دا لانگ مارچ ءِ بہاو الدین زکریا یونیورسٹی نا بلوچ خوانندہ غاک اسکالرشپ آتا ایسری و بلوچستان کوٹہ ءِ کم کننگ نا برخلاف کننگو۔
بہاو الدین زکریا یونیورسٹی ملتان نا پارہ بلوچستان و فاٹا نا کوٹہ و اسکالرشپ آتے ایسر کننگ آن بلوچ کونسل ملتان نا پارہ غان دانا برخلاف برانزی مچی کننگ آن پد یونیورسٹی نا مون آ بین ہڑتالی کیمپ خلننگا، دا کیمپ ءِ 40 دے پورو مننگ آن پد اسلام آباد کن لانگ مارچ نا پڑو مس۔
لانگ مارچ اینو بہاو الدین زکریا یونیورسٹی ملتان آن سر ہلیسہ اسلام آباد کن روان مس۔
ٹی بی پی نا نمائندہ بلوچ کونسل ملتان نا چیئرمین وقار بلوچ آن دا بابت سوج کرے کہ اسلام آباد آ اننگ نا نما مسخت انت ءِ گڑا وقار بلوچ نا پاننگے کہ ننے 40 دے مریک کہ نن یونیورسٹی نا مون آ تولوک اُن ولے کس ننا توار ءِ بنتو اندا سوب آن نن بیوس مسون کہ اسلام آباد آ کان تینا توار سر کین۔
او مونی پارے کہ بے بختی نا ہیت دادے کہ اسلام آباد آ تولوک آ حکمران آک اسلام آباد آن پیشن بش مروکا توارے بنپسہ۔ اندا سوب آن نن اسے وار ولدا اسلام آباد کن لانگ مارچ کننگ اُن کہ اسلام آباد نا حکمران آتے باور کرفن کہ بلوچ ورناک اینو ام خواننگ خوارہ، راہبند و قانود نا ردئٹ توار ارفنگو۔
یاتی مرے دا ویل امو وختا بناء مس ہرا وختا بہاوالدین زکریا یونیورسٹی انتظامیہ نا پارہ غان اسے نوٹیفکیشن ئسے نا ردئٹ بلوچستان و فاٹا نا اسکالرشپ و خاص انگا سیٹ آتے ایسر کننگ نا پڑو کننگا۔
بابو عبدالرحمن کرد 1922ء (بھاز جاگہ 1923ء نوشتہ ءِ) دشت بولان نا علاقہ جلب گندان ٹی ودی مس۔ بنماسی خواننگ کولپور بولان آن بندات کرے، مونی خواننگ کن اسلامیہ ہائی اسکول کوئٹہ غا بس انداکان دہ جماعت پاس کرے۔
بابو کرد خواننگ نا وخت آن ادب و شاعری کننگے بندات کرے ولے 1940 آن او سیاست ٹی ام اوار سیاست نا پڑ آ بس۔ اندا وختا سرکاری نوکری ام کننگ ئس۔ کوئٹہ چھاونی ٹی مشین آپریٹر اوکان گڈ بلوچستان سیکریٹریٹ ٹی کلرک نا نوکری ام کرے۔ ولے مزاحمتی سیاست و ادب نا طب و مزاج نا سوب آن سرکاری نوکری یلہ کریسہ باقاعدہ سیاسی و ادبی کاریم تیٹی اوار مس۔
قلات اسٹیٹ نیشنل پارٹی آ پابندی خلننگ آن پد 1951 ٹی نواب اکبر خان بگٹی نا کماشی ٹی ” دیما رؤک اولس” نا پڑ آن عبداللہ جان جمالدینی و غلام محمد شاہوانی تون اوار ادبی و سیاسی کاریم کرے۔
