بلہ نا اُست انا لیار آخر اونا است انا تل آن پیشتما، اونا مون ملنگا پارے کنا مار بشام نن نیمگا تینا ہلار نا درخت آکے دیر تننگ کن ہناکہ۔ ای اودے درگہ نا پدان تینا خن تیٹی اننگا خناٹ، ای ہںودے مدام بلوچی آ خیریءِ کوپہ غا و بلوچی آ دستارے کاٹم آ تفنگ آ خناسٹ، او بے توار اُراغان پیشتما کہ دُن نہ کہ ای سما کروٹ ولے ای تو ایہن ہم جٹ اسے آن پد ایزک پورنگ کن بش مسوٹہ۔ مدام تارمہی ٹی ایزک نا باٹی پال کے شاغاٹہ۔ جٹ اس جوانو ایزک پورنگ آن پد اوتا خسیءِ کشاٹہ، ہںمو نن اسے وار اتون جڑا بڑا سے نا توارے بنگٹ۔ سما تما شار انا بنام آ داڑیل اینو پگہ نا لٹ و پُل کروکا بندغ کسفوکا مرک انا سوداگر، تینا سنگت آتون اوار خلق آ سم کاری کریسہ جلہو کریر دُنکہ بدر او ملک اس وطنءِ کوزہ کننگ کن بسونے۔ توار توار آن کنا جان اسل شل مس، سم کاری نا توار ودنگ اس، ای درگہ نا پارہ غا دودینگاٹ اُراٹ ہچ خنتوٹ۔ است اٹ پاریٹ چاوہ مونا انار، ہستین توار توار ئس، تارمہ ٹی خالی نروکا سیخاک خننگارہ۔ خلیس آن تینا مارے توار کریٹ بشام او بشام، ورندی دے تسکہ۔
خلق آ عذابس شولنگاسس، درگہ نا چٹکنیءِ تفیٹ تہٹی بسوٹ تو ملخڑ کنا ملک ناز تینا مسڑ برمشءِ خمب کریسس کُنج اٹ تولوک دوکے خف تیا تخاسس۔ کنے ترند ترند آن توار کرے، ابوئے آئی تہٹی برک۔ ای رُم کریسہ ہڑتوماکے تینا است آ تخاٹ
ای سوج کریٹ ہمو تم برمش نا عمر اخس ئس؟
کنا مسڑ، پنچ سال و شش توں۔
ولدا انت مس؟
ننے ہچ سما تمنگ الو کہ انت مننگے، ای است اٹ پاریٹ چاوہ دا بے غیرت آک خلق اٹ لُٹ و پل آکے بسونو۔
ای ملک ناز و برمش ءِ کوٹو اٹ ہلاٹ پدی پیشن بسٹ، مچھی ہلوکا خلق ئنا مزور تیا توار کریٹ کس ارے داڑے خلق اٹ یا دا خلق ئنا نرینہ غاک کسکنو۔
درگہ نا ٹنگ آن اُراٹ گڑاس چنا نیاڑی درگہ غا تیان کاٹم ءِ کشاسر، اسے ایلو تون کرار آ ہیت کریرہ گڑاس نرینہ ہم پیشتمار ہراک بے سلاء ئسر۔ سہب تمنگ خڑک اس، کوک پاڑو نا توار ودیسہ کریکہ، ملی شل اس، انت اس کیو بش مسوٹ وضو نماز کریٹ، یاسین شریف نا تلاوتءِ کریٹ، دعا کننگ آن پد مچے دیر دم کریٹ ملک ناز و برمش ءِ کنفیٹ ہنداڑتون مرک انا سوداگر نا گڑاس داڑیل ننا کوچہ ٹی پترینگار درگہ غا تیا بے حساب سم کاری کریر۔
ہرکس ہرکس مس، تینا ساہ ءِ بچفنگ کن اراتیٹی پتررینگار۔ خلق اٹ بھلو تاڑو واڑ اس تما، ہفتاد سال کنا عمرء ای ہم خلیس آن رُم کریٹ۔
الہ ہںوشی ٹی دروازہ نا چٹکنیءِ گیرام کریٹ ۔ ملک ناز و برمش ءِ تینا سینہ غا لچفیٹ، اوتا زی آ تینا دو انا جوڑ کروکو رلی اس شاغاٹ و زور زور آن کلیمہ خواننگءِ بناء کریٹ۔ تین تو تینٹ پاریسہ اناٹہ یااللہ بشامءِ خیر اٹ اتیس۔ ہراتم سم کاری مسکہ یا توار وداکہ تو چندی چنا نیاڑیک مرک انا خلیس آن چیہانٹ کریرہ۔ ہنداڑتون مچھی ہلوکا غریب مزور اسے نا اُراٹی نیاڑی سے نا چیہانٹ مس، خدانا پن اٹ ای نت تیان شل اٹ کنے گریپبو کنا خف تا والی کے دبو کنا لمہ انا تروکا چلوء دبو تینا گورو کفن کن گڑاس پیسہ تخانٹ دا کلء دبو ولے کنے کسف پبو، اونا خف تا والی کے کشنگ آن پد قرار قرار توار مُر مریسہ انا، ناز ملک بشامء توار کننگ پیشن ہناکہ اودے تہٹی چکاٹ۔
