ئٹ مسونے۔

بی این پی مینگل نا رد ئٹ اینو خضدار ئٹ کسفسہ بٹنگوک جشوک انگا جون بی این پی خضدار نا نائب صدر نور احمد مینگل نا مار ئنا ءِ ہرادے 14 اپریل آ بیگواہ کننگاسس و اینو بیدادی نا گواچی مروک جون ءِ بٹنگانے۔

بی این پی مینگل نا پاننگ ءِ کہ فاروق احمد نا باوہ نور احمد مینگل پارٹی نا ضلعی نائب صدر ءِ و تدوک کیہی دے تیان بلوچ یکجہتی کمیٹی نا راہشون آتا دزگیری نا برخلاف لکپاس نا خڑک تولوک برانز ئٹ اوار ئس۔

بی این پی پارٹی سروک نا مار ئنا خون ئنا مذمت ءِ کیک۔

یاتی مرے کہ اینو ہی بلوچستان نا ضلع پسنی آن اسہ 17 سال نا زوراکی ئٹ بیگواہ مروک ورنا ئسے نا جون خننگاسس، ہرا نا چاہنداری پسنی نا ہندی نظام ولد محمود نا پن ئٹ مسونے اندن اسہ پین جون اس ضلع کیچ نا تحصیل بلیدہ غان خننگانے۔

حوال آتا رد ئٹ پسنی نا ہندی نظام ولد محمود ءِ برجا تو 12 اپریل بابر شور آن پاکستانی لشکر نا ڈھکوک ادارہ آتا کارندہ غاک دزگیر کریسہ نادرست ہند آ سر کریسور ہراڑان پد او مون آ ہتنگ تئوسس۔

نظام بلوچ ولد محمود نا زوراکی ئٹ بیگواہی ءِ پک ہمو وخت بلوچ یکجہتی کمیٹی کریسس اندن تنظیم اونا یلہ کننگ نا خواست ءِ کریسس واہم اینو 4 دے آن گڈ اونا جون خننگانے۔

داڑان بیدس بلوچستان ئٹ جون آتا خننگنگ نا لڑ اسہ وار پین ترندی دوئی کرینے اندن دا وخت آ بلوچستان نا جتا انگا ضلع آتیان کیہی جون آک ملانو ہرافتا چاہنداری نا بابت ئٹ ہچو ہیت اس مون آ بننگ کتنے۔

اندا نیام ئٹ درو حب چوکی آن اِرا بندغ نا جون آک خننگاسر ہرافتا چاہنداری تون تفوک حوال رسینگ کتئو۔

بلوچستان نا ضلع مستونگ ئٹ بلوچستان نیشنل پارٹی نا سروک سردار اختر جان مینگل لک پاس آ تدوک بیست دے آن برجا تولوک برانز نا ایسر کننگ نا باقائدہ پڑو ءِ کرینے۔

دا پڑو ءِ مستونگ ئٹ اسہ پریس کانفرنس ئسیٹی تران کریسہ کرے۔

سردار اختر مینگل نا پاننگ ئس کہ اُلس ءِ سختی تون مون تننگ نا سوب برانز ءِ ایسر کننگ نا فیصلہ ءِ کننگانے۔

او پارے کہ برانز نا ایسری اسہ ہم نزوری سے نا نشاندہی آخہ بلکن سیاسی حکمت عملی نا پالیسی نا بشخ ئسے، و ننا برانز داسا ارٹمی دروشم ءِ دوئی کرو۔

بی این پی نا سروک پین پارے کہ ساڑی آل پارٹیز کانفرنس ئٹ جتا انگا سیاسی جماعت آک برانز ءِ ایسر کننگ نا پنت تسور ہراڑا پام تننگ آن گڈ دا فیصلہ ءِ کننگا۔

اختر مینگل دا ہیت ئنا پک گمان کرے کہ بی این پی تینا جمہوری خواست آتا منفنگ اسکان برانز کننگ ءِ برجا تخو، و داسا تیوہ بلوچستان ئٹ برانزی ریلی کشنگو تاکہ توار بُڑز کننگے۔

بلوچستان نا ضلع گوادر نا تحصیل پسنی آن حوال آتا رد ئٹ بست و بند ءِ اسہ چنک سن ورنا ئسے نا جون رسینگانے، ہرادے کسفنگ آن گڈ جون ءِ بِٹنگانے۔

بست و بند جون ءِ دوئی کریسہ اسپتال ءِ سر کرینے ہراڑے جون ئنا چاہنداری پسنی نا ہندی نظام ولد محمود نا پن ئٹ مسونے۔

حوال آتا رد ئٹ نظام ولد محمود ءِ برجا تو 12 اپریل بابر شور آن پاکستانی لشکر نا ڈکوک ادارہ آتا کارندہ غاک دزگیر کریسہ نادرست ہند آ سر کریسر ہراڑان گڈ او مونا ہتنگتویسُس۔

نظام ولد محمود نا زوراکی ئٹ بیگواہی ءِ پک ہمو وخت بلوچ یکجہتی کمیٹی کریسُس، اندن تنظیم اونا یلہ کننگ نا خواست ءِ ہم کریسُس، اینو 4 دے آن گڈ اونا جون خننگانے۔

یاتی مرے کہ بلوچستان ئٹ جون آتا خننگ نا لڑ اسہ وار پین ترندی دوئی کرینے انداوڑ دا وخت آ بلوچستان نا ہر ضلع غان کیہی جون آک خننگانو ہرافتا چاہنداری نا بابت ئٹ ہچو ہیت اس مون آ بننگ کتنے۔

جون آتا خننگ نا لڑ ئٹ اینو ہی ضلع کیچ نا علاقہ بلیدہ غان ابوبکر ولد محمود پنی ءُ بندغ سے نا جون ملانے اندنکہ درو حب چوکی آن اِرا بندغ نا جون تے بست و بند خناسُس ہرافتا چاہنداری نا بابت ئٹ حوال رسینگ تنے۔