نوزدہ سد و پنجا و شش ٹی پرنس آغا عبدالکریم نا دئے سالہ بندی نا ایسر مننگ آن پد اونا کماشی ٹی ” استمان گل” نا جوڑ کننگ آ اوار اس۔ 1956 ٹی استمان گل نا نمائندہ نا حیثیت اٹ لاہور آ اڈ ہلوکا کنونشن آ ساڑی مس۔ اندا کنونشن ٹی استمان گل، خدائی خدمت گار، سندھ عوامی محاذ و ایلو قوم پرست پارٹی تا اواری آن نیشنل عوامی پارٹی (نیپ) جوڑ کننگا۔ بابو کرد اندن نیپ تون اوار مس۔
ایوبی مارشل لاء نا دور ئس، 1956 نا بلوچ راجی جہد نا وخت آ بولان ٹی سم کاری نا کیس ٹی بابو عبدالرحمن کرد ءِ اونا سیال وارث آتون اوار شاہی قلعہ لاہور ٹی بندی کریسہ اذیت تننگا۔ اندن 1963 ٹی جنرل ایوب خان نا بلوچستان آ بننگ آن بولان ٹی ایوب و اونا آمریت نا برخلاف چاکننگ نا کیس اٹ بابو کرد ءِ اونا ایلم تون اوار کوئٹہ قلی کیمپ آ بندی کننگا۔
عکس ئٹ: سردار عطاء اللہ مینگل، میر غوث بخش بزنجو، سردار محمد زمان محمد شہی، مہر گوہر خان زرکزئی، بابو عبدالرحمٰن کرد، ٹکری غلام نبی پلیزئی مینگل، میر عبدالکریم گمشازدئی مینگل، میر محمد نوہکزئی مینگل
ہفتاد نا دہک ٹی نیشنل ڈیموکریٹک پارٹی “این ڈی پی” جوڑ مس گڑا عبدالرحمن کرد این ڈی پی تون اوار مریسہ بلوچستان نا صدر گچین کننگا۔ اندن اندا وختا اپوزیشن پارٹی تا یکجہی آن ” قومی اتحاد بلوچستان” نا کماش ام مس۔
نیشنل ڈیموکریٹک پارٹی ( این ڈی پی) و ایلو کہی پارٹی تا اواری آن “عوامی نیشنل پارٹی” جوڑ کننگا، بابو کرد ہفت سال اسکان اے این پی بلوچستان نا صدر گچین مس۔ داڑان ابید بنجائی نائب صدر، بنجائی جوائنٹ سیکرٹری ام مس۔ گڈیکو وخت اسکان نیشنل عوامی پارٹی نا مرکزی کمیٹی نا باسک ئس۔
بابو عبدالرحمن کرد ادبی و سیاسی پڑ آن ابید صحافتی پڑا ام کاریم کننگ ٹی مسونے۔ الحنیف، استقلال، معلم بلوچستان آن صحافت نا بندات کریسہ نوائے وطن، ماہتاک بلوچی، نوکین دور، ایلم و اولس بلوچی ٹی ام کاریم کرینے۔ بلوچی دنیا، سنگت، بام، مشرق، جنگ و ایلو رسالہ غاتیٹی اونا نوشتانک آک چھاپ و شینک مسونو۔
نوزدہ سد و پنجا و شش ٹی “نوائے بولان” نا پنٹ پانزدہ دے ئی اخبار اس مستونگ اوکان پد کوئٹہ غان کشننگ نا بندات کرے ولے اکتوبر 1958 ٹی ایوبی آمریت نا وختا ” نوائے بولان” نا ڈکلیریشن ءِ ختم کریسہ بابو عبدالرحمن کرد ءِ بندی کننگا۔ یلہ مننگ آن پد اسے وار ولدا ” نوائے بولان” نا بندات کرے ولے 1960 ٹی ولدا بندی کننگا ہرانا سوب ” نوائے بولان” نا کاریمک سلیسر۔
نوزدہ سد و شست و ہفت ٹی بابو ایلو ادبی بندغ آتا کمک اٹ براہوئی اکیڈمی نا بنیات تخیسہ اونا بانی و اولیکو کماش گچین کننگا۔
