اگر عبداللہ جمالدینی ملک اسحاق مسکہ؟
نوشت: وسعت اللہ خان | مٹ: سمیعہ بلوچ
دی بلوچستان پوسٹ
ای شش دے ودار کریسہ کریٹ کہ ای اسٹریم راجی میڈیا ٹی داکن مونی ہم گڑاس خواننگ کیو کہ پنی آ بلوچ ادیب، شاعر و محقق عبداللہ جان جمالدینی نود و چار سال نا عمر ئٹی کوئٹہ ٹی کذیت کرے، صدرِ مملکت ممنون حسین و وزیرِ اعلیٰ ثنا اللہ زہری اونا کذیت ءِ بلوچی ادب کن اسہ بھلو نسخان اس پن کرینو۔
ولے ای ودار کریسہ کریٹ کہ اگہ عبداللہ جمالدینی اندن بھلو بندغ ئس ئسک کہ اونا کذیت اسہ ادبی نسخان اس پن مس، گڑا او یا اونا علمی کاریم یا ادبی خدمت آک اردو یا انگریزی میڈیا ٹی مونا ہتنگ کن اونا کذیت نا بنماسی حوال آن بیدس تدوکا شش دے ٹی ہچ ءُ نوشت ئس، اسہ اداریہ یا اسہ بھلو فیچر رپورٹ آخہ گڑا اسہ چنکو گچین وڑ ئنا نوشت ئس اسہ اخبار یا چینل آ خننگ بخت ئٹ مسکہ۔
ولے سخت آ ہیت دادے ہرانا پن ئٹ سرکار نا پارہ غان است ہسونی نا درشانی کننگا اوفتے ہم بلکن جمالدینی صاحب نا مننگ نا دا دے سما تمو ہرا دے اعلیٰ عہدیدار آتا خف ئٹی اوفتا پی اے زرس چُف کرینے کہ سر مسٹر جمالدینی اسہ بھلو بندغ اس ئسک، اوڑ کن نا پن ئٹ است ہسونی نا درشانی شینک کننگ آن بلوچستان آ گچین ءُ زیم تمو۔
راجی چینل آتا معاملہ دن ءِ کہ بلوچستان آن بروکا ہر خبر داڑے اندن نشان تننگک کس پائے باسن آ پٹاٹہ مرے، ہلکس تا دو پُتک ہلو ، ہرا حوالکاری لَوَنڈ آتے دا سما اف کہ مہمند ایجنسی ٹی وت کش جلہو آتیٹ بیست و ہشت بندغ نا کذیت نا ہیڈ لائن زیات المی ءِ یا ملیر نا ایس ایس پی راؤ انوار نا دو خلاسی نا خبر زیات المی ءِ، اوفتان دا امیت تخینگ کہ او پاننگ آن بیدس جمالدینی صاحب نا کم از کم پٹی ءِ چلیفوسرے اندن کہ بقول اسد محمد خان جتا غا لاڈلا، گوازی کن طوبے خوائے۔
دا ملک ئٹی اندن آ تیوہ غا بھلا بندغ آک ہرانا فوج، میڈیا، سیاست یا مذہب آن بیدس اسہ شعبہ تون سیالی تخرہ، است جم بھلو بندغ ئس مننگ کپک ہرانا اردو یا انگریزی آن بیدس پین اسہ بولی ٹی نوشت، تولینگ بش مننگ کیک او بھلو ئس مرے ولے ننے آن بار انگا مین اسٹریم بنجاہی صحافی و دانشور آتا خڑک او بیرہ اعزازی و ربیدگ و مروتا بھلو بندغ ئس مرو، مچے سوج کبو اگہ احمد فراز نا پن غنی خان مسکہ، انتظار حسین ابراہیم جویو مسکہ ، پروین شاکر نسرین انجم بھٹی مسکا گڑا فراز، انتظار و پروین ءِ کراچی، لاہور یا اسلام آباد ٹی ہندی مروک اخس سوغند ارفوک کمشنر نغد کار، دانش باز یا ادیبئیک بہے شاغارہ؟
عبداللہ جان جمالدینی تون امو وخت مننگ کیک ہرکس واقف مسوکا اگہ او رانا ثنا اللہ مسکہ ، یا اسلام آباد ءِ پنج سائت اسکان اسہ کلاشنکوف آ یرغمال کروک ملک سکندر مسکہ، مبشر لقمان مسکہ، حسن نثار اوریا مقبول جان مسرہ، حمید گل مسکہ، ملک ریاض مسکہ، طاہر القادری مسکہ یا کم ازکم امو مسکہ ہرانا زیا پنج لکھ پیسہ نا داد مسکہ۔