داسہ خلق اٹ وار وار اس چنا نیاڑی تا توار بسکہ، ای پکر اٹ تماٹ خدا بشامءِ ہتے المیء او تینا باوی آ توفک اٹ اوتیتو مون ایتک۔ اوڑان پد نن دا خلق آن مرکانہ، ننا پتن او وطن ئسے جاگہ اس سیخاس دو بریک۔ ای ملک ناز و برمش ءِ برووک آتا کیرغ آن ڈکاٹ ہنداڑتون۔
مرک انا سوداگر تا چار بندغ طوفک آ تون اُراٹی پترینگار ہمو وخت سہب ئنا روشنائی تالان مننگ اس ای اوتا خن تیٹی اُراٹ کنے اوتا دتری خن تیان خلیس ارفے، کنا رنگ پوشکن ہڑسینگاسس دتر کنا بارسس او تیان اسے سبرو بندغس توفک نا دستہ ءِ کنا کاٹم اٹ خلک مر بٹے، کاٹم آن دتر یلہ مس۔ توفک نا نلء کنا سینہ غا تخا پارے او خیراتی آ کٹوک ہراڑیکو نما خیسنک او پیسہ غاک۔ ای چناکے بچفنگ کن پگی آ کوٹو نا پارہ غا دوئے مریفیٹ۔ اسٹ تا ہمونگ ہنا، ہنداڑتون اسٹ اس تا کوٹو نا درگہء لغت اٹ خلک، درگہ ملنگا ہر مسٹ کوٹو اٹ پترینگار، پترینگنگ تون اوتا نظر ملک ناز نا خیسن تیا تما ہراک تینے برووک نا کیرغ آن ڈکاسُر۔ اسٹ تا برمش نا چنکا خوڑت انگا والی کے کشنگ نا کوشست کرے، برمش اودے گٹ اس تس او توفک نا نلءِ برمش نا سینہ ٹی خلک۔ برمش بے ہوش مس۔ ایلو تا ہکل کرے ہمت کبو زو دا نیاڑی نا خف و دوتیان خیسن کے کشبو، اسٹ اس تا ملک ناز نا پارہ غا جلہو کرے ملک ناز کہ اسے شیزال و لمہ اس ئسکہ۔
خبردار کس اس کنا پارہ غا دو بٹے، نہ تو دوکے تے گڈوٹ، ہموڑے تخوک چاکو اس ہرفے جک سلیس۔
بلہ پارے ای دتر چر آ جون اتون تینا گدے ظالم آتا مونا توریٹ خدا نا پن اٹ کنا چناکے ہلیبو، اسٹ اس کنے ترند آن دھکہ تس مُر بٹے ولدا بش مسوٹ اوتا نت تیٹی ہلکوٹ اوکے بھاز منت کریٹ یا حسین خلکوٹ اوکے خدا او رسول نا دورہی تسٹ، او عمر کٹ آک کنا چناتے ہلیبو ولے او مسٹی ٹی ملک ناز نا خف تیان خیسن نا کانٹہ کے کشیسہ کریر۔ ملک ناز تینا جان و مال ئنا حفاظت کن چکی تاڑی کننگ ئس۔ ایلو پارہ غا برمش معصوم نا چیہانٹ اس او ہم تینا لمہءِ بچفنگ کن اوکے توننگ نا کوشست کریکہ۔ ای بے سما مر تماسٹ کہ اسے ناگمان توفک نا ٹکا مس۔ ملک ناز نا ہکل تروکا ترند آ توار توفک نا توار اٹ گم مس۔
مرک انا سوداگر آک مخیسہ کوٹو آن پیشن بسر، اوتا اسٹ نا دوٹی کنا چنکا صندوخ اس ہراٹی گڑاس خسن نا چلو، و بشام نا گڑاس پیسہ ئسر۔ ایلو نا دوٹی ملک ناز نا خیسنک و برمش نا خف تا چنکا والیک ئسر، مسٹمیکو داڑیل تینا بھلا بوٹءِ کنا کاٹم آ تخا پارے بلہ ان تینا چناکے اُر اوتا خننگ کن سلوئی افیس، چارمیکو تینا بوزے کنا خف انا خڑکا ایس بروت آکے تینا تاّو تریسہ پارے تینا مارے پاس خبڑدار کہ ریاست نا خلاف توفک ارفیس نہ تو نے ہم نا چنا تا رہی آ مون اتون۔
پیشتمنگ آن مست اسٹ تا پارے جوانے بلہ نا چنا تیان خیسن دو بس نہ تو پورا خلق اٹ کس ئتون ہچ الو، کل تا مخیسہ پیشتمار۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