بابو عبدالرحمن کرد تینا ادبی، سیاسی و صحافتی زند ٹی کہی کتاب آتے لکھانے۔ دنکہ 1953ء ٹی بلوچ تاریخ نا بابت اونا اسے چنکو کتابچہ اس “ہمارا کاروان” نا پنٹ اردو بولی ٹی چھاپ و شینک مس۔
اندن 1966 ٹی “براہوئی ادب” نا پنٹ اونا کتاب اس چھاپ و شینک مس۔ 1996 ٹی
براہوئی بولی ٹی اونا غزل و نظم آتا اسے کتاب اس ” شف گروک” نا پنٹ چھاپ و شینک مس۔
بابو عبدالرحمن کرد 1958 آن ہلیس 1967ء اسکان پورو بیست سال بندی مریسہ جیل ٹی گدریفے۔ اندن بابو عبدالرحمن کرد پنچ شمبے نا دے 9 اکتوبر 2003 ٹی کذیت کریسہ دا دنیا ءِ یلہ کرے۔
بلوچستان نا علاقہ مستونگ، دشت ئٹ روڈ شکست اسیٹی مُسہ بندغ جاگہ غا بیران و اِرا بندغ ٹپی مسونو۔
روڈ شکست کار گاڑی و ٹینکر اسینا اسٹ ایلو تون ڈک لگنگ آن مسونے۔
شکسٹ ئٹ کہوک بندغ تا جون و ٹپی تے دمدستی تون سول ہسپتال کوئٹہ غا دننگا۔
یاتی مرے بلوچستان ئٹ ہردے روڈ شکست آتیٹ بھازا بندغ آک ٹپی و بھازاک بیران مریرہ۔ جتا علاقہ تیٹ دا شکست آتا گواچی مروک بندغ آک وخت ئنا زی آ دارو درمان مفرنگ آن ہم بیران مریرہ۔
بلوچستان یوتھ اینڈ سول سوسائٹی (بی وائی سی ایس) نا پارہ غان ستمبر 2020 نا تُوہ ئنا رپورٹ نا رد ئٹ بلوچستان نا روڈ آتیا 1206 شکست آتیٹ 128 بندغ بیران و 1720 ٹپی مسونو۔
شون ادبی دیوان خضدار شاخ ئنا کنڈان شہید عبدالعزیز راہی صاحب نا یاد ئٹی اسہ مشاعرہ دیوان اڈ تننگا، ہرانا مہمان خاص شہید عبدالعزیز راہی نا جند ئنا فرزند ئس و اعزازی مہمان ڈاکٹر عبدالباری آجو، و شہید راہی نا ایلم پروفیسر عبدالواحد مینگل ئسر۔
شون ادبی مشاعرہ دیوان نا کماشی ءِ محمد انور بلسم کرے، اسٹیج سیکریٹری شیخ سراج و شاعر آتیٹ ڈاکٹر باری آجو، پروفیسر عبدالواحد مینگل، ڈاکٹر خلیل احمد مینگل، محمد انور بلسُم، شیخ سراج، آغا ظاہر، ایان شاہ، عاقب بلوچ، بیبرگ بلوچ، شہزاد بلوچ، خالد حفظ و رحمان و ایلو سنگتاک ئسر۔
مشاعرہ نا مہمان خاص ڈاکٹر خلیل مینگل پارے کہ شہید عبدالعزیز راہی صاحب بروکا نسل نا ہرا سرسوبی تا پیش گوئی تہ کریسس ہمو اینو عملی وڑئٹ کنا مونا پاش مننگو۔
مشاعرہ نا گُڈ سر ٹی شون ادبی دیوان خضدار شاخ ئنا کماش محمد انور بلسم تران کرسا پارے کہ خضدار نا پڑ ہر سرحال ئٹ تینا مٹ تینٹ ءِ۔ داڑے ننے قلم کار ادیب و دانشور تو اوار پین بھلو ہستی رسینگانے و مون مستی ہم نن ہندا کوشست ءِ برجا تخون کہ نن ہرا تزبے نا خوارتے پٹینہ اُست ئنا حُب ئٹ دا اومیت ارے کہ نن ہندنو اسہ تزبے ئس خلّون تیار کرون اوکان گُڈ ادبی مشاعرہ دیوان ایسر مس۔
