بلوچستان نا دارالحکومت کوئٹہ ئٹ بمب تراک آن ہفت بندغ ٹپی مسونو۔
حوال آتا رد ئٹ اسمنگلی رود آ پول ٹہیفوک آ مزور کار تیا جلہو کننگا، ہراٹی پنچ مزورکار تون اوار ہفت بندغ ٹپی مسونو۔
پولیس نا پاننگ نا ردئٹ موٹر سائیکل آ سوار نادرست بندغ آک چغلی بم ئٹ جلہو کریر و نرار، ٹپی مروک آتے دمدستی تون ہسپتال آ دننگانے۔
پولیس نا مُستی پاننگے کہ علاقہ ءِ گیڑ کننگانے واہم دائسکان ہچو دوبہ دار ئسے نا دزگیری مننگ کتنے۔
تراک آن گڈ مخلوق بیم نا گواچی مسونے۔ جلہو نا ذمہ واری ءِ ہچو تنظیم اس دائسکان ارفتنے۔
ملک ناز نا گُد | ارٹمیکو بشخ
نوشت: محبوب شاہ
دی بلوچستان پوسٹ
چاہسوٹ دنکہ بلہ غامبار کنا نک دوک ہم بارنگو، خلیس نا چپ انگا ویل تینا کلء باریمء کنا کاٹم آ شاغنگ آس۔
کنا خنک بلہ نا بت آ سخت اسر خناٹ۔
ناگمان بلہ اسے وار ئتون بادوی آ بس، اوغنگ و چہانٹ خلنگء بناء کرے۔
عجمب ہلاٹ کڑسی نا نت تیٹی دوکے سخت کریٹ۔ بلہ بش مس ہمو دتری آ بلوچی گدے سینہ غا تخا اودے تینا خن تیا خوشکا، اوڑان گنوک آتیامبار بُک ہلک، اوڑان پد دتری آ گدے تینا مونا پیڑا ترند ترند دو دست کریسہ مون اٹ تینا خلککہ زور زور آن پاریکہ یاحسین کریٹ تینا پھل انگا چنا تیکن۔ دا حالیت ءِ خننگ تون کنا خلوکا ملی کہ وخت آن ویل و ڈکھ آن پر اس گنوکی نا گواچی مننگ ئس۔ نریسہ بلہ نا کاٹم آ دو ءِ تخاٹ اونا کوپہ غاکے پلیسہ پاریٹ، بلی او کنا لمہ خیرے انت اس مس کہ نی دُن گنوکی کننگس۔ ولے اونا اوغنگ بند مننگ الو، او دتری آ کشیدہ کروکا گدے جوان شیف بڑزا کرے، دتر نا لپ آکے تینا خن تیا تخا، اوکے جوان تینا مون آ خوشکا، آخر اونا گٹ بارس او کاو او کوں آن انا، خسکنگ نا تے توار توار زیات مس۔
ای خلیس آن لڑزیسہ دفتر آن پیشن درگہ نا خڑکا جک سلیسٹ، پریشانی ٹی وار اس ہنوک بروک آکے اُراٹہ، وارس بلہ ءِ اُراٹہ، آخر است کنا مچے صبر کرے بلہ نا اوغنگ نا توار ہم قرار مس، او ہندا دتری آ گدے ہرفے تینا کٹ ئٹی تخا بینچ آن ڈغار آ توس، بلہ ولدا تینا غم تیٹی گم مس۔
خناٹ نازل مون پہ مون بننگے، ای دودینگسہ اونا دوٹی ہلکٹ پاریٹ او شوم صوب ئناءِ ہرانگس۔ ای تو صوب ئتون وختی بسونٹ، وارڈ اٹ نیاڑی تا خذمتءِ کریٹہ، ہندا وارڈ اٹ پروم نا اسے غریبءُ خلق ئسے آن گڑاس ناجوڑ داروں درمان کن بسونو، لنگڑی و ملاسی نا سوب آن اوتا حالیت بھاز خراب ءِ، اوتا چنا تا جان آ ہچ اف، نت تیٹی تا لتر اف نیاڑیک کاٹم پیشنو نرینہ غا تا پچ آتیا شش شش آگڑی خلوکءُ۔