داس اگہ نم ستا حوصلہ نا رمب اٹ نرنگ نا جاگہ غا یا تینا فن یا کاریم آن چاگردی و سیاسی کچ آ تھرتھلیاں شاغنگ آن چُپی ئٹ نوشتہ کننگ نا جاگہ غا و تالیف و پٹ پول ٹی تیوہ آ زند اندن گدریفرے و او ہم اسہ اندن ءُ بولی اسیٹ ہرا خواجہی لہجہ تون علاقئی بولی ئس پاننگک گڑا نے دیر درست کرو، نی بھلا امر پاننگوس۔
عبداللہ جان جمالدینی بابائے بلوچی پاننگک (دنکہ اردو بولی ئٹ مولوی عبدالحق) نی ہشت مئی نوزدہ سد و بیست و دو ئٹی نوشکی نا اسہ دیات ٹی ودی مسس، اسکولی تعلیم کوئٹہ ٹی الکوس۔ گریجویشن اسلامیہ کالج پشاور آن کریس۔ نوزدہ اس پنجا و سہہ ئٹ نائب تحصیلداری آ لعنت کرے و بلوچی ادب نا بیرفنگ ئٹ ساندہی وس ءِ خلک۔ زند ئنا زیات وخت کراچی، کوئٹہ و نوشکی نا تکون ٹی گُدریفے، پروگریسیو رائٹرز ایسوسی ایشن ٹی ہم سرگرم ئس، نیشنل عوامی پارٹی تون ہم خڑکی تا ئس۔
کراچی آن متک نا پن آ اسہ رسالہ اس کشا، اوکان گُڈ نوائے وطن، بلوچی و سنگت پن ئنا کے ہرا بلوچی ادبی رسالہ آک پیش تمار اوفتا پد ئٹ محرکانہ روح جمالدینی صاحب ئس، و دا تیوہ غاک فیض ءُ عبداللہ جان جمالدینی نا تیوہ آتیان زیات یاتگار کاریم یعنی بلوچستان یونیورسٹی ٹی بلوچی بولی نا لسانیاتی شعبہ نا بنماس تخنگ، دا اسہ اندنو بِج ئسے ہرا اینو اسہ درخت ئسے، اندن ءُ درخت ئس ہرانا نیال ءِ اسہ پیر ءُ بندغ ئس خلینگ ئس گڑا راتا سلوک چُناس سوج کرے باوا نی دا نیال ءِ خلینگ آن انت فائدہ؟ ہرا وخت دا برم تننگ نا لائخ مرو نی او وخت اسکان زندہ مروفیس، پیر ہنگا پارے نی تو مروس ، نی کونیس واپس اندن ءُ پین اسہ درخت ئس خلیس کاس۔
جمالدینی صاحب پیرہ سالی ئٹ ہم پنیری خلنگ آن سلتوس، نوزدہ سد و نود و سہہ آن زرغون روڈ کوئٹہ نا اسہ اُرا اسیٹی بلوچستان فرائڈے پارٹی نا پن ئٹ ہفتئی ادبی مجلس بناء مس، دا ٹی کوئٹہ، خاران، مکران، کراچی دیچہ ہرا ہراکہ بندغ آک ٹیکی سرپد مریسہ بسورا، ہرکس ءِ انت پاروئی بنفوئی مروس بیدس خلیس بنفیکہ و جمالدینی صاحب بیدس خلیس بنگوکہ ہرا وخت نوزدہ سد نود و ہشت ٹی نواز شریف جمعہ نا چھٹی ءِ یک شنبے ئٹ غُت تس گڑا بلوچستان فرائیڈے پارٹی ہم بلوچستان سنڈے پارٹی جوڑ مس، (بلوچستان ٹی بلکن دا اسٹ ءُ پارٹی ئسے ہرادے چیر زمین ہنوئی تمتو و نا کس ئس کالعدم کننگ، پرغنگ یا اوار کننگ نا رد ئٹ سوج ئس خلک، داسا چکاس دادے کہ جمالدینی صاحب آن گُڈ بلوچستان سنڈے پارٹی نا لغت خانہ بروکا وخت انت ءِ؟)۔
عبداللہ جان جمالدینی نا کاریم و شخصیت نا ردئٹ بنجائی پڑ آ پنی مننگ نا شاہدی دادے کہ پاکستان اکیڈمی آف لیٹرز اسلام آباد ’’پاکستانی ادب نا ودشت ‘‘ نا پن آن ہر خواجہ اردو یا علاقئی ادیب و شاعر آ اسہ چنکو کتاب ئس شینک کننگ نا لڑ بناء کرے، دا ٹی اسہ کتاب ئس جمالدینی صاحب آ ہم ارے۔
نوزدہ ستمبر ارا ہزار شانزدہ آ جمالدینی صاحب ہفتاد و چار سال، چار توہ نا عمر ٹی خن تے تر کرے۔