امریکی صدر ڈونلڈ ٹرمپ کورونا پازیٹیو مننگ آن گڈ تدوکا جمعہ آن ہسپتال ئٹ ئس۔ او وائٹ ہاوس آ اسیکہ وا بسونے واہم ڈاکٹر آتا پاننگے کہ او دائسکان سرجم دراخ متنے۔
امریکی صدر ڈونلڈ ٹرمپ ءِ والٹر ریڈ میڈیکل سینٹر ئٹ چار دے اسکان کووڈ نوزدہ کن ہلہلہ علاج آن گڈ دو شمبے نا دیگر آ رخصت تننگا۔
ماسک بینوک ٹرمپ ہسپتال نا بھلا درغ آن پیشن بس، اوڑے ساڑی حوالکار آتیا دوکے سرفے و میرین ون ہیلی کاپٹر ئٹ سوار مریسہ وائٹ ہاوس کن سر ہلک، ہراکان تدوکا جمعہ غا کووڈ نوزدہ پازیٹیو نا پاش مننگ و ناجوڑی آن گڈ ہسپتال آ دننگاسس۔ او پارے “تیوہ غاتا منتوار۔” واہم او حوالکار آتا ہچو سوج ئسے نا ورندی تتو۔
وائٹ ہاوس سرمننگ آ دمدستی تون او تینا ماسک ءِ کشیسہ جیب ئٹ تخا و عکس کشفے۔ دا نیامٹ وائٹ ہاوس نا کارندہ غاک اودے مبارکبادی تننگ کن بریسہ کریر۔
دوارہ صدر ٹرمپ نا اسہ ویڈیو اس شینک کننگا ہراٹی او وائٹ ہاوس نا بڑز تلہ غا سلوک ءِ ولے او ماسک بینوک اف۔ دا ویڈیو ئٹ ٹرمپ مخلوق ءِ کورونا وائرس آن بیم نا گواچی مفرنگ نا پنت تننگے۔
ای حیرانی اٹ سرمٹ نا ڈغار آ سنگ مر مر نا خل آ اُراٹ، شیشہ نا بروفتہ آغا کے خناٹ تینا خالی آ دو تیا اُراٹ ہرافتیان کے دا خل یلہ مسوسس، تینا خُلوکا است ءِ چپ تریسہ شیشہ نا بروفتہ غاکے مُچ کریٹ۔
کنا سُرنگ آن کنا جان اٹ ساہ تما، کنا مزغ آن اسے بھلو باریم اس شیف تما، ہندن داسہ ای دفتر اٹ دانگ اینگ لپوسنگء بنا کریٹ، دریچہ نا خڑکا ہناٹ، روشندان تے اُراٹ کل بند ئسر۔
درگہ نا جاچ ءِ ہلکٹ ملوک ئس۔ اونا کاٹم اٹ اسے بھلو بلف اس لگاکہ، رہی آ اسے بھلو الماری اس تخوک ئس، اونا باہ ءِ ملاٹ اُراٹ اونا تہٹی ہم ہچ الو، بینچ آ دو خلکٹ اُراٹ او اسل بے جان اس، میز ہم دو خلکٹ اٹ او میز اس ئسکہ، کڑسی آ تولنگ آ مست ای ہمو دتری بلوچی کشیدہ کروکا گُدے اُراٹ، ہڑتوما دوتیٹی گدے ہرفیٹ اودے جُوان چنڈاٹ اودے ڈغار آ تالان کریٹ و تل تل آ تے نظر شاغاٹ۔ داسہ کنا ایمان جاگہ غا بس۔
او اسے گیچن و زیبا ءُ گد اس ئسکہ ہرانا رہیک رنگی آ دسک اٹ خوڑت کشیدہ کننگاسر ولے دتر نا بھاز انگا لپ آک اونا ٹمکوکا شیشہ غاکے بے نور کریسر، اونا زیبا غا رنگی آ دسک آکے دتر نا خیسن آ رنگ آک بے رنگ کریسر، بھاز انگا جاگہ غاتیان گد ئنا دسک آک چکوک ئسر، بلوچی آ گد آنا کشیدہء اُریسہ اُریسہ بے توار کنا با آن پیش تما اے مہروان آ خدا ننا امرءُ گیچن ءُ ربیدگ ئسے، اخس زیباء دتر اٹ اسٹء ولدہ ھم اننگ نا لاہخء دا