ناگمان کنا با آن پیشتما ابوئے اے خدا ننتون انتیے دون مننگے، ولدا سینہ غا دوکے تخاٹ استٹ پاریٹ اے ننا قسمت ہفت سد کلومیٹر سور دیر نا خواجہ اُن ولدا ہم ملاس اون ولدا ہم چناک لغڑو نیاڑیک کاٹم پیشنءُ۔
نازل سوج کرے نیتون گد اس یا خیریس ارے؟
انتئے امر کیسہ تا۔
اسے چلہی ءُ نیاڑیس بھاز ناجوڑے، اونا چنا صوب ئتون نزوری آن ضیان مس، اونا کاٹم آ گد اف، ڈاکٹر کنے نا پارہ غا راہی کرے کہ اوڑان اسٹور اٹ تخوکو اسے گد اس یا خیریس اہتہ۔
پاریٹ بلوچی ءُ دتری ءُ گد اس ارے ولے اودے دپہ تو جوان ءِ۔
نازل: انتئے کنا ایڑ؟
پاریٹ؛ سما اف انتیے، محسوس مریک دا شومءُ گد ئسے۔ انسان ئسے ناءِ یا جن ئسے ناءِ۔ ہمے دے آن داڑے ایسونوتے کنا دفتر کبین خننگک۔
نازل پارے؛ چپ کر، ایڑ نی ڈاکٹر ئسے اُس دنو ہیت کپہ، مخوہی کیسہ ننے، ان زو اتتے گنوک کپہ تینے۔
نازلءِ پاریٹ: اوڑا دتر نا لپ ارے، اٹ دے آن ہندا شوم انگا گد آن خلینگ اُٹ دا بلوچی آ دتری آ گد آن اوغنگ و چہانٹ نا توار بریک، داسہ اے بلہء خنیسہ ہندا دتری آ گدے خننگ تون گھنںٹہ سیان آن اوغنگے و گنوکی کننگے۔
نازلءِ اشتافی اس۔ پارے گم کر دا خیراتی آ بلہءِ داسہ ننے گد اس بکارے، نازل دفتر اٹ پترینگنگ تون بلہ غان دتر آ گدے خوائس ولے بلہ نا ورندی بتو، او گدے سخت سخت تینا خمب اٹ کریسس، گم و گار تولوک ئس۔
نازل اسے وار ولدا گدے خواہنگ آن پد گدے اونا خمب آن چکا ولے بلہ چکار کتو۔ نازل گدے پیڑیسہ راہی مس، دتری آ گدے ارفنگ تون کنا مڑدہ غا جان اٹ ساہ تما دنکہ کنے غیبیءُ طاقت اس دو بس۔ بلہ نا پارہ غا اُراٹ، دلا غان اودے یخ ءُ تاس اس دیر ئنا کنفیٹ، بش مسوٹ اودے بنچ ئنا زی آ تولفیٹ، تینٹ دفتر آن پیشتماٹ۔ جٹ اس جوانو بلہءِ تنیا ہلاٹ۔
پدی بسوٹ خناٹ بلہ اول آن بھاز جوانے و اسل چُپ ئس ولے اونا پالن آ خڑینک آک اونا پروکا اُست گواہی تسکہ کہ او جٹ اس مُست جان اوغانے۔ بلہ نا غم ئنا خڑینک آکے خنیسہ کنے ٹی داخہ ہمت الو کہ ای اوڑان گڑاس سوج کیو، او ہم ہیت کننگ نا کوشست کتو، او تینا ڈھک آتیٹی مین ہناسس۔ اونا اِڑکی تیان کنا اُست بھاز مونجا اس، غم ئنا مون انگا جمرے پرغنگ کن ای اوڑان سوج کریٹ، بلی ای نیکن ندر مریو، ہراکہ بسونس؟
قرار آ کاٹم ءِ بڑزا کرے کنے اُرا، مدام اریسہ کرے۔ ہیت کتو، اونا چپی آن بے وس مسوٹ اودے سریفیٹ گڑا او کیچ آن مچے مُر اسے خلق ئسے نا پن ءِ ہلک۔