امرو گودی سے نا مسونے، اخس اُست نا ہُب اٹ داڑا نن او دے خواری کرینے، ابوئے ابوئے بخت داڑا ہم دتر نا لپ آکو اسے وار اتون گد کنا دو آن یلہ مس دنکہ اسٹ اس دادے کنا دو آن چکے، خلیس آن بے ساہ مسوٹ، باہ کنا پاٹ آمبار بارس، دوک کنا چوٹ مننگ ئسر کہ ای زو زو تینا پرس، تینا بلوچی آ بھلا گدے ہرفیٹ مونء چر مُٹ کریٹ دفتر آن پیشتماٹ۔ جوانو ٹکر اس مُر سلیسٹ، گھڑی آ تینا اُراٹ تینا ایلم نا بننگ کن کسر اُروک مسوٹ، ہراتم آن کے کنا ڈیوٹی ہنداڑے لگانے کنا اسے سوشل ءُ ایلم اس کنے دیک ہتیک، کنا ڈیوٹی وخت اس سہب ئتون وخت اس بیگہ تون لگاکہ ولے اینو خدا نا شکرے کشاٹ جوان ءِ کہ اینو کنا ڈیوٹی نن ئنا ہلو، نہ تو کسکوٹہ۔
ڈیوٹی نا بناء ٹی ای جتا جتا وارڈ آتیٹی ناجوڑ آتا اریفنگ اوتیتو حال حوال کننگ کنا زند ئنا ویل و ڈکھ آکے ایسر کننگ نا اسے سوب اس ئسکہ۔
منہ وخت آن پد حالیت آتا خراب مننگ آن ہسپتال اٹ چندی نرس و ڈاکٹر آتا چھٹی نا سوب آن کنا ڈیوٹی وارڈ آتیٹی ہم دے اِرا دے اکن لگاکہ۔
اسہ دے مڑڈہ خانہ ٹِی بے وارث آ لاش تیان اخس کے لیپ و کمبل ٹپی ٹوری جون تا پُچ چوٹ صدری کوٹ انت اس کہ مُچ کننگاسس ہمو کلء خلق اٹ مسہ دیے ای او مفت میڈیکل کیمپ اسیا راہی کریٹ، دیچہ انتئے ہمو دتری آ بلوچی گد ہموڑے سلیس اس، داسہ بیدس دلیل آن کنا اُست گواہی تسکہ، کنا خلیس ہندا بلوچی آ گد ئنا سوب آنءِ ای است اٹ تینے تینٹ پاریٹ کہ مڑدہ خانہ نا ہمو اسٹور اٹ ہچ او حالیت اسیٹی ہنپرہ ہراڑے کہ دتری آ بلوچی گد تخوکء۔
ایلم نا موٹر نا پیمپ ئنا توار مس، ای خلیس نا سوب سوچ آتیٹی مین ہناسٹ، دودینگاٹ گاڑی نا درگہ ءِ ملاٹ توسٹ، تولنگ تون رنگ کنا پوشکن ہڑسینگاسس، دم کنا بند مسس، ایلم سوج کرے خیرے ایڑھ نی خلوک خننگیسہ؟ اگہ ویل اس ہرے کنے پا، ای ہیت ءِ دانگ اینگ ول تسوٹ، شام آ اِرغ آکے شاغار اِرا باخو کنگٹ است کنا پرمس، خاچنگ نا وخت آ تینے آ تینا گُدے شاغاٹ آسرتی اس خناٹ۔
ایلو دے ڈیوٹی آ بسوٹ، ایم ایس صاحب سختی ٹی ننے وخت ئنا قدرے کننگ نا پاریسس، بننگ تون خذمتءِ خلق اٹ گٹ مسون، اینو کنا سنگت نازل قول کریسس کہ او ہم خذمت خلق اٹ تینا پن نوشتہ کیک۔ نازل ہم کنتون اوار میڈیکل نا خوانندہ او مسڑ اس ئسکہ۔ اونا لمہ باوہ بیمار ئسرہ، تینے آن اسٹ اس ئسکہ، وطن اٹ ہڑدے نا جنگ و جیڑہ ورنا تا بیگواہی، اڑدے ٹپی ٹوری آ جون تا دو بننگ خلنگ، پُلنگ نا سوب آن میڈیکل کالج ءِ ہلا، اودے انسانیت نا خذمت کننگ نا چنکی آن شونک ئسکہ ولے او اینو اسکان مفت میڈیکل کیمپ آتیٹی دنو خذمت کتویسس۔ داسہ اونا لمہ باوہ نا تب مچے بھاز جوان ئس، او اینو بننگ نا قول کریسس۔
ای دفتر آ بسوٹ ولے نازل بتو، ای کڑسی آن بش مسوٹ مڑدہ خانہ نا تہٹی پترینگاٹ، ہمو جاگہ غا ہناٹ ہراڑے دتری آ بلوچی گد تخوک اس۔ ای گدے خننگ تون ولدا خلیسٹ ہندا خلیس آن وارس دفتر اٹ وارس مڑدہ خانہ ٹی پترینگاٹہ ہراڑان خلوکا استءِ مچے بھاز کرار رسینگاکہ۔
پیشن ہننگ بننگ نا وخت آ اسے پیرو بلہ اس خناٹ ہرا کے کنا دفتر نا درگہ غا جوکہ ئس، اریفیٹ بلی نی داڑے انت کننگس؟
ہچ کپرہ کنا مسڑ بس دم کشیوہ۔
گڑا نی وارڈ یا بینچ آتیا انتئے تولپیسہ ؟
بلہ ؛ حال و کوٹو آتیٹی ناجوڑ ٹپی آ بندغ آکو، اُست خراب مریک۔
ہسپتال نا تہٹی گڑاس ہندنو کیمپ جوڑ کننگاسس ہراتیٹی ہمو بندغ آک رہینگارہ ہراکے سرکار مُچ و لغت اٹ و اوتا خلق آتیان کشاسس و اوکے تینا زور آوری ٹی ہندا کیمپ آتیٹی توریسس، ہموتم اسکان کہ خلق آتیٹی قراریءُ حالیت اس جوڑ مف۔
بلہ نا پارہ غا اُراٹ خڑینک آکے تینا سفا کریسہ پارے او کنا مسڑ ہمو وارڈ آتیٹی اسے ایلوڑان ود ڈکھی آ بندغ آک تمانو، اوتا ڈھک آکے خنیسہ کنا اُست خوڑت مس، ای تنہا مننگ خواوہ۔
ای اودے پاریٹ بلی داڑے بر کنا دفتر اٹ توڷ۔ بلہءِ سما الو ای اودے تینا خلیسءِ گو انگ کن تہٹی ایسوٹ۔ او تینا گدے شیف کرے کنکے دعا کریسہ تہٹی بینچ ئنا زی آ توس۔ ای است جم مسوٹ، تینا کاریم ءِ بناء کریٹ۔
جٹ ئسے آن پد ای کاٹم ءِ بڑزا کریٹ خناٹ کہ بلہ نا حال بے وڑ مننگ اس، اونا خنک خڑینکی، اونا جوڑک بارن، اونا جان پاٹ آمبار ئسکہ، اونا خنک ہندا دتری آ بلوچی گد اٹ سخت ئسر، اونا مون زاڑچوبہ غامبار پوشکن مسوسس، او تینا ہڑتوما نکے بنچ آ مریفنگ آن مُست بارسوسس دنکہ مڑدہ خانہ ٹی تخوکو مڑدہ اس مرے۔
ای اوڑا ترند آن توار خلکٹ۔ بلی او بلی انت مس نے ولے او توار تتو، نہ تینا جاگہ غان سُرا، اندن ہمو گد آ اُریسہ کرے۔
کنے آ ولدا لڑزہ اس شولنگا، ای ہم تینے بلہ غامبار بے وس چائسوٹ، محسوس کریٹ دنکہ اوڑامبار بارنگٹ، خلیس نا چُپ انگا ویل تینا کل ءِ باریم ءِ کنا کاٹم آ شاغنگ ئس۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
اُلاخ تُرندے لغام سُست اے مہار کشکا تو سؤار تّمک
شؤان نا پام اف بُزگل اے تہ اندا کُر اٹ زو نہار تّمک
نا ہیت خن تا ولے کنا ساہ دُن مروسوس تو باز جوان اس
جلّک نا تاؤ اٹ بروکا درسم بخمل تو چِووہ اوار تّمک
زمانہ اندون الیک وختس حساب تینا کہ کچ افّفک.