بشخندہ اسیتون سوج کریٹ بلی دا ہراڑیکے؟
بلی ہیت کریسہ پارے کیچ و بلیدہ نا نیامٹیءِ، کنا مسڑ ننا ڈغارتیان ایپار ایران نا سیم بناء کیک۔
داسہ بلہ کنے آن سوج کرے نی چوہ ڈاکسر بھرتی مسونس کنا مسڑ۔ ای پاریٹ ہراتم کہ وطن اٹ آجوئی نا جیڑہ غاک بناء کریر۔
بلی سوج کرے ای بے خوانندہ ئسے اٹ، نی خوانندہ اُس۔ نی پا دا جنگ جیڑہ ٹی دنا قصور ءِ؟
پاریٹ بلی بے وس دنو ہیت کپہ۔
انتئے، انتئے؟
بلی نن سرکاری ملازم اُن، ننا و غلام ئسے نا فرق اف، نن سیاسی ءُ ہیت کننگ کپنہ۔ ہیت ءِ بدل کریسہ نی دا شار ئٹ چوہ بسونس بلی؟
بلی پارے؛ ہراتم کہ زور آور آک ننا خلق ءِ فتح کریر۔
ای پاریٹ؛ بلی خدا نا پن اٹ، ریاست و فوج نا پنءِ ہلپیس۔ غریب او زالبول ئسے اُٹ، اسٹ او ایلم اسے کنا ای خواپرہ اونا سیخاغان دوکے سلیو۔
بلہ پارے کنا مسڑ نی تینا ایلم کن بے شک تینے گنگ او کر کر ولے ای تینا خنکے تر کیوہ نہ تینا بائے بند کیوہ۔
دودینگاٹ دفتر اٹ درگہءِ بند کریٹ، پاریٹ بلی داسہ گپ کر ۔
بلی پارے؛
گڑاس ریاست، گڑاس تینا آستونک نا دوشہ غاک ننا راج ءِ نیست و نابود کننگ نا کوشست کننگو، اگہ سال اس مست تینا خلق ءِ ہلانہ انتئے دُن مسکہ۔
ای پوہ متوٹ، چپ کریٹ توسٹ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچستان نا ضلع پنجگور آن برمتہ مروک چار شیعہ زائرین تا دائسکان ڈس رسینگتنے۔ بلوچ سلاء بند تنظیم آک تدینی ئٹ اوار مننگ آن نمن۔
اِرا دے مالو ایران آن بیدس قانودی وڑئٹ گولڈ سمڈ لائن آن بروک شش زائرین ءِ پنجگور شار آن خڑک برمتہ کننگار ہرافتیٹ اوار اِرا زالبول ءِ دوارہ یلہ کننگا اندن چار نرینہ دائسکان بیگواہ ءُ۔
ضلعی بست و بندی کوالخواہ تا پاننگے کہ تیوی بندغ آتا تعلقداری کراچی نا علاقہ ملیر آن ءِ۔ برمتہ مروک بندغ آک زیات کن ایران آ ہناسر ولے سیم بند مننگ نا سوب ہموڑے گٹ مسر و دوارہ بندغی اسمگلر آتا کمک ئٹ بیدس قانود آن گولڈ سمڈ لائن آن جپیسہ پنجگور آ سر مسوسر۔
بنائی پٹ و پول نا ردئٹ اِرا ڈبل کیبن گاڑی تیٹ سوار سلاء بندغ برمتہ کروک آک زائرین تا چاہنداری کننگ آن گڈ تینتون دریر۔ پولیس نا ردئٹ برمتہ کروک آک زالبول تے یلہ کریسر، اوفتیان معلومدار دوئی کننگ آن گڈ اوفتے ہمو وخت آ ٹیکسی ئٹ کراچی کن رادہ کننگاسس۔
سر وزیر بلوچستان جم کمال خان تدینی نا رپوٹ ءِ خوائسہ آئی جی پولیس و بست بندی کوالخواہ تے برمتہ زائرین تا یلہ کریفنگ ءِ زوت آن زوت یخینی کننگ نا پنت تسونے۔
ایلو پارہ غان بلوچ سلاء بند تنظیم بلوچ ریپبلکن آرمی پارینے کہ زائرین تے دننگ ئٹ بلوچ آجوئی خواہوک سلاء بند تنظیم تا ہچو دو اس اف۔
تنظیم نا ترجمان بیبگر بلوچ بیان اس شینک کریسہ پارینے کہ دا تدینی ئٹ پاش وڑئٹ پاکستانی ایجنسیک اوار ءُ ہرافک بھلو وخت ئسے آن بلوچ و سندھی سیاسی باسک و اقلیت آتا بنماسی بندغی حق آتے لتاڑنگ ئٹ اوار ءُ۔
خواست آتا پورہ مفرنگ آ وڈھ گرڈ اسٹیشن ءِ گیڑ کریسہ بھلا کسر ءِ بند کرون، چیئرمین زمیندار ایکشن کمیٹی میر حاجی امام بخش مینگل و ایلوفک واپڈا نا برخلاف وڈھ پریس کلب نا مونا برانزی مچی آن ہیت کریسہ پاریر۔
خضدار نا تحصیل وڈھ ٹی زمیندار ایکشن کمیٹی وڈھ نا پارہ آن واپڈا نا برخلاف وڈھ پریس کلب نا مونا اسہ برانزی مچی ئس کننگا۔ برانز آن چیئرمین زمیندار ایکشن کمیٹی میر حاجی امام بخش مینگل، مجاہد عمرانی، عبیداللہ شیخ و ایلوفک ہیت کریسہ پاریر کہ تدوکا اسہ تو ئسے آن مین فیڈر آک اِرا سائت کم کننگانے ہرانا سوب آن برانچ فیڈرز ءِ ہڑدے اِرا گھنٹہ بجلی رسنگیک۔
اوفک پاریر کہ زمیندار آتے بیرہ اِرا سائت بجلی تننگ آ کشت و کشار نا شعبہ ءِ وڈھ ٹی بُس کننگسہ ءِ۔ و تدوکا دے ئٹی سد آ تا نسخان مسونے۔ اوفک خواست کرینو کہ بجلی مالو آن بار 6 سائت تننگے امر کہ ایلو نا تیانبار تننگکے۔
اوفک پاریر اگہ داکان گُڈ اِرا دے ئٹی ننا خواست آ عمل کننگتو گُڑا زمیندار ایکشن کمیٹی وڈھ، وڈھ گرڈ اسٹیشن ءِ گیڑ کریسہ بھلا کسر ءِ بند کرو و دانا ذمہ وار ایکسیئن واپڈ مرو۔
پاکستان نا بنجائی وزیر منصوبہ بندی اسد عمر احوالکار آتون ہیت و گپ کریسہ پارے کہ کرونا نا ارٹمیکو لہر نا سوب آن کیس آتیٹی ودکی مسونے ہراڑان پد کراچی، اسلام آباد و پاکستان نا بست بندی کشمیر ٹی منی سمارٹ لاک ڈاؤن نا پڑو کننگانے ۔
اسد عمر مونی پارے کہ 6 ہفتہ اسکان کرونا نا کیس آک است جمی ئسر ولے گدرینگوک آ ہفتہ آن داٹی 2% ودکی بسونے اندا سوب آن منی سمارٹ لاک ڈاؤن نا پڑو کرینن ۔
یاتی مرے اسلام آباد نا 3 سیکٹر ٹی سمارٹ لاک ڈاؤن خلننگانے۔ سیکٹر جی 11 ٹو، سیکٹر جی 7 تھری ٹی اِرا اسکول ام بند کننگانو۔ ڈی سی اسلام آباد نا پاننگ نا ردئٹ 32 بھلو ہوٹل، 47 دوکان و اسہ ورکشاپ اس ام بند کننگانے ۔