اراڑے سجدہ کہ اچ روا اف مُسُن اموڑے تیدار تمک
شوگیر نن تا اولیکو پاس اے نا خنک خیسونی کرینو
کڑو کڑو کیس استار تے کُل اے گُڑا نا نن تے سہار تّمک
دیدن ناشوق اٹ پند خلیسہ ڈکھ آ تیان پاناد کریسہ
اونا گدان اے سفیر انتے نن سر مرینہ تہار تّمک
سفیر بلوچ
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچستان نا ضلع پنجگور نا پنی آ آرٹسٹ حفیظ گوہر نا شرف ئٹ بونستان پبلک لائبریری نا سنڈے سرکل نا سی و ہفتمیکو مجلس ہڈ تننگا۔
آرٹس نا جہان ئٹ بھلو پن اس چاہنگوک حفیظ گوہر تینا فن و جدوجہد نا بابت مجلس ئٹ ساڑی مخلوق ءِ چاہنداری تس و سوج آتا ورندی تس۔
مجلس نا ارٹمیکو بشخ ئٹ حفیظ گوہر نا آرٹس آک نشان تننگار، ہراٹی او ہر آرٹس نا ندارہ نا بابت مخلوق ءِ چاہنداری تس و اونا ٹہیفنگ نا سوب آتے پارے۔
پینل ڈکشن ئٹ موڈریٹر نا فرض آتے میرین ایسری تس، اظہر کمپئنرنگ تون مجلس ءِ مُستی درے و ایس ایس ٹی گورنمنٹ بوائز ہائی اسکول بونستان ناصر علی پارے کہ کم وسائل و بیدس کمک آن تینا فن ءِ مُستی دروک فنکار آتے دُروت پاوہ۔
مجلس نا ایسری آ حفیظ گوہر تینا دوست بروک آرٹس آتے بی پی ایل نا کارگشاد آتے ٹیکی کرے۔ و وخت ئنا کمبوتی نا سوب بی پی ایل مجلس نا ایلو بشخ آک ایسری تننگ متوس۔
رسینگوک حوال تا رد ئٹ انجمن تاجران بازار یونین نا نائب صدر حاجی عبدالغنی محمد حسنی، محمد اکرم باروزئی، پریم چند، طارق شاھوانی، طالب محمد ابراہیم تینا اسہ شینک کروکو بیان اسیٹ پارینو سکول ملینگ تون چُنکا و بھلا پرائیویٹ سکول آک لُٹ و پل ءِ بناء کریر۔
اوفتا پاننگے کہ کورونا وائرس آن بند ہشت تو ئنا فیس ءِ ہم چنا تا باوا لمہ آتیان ہلنگ ءُ، تعلیمی ادارہ غاتا بند مننگ نا سوب آن داسا مُسہ تو اکن ہم تیوہ آ سال نا فیس ءِ ہلیسہ ءُ، ہرا بھاز بھلو ناانصافی ئسے۔
چُنا تا لُمہ باوہ آک صوبائی و بنجائی حکومت آتیتون اوار اعلیٰ عدلیہ آن پرائیویٹ سکول آتا خلاف نوٹس ہلینگ نا خواست کرینو۔
اوفتا پاننگے کہ مستونگ تون اوار صوبہ ئٹ پرائمری اسکان و داڑان مالو میٹرک و یونیورسٹیک بشخ آتیٹ ملنگار، پرائیویٹ سکول تا بند و بست کرونا وائرس نا سوب آن تینا تعلمی کاریم تا بُس مننگ نا بدلہ ءِ چُنا تا لُمہ باوہ و خوانوک چنا تیان ہلنگ ءِ بناء کرینو۔
چُنک بھلا پرائیویٹ تعلیمی ادارہ آک ہشت تو ااسکان کرونا وائرس نا سوب آن تینا اسکول آتے حکومت نا پاننگ آ بند تو کریر، داسا بیرہ پین مُسہ تو اسکان اسکول آک ملنگ کیرہ انتئے کہ داڑان گُڈ یخ بناء مرو و ترند یخ آتیٹ سکول ملنگ مروفس ولے دا مُسہ تو ئٹی پرائیویٹ سکول آک چُناتیان تیوہ آ سال نا فیس ہلتنو بلکن اسکول آتا ملنگ تون نجی سکول آتا خواجہ آک لُمہ باوا آتے فیس تننگ کن بیوس کننگ ءُ۔