پاکستان ٹی دا وختا 666 آن گیش پین پوسکنو کیس رپورٹ مسونو۔ دا وختا تیوی پاکستان 3 لکھ 18 ہزار 932 کیس روپورٹ مسونو۔ گدرینگوک آ 24 گھنٹہ ٹی تیوی پاکستان ٹی 12 بندغ کرونا آن بیران مسونو۔ دا وختا غٹ بیران مروک آک 6 ہزار 570 آن گیش مسونو ۔
یاتی مرے تیوی جہاں ٹی کرونا آن بیران مروکا بندغ آک 10 لکھ 77 ہزار 495 آن گیش ءُ۔ اندن 3 کروڑ 74 لکھ 67 ہزار آن گیش بندغ کرونا وائرس آن زیمی ءُ۔
بلوچستان نا زند کُنوک آ سڑک آک
ٹی بی پی سرگپ
اسہ غیر سرکاری تنظیم ئسے نا حساب نا ردئٹ بلوچستان ئٹ بیرہ اگست 2020 نا تُوہ ئت 944 سڑک نا ویل آک مسونو۔ ہرانا مطلب کہ بلوچستان ئٹ ہڑدے 30 سڑک نا ویل مریرہ۔ دا پن کروک ویل آتیٹ 143 بندغ بیران و1470 بھاز ٹپی مسونو۔
بلوچستان نا سڑک آتیا بیرہ اگست نا تُوہ ئٹ مرگ ئنا ناچ برجاء اَلو بلکن جولائی نا تُوہ ئٹ ہم 1099 ویل آک ریکارڈ کننگار، ہرافتیٹ 123 زند زوال مسر اندن 1462 بندغ ٹپی مسر۔ اندنو حساب جون ئنا تُوہ ئٹ ہم خننگ مریرہ، ہراتم 949 سڑک ویل ئٹ 109 بیران و 1433 ٹپی مسر۔
اسہ مہذب ءُ چاگڑد اسیٹی دا حساب آک اسہ دمدستی رکھوک گام اس ارفنگ کن بھاز ئسر ولے بلوچستان ئٹ گواچن داڑان چَپ ءِ، انتیکہ دائسکان سڑک آتا حالیت ءِ جُوان کننگ و ویل آتا توننگ کن ہچو سوگو ءُ گام اس ارفنگتنے۔
بلوچستان نا دہ یک آتیا تالان بد حال سڑک آک، ویل آتا تیوہ غاتیان بھلا سوب ءُ۔ دا سڑک آتیان زیات بدحال 813 کلومیٹر مرغن این-25 سڑک ءِ، ہرادے آر سی ڈی کسر ہم پاننگک۔ دا سڑک ءِ سی سال مالو کم آ ٹریفک کن ٹہیفنگاسس، ولے مسہ دہ یک گدرینگ آن گڈ ہم اینو دا کسر ترند آ ٹریفک نا اِن و بر کن ءِ، ہراٹی تدوکا اِرا سال نا نیامٹ چین پاکستان اقتصادی راہداری نا کاریم تا سوب آن بے کچ ودکی مسونے۔ دا داسہ بلوچستان نا تیوہ غاتیان گٹ و تیوہ غاتیان بیم بش کروک آ کسر جوڑ مسونے۔ ولے دائسکان دا سڑک اِرا پارہ غان اِن و بر کن ءِ، بیدس داڑان کہ ہڑدے دا ہزار آ مسافر بس، مال گاڑی و زاتی گاڑی تیکن کاریم ئٹ ہتنگسہ ءِ۔
جون آن اگست 2020 نا ویل آتا حساب آ تجزیہ آن گڈ سما تمک کہ زیات ویل آک کچ آن زیات پُر کننگوک مال دروک گاڑی تا سوب آ مسونو، ہرافتیان زیات کچ سڑک آتیا ہتنگ نا ہم افس۔ اسہ پین بھلو سوب اس مسافر بس آتا مال دننگ کن کاریم اٹ ہتنگ ءِ، سد آ بیرل پیٹرول و ایلو تیل تا دا مسافر بس آتا چھت آتیا تخنگک، ہرافتا سوب آن بھاز آ خاخر لگنگ نا ویل آک مسونو ولے گاڑی تے ضابطہ اٹ ہتنگ کن کوالخوا تا پارہ غان ہچس کننگپک۔
دن انگا بیم بش کروک آ سڑک و ہڑدے نا ویل آتیان بیدس ہم دا کسر آ ایمرجنسی کن ہچو آسراتی اس اف و ویل آتیٹ ٹپی مروک آتے زیات مخلوق تینا کمک تینٹ نا ردئٹ سد آ کلومیٹر مُر ہسپتال آتے اسکان دننگا نا کوشست کیرہ، ہرافتا سوب آن بھاز آ ٹپیک بچپسہ۔
بلوچستان نا ساڑی حکومت 2019 ئٹ پڑو کریسس کہ بنائی دراخی کمک تننگ کن بلوچستان نا سڑک آتیا بھلو کچ اسیٹی میڈیکل سینٹر ٹہیفنگو ولے دائسکان دا پڑو آ مُستی کاریم کننگتنے و ہر تُوہ سد آ زند آتا زوال مننگ نا لڑ برجاء ءِ۔
داڑے بیرہ صوبائی حکومت بے لائخی نشان تننگ اف بلکن بنجائی حکومت ہم این-25 کسر ءِ شابیت کریسہ چار پارہ غان اِن و بر کن ٹہیفنگ نا فند آتے توروک ءِ۔
ستمبر نا تُوہ ئٹ بلوچستان حکومت اسہ آر ایف پی ( ریکوسٹ فار پروپوزل) ئسے نا اشتہار ءِ شینک کریسس ولے ایلو کنڈا بلوچستان حکومت نا پارہ غان دا اشارہ تننگا کہ بنجائی حکومت نا پارہ غان فنڈ آک پد تمنگ نا گواچی ءُ۔
بلوچستان ئٹ بندغی زند نا خواست کم کننگانے، بلوچستان نا تیوہ غا چاگڑدی بشخ آک بُس کاری و بندغی زند نا بے قدری نا پارہ غا دو مریفنگ ءُ۔ سڑک ویل آک مخلوق نا ویل آتیٹ ودکی نا اسہ پین سوب اس جوڑ مسونو۔
داسہ وخت بسونے کہ دا ویل ءِ خواست نا بنماس آ ایسر کننگے و اسہ مُرغنو وخت اسیکن ایسری اس کشنگے۔
راسکوہ ادبی دیوان نوشکے نا پارہ غان براہوئی بولی نا بوگ شوگی شاعر عبداللہ جوہر نا شرفٹ مشاعرہ اس ہڈ تننگا۔
راسکوہ ادبی دیوان نوشکے نا پارہ غان مستونگ آن تعلقدار براہوئی بولی نا بوگ شوگی آ شاعر، “ دے ٹک ادبی دیوان مستونگ “ نا نائب صدر عبداللہ جوہر نا شرف اٹ اسے مشاعرہ دیوان اس اڈ تننگا۔
مجلس نا کماشی ءِ راسکوہ ادبی دیوان نا بنجائی آرگنائزنگ کمیٹی نا باسک اسد بلوچ کرے۔ ایلو مہمان آتیٹی مستونگ آن دے ٹک ادبی دیوان مستونگ نا صدر ہدایت فدا، اے جی بلوچ، ثناء ثنائی و عمران زیب اسک اسر۔
راسکوہ ادبی دیوان نوشکے زون نا احمد کرار اسٹیج نا ذمہ واری تے دوئی کرے۔ اندن یوسف بلوچ کلام پاک نا تلاوت آن مجلس نا بناء کرے۔ اوکان گڈ نعتیہ کلام احمد یار ارمان بنفے۔