لُمہ باوا آتا پاننگ ءِ کہ چُنا تے تیوا آ سال خواننگ متو و کبینی نا دا وخت ئٹی تعلیم ءِ ہم پرائیویٹ ادارہ آک کاروبار ئس جوڑ کریسہ مخلوق نا سختی تیٹ ودکی کرینو۔
لُمہ باوا و خوانندہ آک بنجائی حکومت تون اوار اعلیٰ عدلیہ آن پرائیویٹ سکول آتا بند و بست نا دا لُٹ و پل نا دمدستی وڑ ئٹ نوٹس الینگ نا خواست کرینو۔
بلوچ اسٹوڈنس آرگنائزیشن نا پارہ غان نشہ نا برخلاف اسے برانزی مچی اس اڈ تننگا۔ دا مچی ٹی بی ایس او تون اوار بی ایس او پجار، بلوچستان نیشنل پارٹی، نیشنل پارٹی، مستونگ سول سوسائٹی، مستونگ گرینڈ الائنس ام بشخ ہلکر۔
مچی ٹی بی ایس او نا چیئرمین نزیر بلوچ، وائس چیئرمین خالد بلوچ، سیکرٹری جنرل منیر جالب، جوائنٹ سیکرٹری شوکت بلوچ، جہانگیر منظور بلوچ، بی این پی نا میر محمد حنیف رستم زئی، ملک عبدالرحمان خواجہ خیل، میر عبداللہ جان مینگل، بی ایس او پجار نا نثار بلوچ، نیشنل پارٹی نا میر سکندر ملازئی، مستونگ گرینڈ الائنس نا حاجی محمد انور شاہوانی تران کریر۔
تران کروک آک پاریر کہ اینو اسے منصوبہ اسینا ردئٹ بلوچستان ٹی نشہ ءِ تالان کننگ مننگے، و بلوچ ورنا تے نشہ نا گواچی کننگ ءُ ولے افسوس نا ہیت دادے کہ دا کاروبار ٹی ریاست و اونا کیرہ غا کاریم کروک آ ادارہ غاک اوار ءُ۔ سوج و فریشانی نا ہیت دادے کہ تیوی بلوچستان ٹی ہر گام آ سیکیورٹی چیک پوسٹ آک اریر ولے اوکان ابید ام ایران بارڈر آن ہلیس چمن اسکان دا منشیات امر دننگ مننگے۔
او مونی پاریر کہ بلوچستان ٹی و بلوچ ورنا تیٹی نشئہ تالان کننگ نا اسے مسخت دادے کہ دا ورناک نشہ نا گواچی مریر کہ حق و ساحل و وسائل آتیکن توار چست کپس ولے نن ریاست و اونا ادارہ غاتے دا پاننگ خوانہ کہ ہچو وڑ اسیٹی دا گڑا کن نن چپ تولپنہ، ہر حالیت ہر جاگہ نن دا نشہ نا خلاف توار ارفون۔
یاتی مرے برجاء سال نوشکے ئٹ نشہ نا برخلاف پبّی توار ارفوک ورنا سمیع مینگل ءِ گمانی نشہ نا سوداگر آک کسفیر، سمیع مینگل نا خون آن گڈ نوشکے تون اوار بلوچستان نا جتا علاقہ آتیٹ نشہ نا سوداگر تا برخلاف برانز آک شابیتی ئٹ بناء مسر۔
اندن بلیدہ نا اسہ چنکو خلق الندور آن نشہ نا برخلاف بناء مروک ورنا تا چاہنداری تالان کروک کاریم داسہ بلوچستان ئٹ اسہ سوگو ءُ تحریک ئسے نا دروشم اٹ بسونے۔
داڑان مالو تربت، حب، خضدار و ایلو علاقہ آتیٹ برانز آک مریسہ کرینو۔
اندن بلوچ سلاء بند تنظیم آک نشہ بہا کروک ہند و سوداگر تیا جلہو نا پڑو کرینو۔ تدوکا دے تیٹ بلوچ ریپبلکن آرمی پنجگور ئٹ نشہ بہا کننگ نا ہند آ چغلی بمب نا ذمہ واری ءِ ارفیسہ پڑو کرے کہ نن مُستی ہم بلوچ ورناتے نشہ نا گواچی کروک آتیا جلہو کرون، دا ردئٹ درو پنجگور ئٹ اسے پین جلہو ئسے نا ہم ذمہ واری ءِ بی آر اے نا ترجمان بیبگر بلوچ منا۔