مشاعرہ ٹی بخش ہلوکا شاعر آتا لڑ دا وڑ ٹی ئس؛ عبداللہ جوہر، اے جی بلوچ، ثنا ثنائی، عمران زیب، ضیاء جان فاروقی، گل زمان گل، پروفیسر دستگیر صابر، اسد بلوچ، شاہ جی گل شاہ، سلام اسیر، جلیل زیب، داد محمد جواد، ابراہیم ابرار، قمبر قیس، طارق عاصم، عیسیٰ نادان، عاقل بلوچ، عاطف مجاز، یحییٰ دوست، سلال حسرت، احمد کرار۔
مجلس نا کماش اسد بلوچ و ایلو مہماناک ہیت و گپ کرسٹ پاریر کہ راسکوہ ادبی دیوان بلوچ ادب نا ہمو اولیکو ادارہ پاننگ مریک کہ ہرا گدرینگوک آ سی (30) سال آن بلوچ ادب نا مونی ہننگ کن اونا شونداری کن کاریم کننگے ولے جہانی دین کرونا وائرس نا سوب آن ہراڑے غٹ جہان ٹی ہر وڑ ئنا کاریماک سلوک ئسر اندن ادب نا پڑا ادبی پروگرام و مشاعرغاک ام مننگ الور ولے دا اسے اُست خوشی نا ہیت اسے کہ اسے وار ولدا ادبی کاریماتا بناء مس ہرافک برجاء ءُ۔
مجلس نا گڈ سر ٹی راسکوہ ادبی دیوان نوشکے ہنکین نا پارہ غان جنرل باڈی مجلس مس ہراٹی بروکا کونسل سیشن کن کونسلر آتا گچین کاری مس۔
بلوچستان نا علاقہ چمن ئٹ عوامی نیشنل پارٹی نا صوبائی پریس سیکرٹری اسد خان نا بیگواہ مننگ نا برخلاف پنچمی دے آ ہم آل پارٹیز و تاجر اتحاد نا برانزی تولنگ برجاء۔
برانز چمن کوئٹہ کسر مال روڈ آ ڈی کمپلیکس نا مونا برجاء ءِ، و اسد خان نا یلہ مننگ اسکان دا برانز ختم مفرو۔
گیشتری حوال آتا رد ئٹ اے این پی نا صوبائی پریس سیکرٹری اسد خان اچکزئی نا بیگواہ مننگ نا برخلاف پنچمی دے آ ہم چمن نا شار ئٹ آل پرٹیز، عوامی نیشنل پارٹی، پشتونخوامیپ، جمعیت علماء اسلام، جمعیت علماء اسلام نظریاتی، جماعت اسلامی، مظلوم اولسی تحریک، و تیوہ غا سیاسی جماعت آتا پارہ غان چمن کوئٹہ بین الاقوامی شاہراہ مال روڈ آ ڈی کمپلیکس نا مونا برانزی تولنگ برجاء ءِ۔
ڈپٹی کمشنر کمپلیکس نا مونا برانز ٹی سد آ بندغ آک ساڑی ءُ، برانز کروک آتا پاننگ ءِ این پی نا صوبائی پریس سیکرٹری اسد خان اچکزئی نا برمتہ مننگ ءِ 16 دے گدرینگانے ولے بے لائخ آ حکومت داسکان اسد خان نا پٹنگ کین چُپ ءُ سیل کروک جوڑ مسونے ہرا حکمران آتیکن سوج ئسے نا درشانی ءِ۔
آل پارٹیز تا پارہ غان ڈپٹی کمشنر آفس نا مونا برانز ءِ 5 دے مریک ولے حکومت نا پارہ غان ہچو گام اس ہرفنگسہ افس، ولے دا برانز اے این پی نا صوبائی پریس سیکرٹری اسد خان نا یلہ مننگ اسکان برجاء مرو۔
برانزی تولنگ ئٹ سد آ بندغ آک ساڑی ءُ۔ آل پارٹیز نا راہشون حکومت آن خواست کریسہ پارے اسد خان ءِ دمدستی تون یلہ کیر ایلو وڑ ئٹ تیوہ بلوچستان نا ضلع تیٹی برانز پین ترند مرو ہرانا ذمہ وار بلوچستان نا حکومت ٹینٹ مرو۔
روس نا کوشست 10 سائت برجاہ مروکا مذاکرات ٹی آرمینیا و آذربائیجان جنگ بندی آ امنا کریر۔
روسی وزیر خارجہ سیرگئی لاوروف جنگ بندی نا پڑو کریسہ پارے کہ آرمینیا و آذربائیجان دمدستی ئٹ جنگ بندی آ امنا کریر، ہراڑا عمل کننگ 10 اکتوبر شام ئنا 12 آن بناء مرو۔
روسی وزیر خارجہ نا پاننگ ئس کہ ہڑتوما ملک آک جلہو آتے توننگ، کسفنگوک آتا جون و کیزی تا ہڷ و تس آ ہم امنا کرینو۔
روسی وزارت خارجہ دا ہیت ءِ ہم پک کرینے کہ آذربائیجان و آرمینیا، یورپ ٹی سلامتی نا تنظیم و اوار ٹولی تا صدر نا ثالثی تون اوار معاہدہ نا بنماسی اصول آتا ٹہیفنگ و جیڑہ غاتا ایسری کن آڑتوما شرہ کروک آک با مقصد و سوگو ءُ مذاکرات نا بناء کرور۔
روسی وزیر خارجہ سیرگئی لاوروف زور شاغیسہ پارینے کہ کاراباخ ٹی چک تاڑ نا ایسری کن ہڑتوما شرہ کروک آک معاہدہ شابیٹی ئٹ جتا جتا امنائی کرور۔
دا بشخ آن گُڈ آذربائيجان و آرمينيا ٹی باضابطہ وڑ ئٹ اِرا پارہ غان مذاکرات نا بناء مرو۔
تدوکا دے روس نا دارالحکومت ماسکو ٹی ناگورونو کاراباخ ڈیہہ ہڑتوما شرہ کروکاتا نیام ئٹی جیڑہ نا ایسری کن آرمینیا و آذربائیجان نا نیام ئٹی ہیت و گپ ئنا بناء مسوسس۔
آرمینیا و آذربائیجان نا نیام ئٹی معاہدہ روسی صدر نا کنڈان جنگ بندی آن گُڈ عمل ٹی بسونے۔
یاتی مرے کہ تدوکا تو 27 ستمبر آن ہڑتوما ملک آتا نیام ئٹی کوزہ مروک علاقہ ناگورنو کاراباخ نا جیڑہ ڈیہہ ٹی آرمينيا و آذربائيجان نا فوج نا نیام ئٹی جلہو آک بناء مسوسر ہراڑان داسکان بھاز آ شار تون اوار سد آ فوجیک بیران مسونو۔
بلوچستان نا علاقہ ہرنائی نا تحصیل شاہرگ ئٹ کولا کانڑ نا ویل آن اسہ کارندہ ئس بیران مس و اسٹ بھاز ٹپی مسونے، ہندی مخلوق تینا کمک تینٹ نا ردئٹ کہوک و ٹپی مروک بندغ ءِ کشار و ہسپتال آ دریر۔
ویل پی ایم ڈی سی نا علاقہ نمبر 94 ئٹ ٹھیکیدار عمر خیل، پیٹی ٹھیکیدار عالم جان نا لیز ئٹ مس۔ ہراٹی پشین آن تعلقدار کارندہ نصراللہ مار محمد اچکزئی نا کسک و پشین آن تعلقدار کارندہ نصیب اللہ مار جانان اچکزئی نا، بھاز ٹپی مس۔
ہندی مخلوق تینا کمک تینٹ نا ردئٹ جون و ٹپی بندغ ءِ کشار ہسپتال آ سر کریر۔
یاتی مرے کہ داکان مالو ہم بے آسراتی و المی ازباب آتا مفرنگ نا سوب آن لیز آتیٹ ویل آتا سوب آن بھلو کچ اسیٹی کولا کشوک کارندہ غاک تینا ساہ تیان دُو ارفینو۔
