انصاف اٹ اُرے، انصاف آن نمن
ٹی بی پی سرگپ
تربت بلوچستان نا ارٹمیکو بھلا شار ءِ، تربت تینا پن ئنا ردئٹ اسہ تربت (قبر) اسیٹہ مٹ کننگسہ ءِ۔ دا عہد ئنا سعادت* نا بناء آن دا شار ئٹ خونریزی* نا بازار باسیسس اُس، ولے بلوچ زالبول تا خون ئنا منہ زوت تدینیک اسہ بیم بش کروک رجحان ئسے نا پارہ غا اشارہ کننگو۔
برجاء سال 26 مئی آ اسہ بلوچ خاتون ملکناز ءِ تربت شار نا کیب ئٹ ڈنک نا نا ہند آ داڑیلی نا اسہ تدینی ئسے نا وختا کسفنگا۔ خونی تے ہمسایہ غاک دزگیر کریر۔ ہرانا چاہنداری سمیر سبزل ڈیتھ اسکواڈ نا اسہ کارندہ ئسے نا دروشم اٹ مس۔ ڈیتھ اسکواڈ بلوچستان ئٹ ہمو سلاء بند دستہ غاکو، ہرافتے مننگ کروک وڑئٹ پاکستانی آرمی، سلاء بند کرینے، ہرا بلوچ مزاحمتکار آتا برخلاف کاریم کیرہ، ہرافتا بدل ئٹ اوفتے پورو آجوئی دوئی ءِ۔ دا خون ئنا برخلاف تیوی بلوچستان ئٹ برانز مس۔ اوکان گڈ دا داڑیل کم خونی تون انت مس؟ اوفتا مقدمہ غاک ہراداسکان سرمسر؟ کس ءِ ہچ سما اف، مخلوق ءِ بیرہ داخس سما ءِ کہ خونی تے دائسکان سزا رسینگتن ءِ۔
بڑز پن کروک تدینی نا بیرہ اسہ تُوہ ئسے آن گڈ تربت آن خڑک علاقہ دازن ئٹ اندنو اسہ پین داڑیل کم خونی ٹولی داڑیلی نا اندنو تدینی اسیٹی، اسہ بلوچ زالبول کلثوم ءِ اونا چُنا تا مون آ گٹ آن تڑیسہ کسفیر۔ دا وار خونیک نرنگ اٹ سرسہب مسر ولے تیوہ غاک خونی تا چاہنداری ءِ کریر و ہورک اسیکہ وا ٹہیفوک ڈیتھ اسکواڈ آتیا ارفنگار۔ بھاز آ بلوچ سیاسی باسک آک دا ڈول نا تدینی تے بلوچ مزاحمت کار آتیکن ریاست نا پارہ غان اسہ تڑی اس پاریر کہ اوفتا خاہوت آک رکھوک افس۔
چانڑدہ اگست ئٹ پاکستانی فوج تربت نا علاقہ آپسر ئٹ اسہ 25 سالہ ورنا حیات بلوچ ءِ اونا لمہ باوہ نا مون آ سم کاری کریسہ کسفیر۔ بھاز آ برانز و کوک پاڑو آن گڈ اسہ فوجی کارندہ ئسے دزگیر کننگ و جیل اٹ بند کننگ نا حوال تننگا۔ ملکناز نا خون ئنا مقدمہ آنبار، دا مقدمہ ءِ ہم جتا نیمون آتیٹ مرغن کریسہ پد بٹنگ نا گواچی کننگسہ ءِ۔ ڈان نیوز نا صحافی مبشر زیدی نا ردئٹ پن کروک فوجی کارندہ کرونا وائرس آن زیمی مسونے، اندا سوب اودے تنیا زندان اٹ تخنگانے، و اونا برخلاف داسہ مقدمہ ہموتم اسیکہ وا بناء کننگ مرو، ہراتم او پورو دُراخ مرے و اونا کرونا ٹیسٹ منفی برے۔
طاغت تخوک مخلوق نا مہروانی تے دوئی کروک آتا زوت گواچی مروک بلوچ زالبول شاہینہ شاہین ءِ۔ شاہینہ تربت آن تعلقدار اسہ صحافی، اینکر پرسن، مصور و چاگردی کاریم کروک اس ئس۔ اودے 5 ستمبر آ اونا ارغ محراب گچکی کسفیسس، ولے خونی دائسکان نروک ءِ۔ شاہینہ شاہین نا ہیڑ زارا شاہین راجی حوالکاری نا ویب سائٹ ٹوئٹر آ دوبہ خلیسہ پارینے کہ “محراب گچکی، پاکستانی فوج کن کاریم کروک ڈیتھ اسکواڈ نا بشخ ئسے۔ اندا سوب گمان ءِ کہ اودے ڈیتھ اسکواڈ نا وتاخ اسیٹی باہوٹ تننگانے۔” او مُستی پارے کہ پولیس تینا بے وسی نا درشانی کرینے کہ او “طاغت تخوک” بندغ تا اُرا تیا دزگیری کن چھاپہ خلنگ کپک۔
شاہینہ شاہین نا خاہوت و سول سوسائٹی نا باسک آک 17 ستمبر آ تربت شار ئٹ اسہ برانزی ریلی اس کشنگ نا کوشست کریر، واہم، زارا شاہین نا پارہ غان ٹوئٹر آ اپلوڈ کننگوک اسہ ویڈیو اسیٹی خننگک کہ او پولیس ءِ ویڈیو کننگے و دوبہ خلنگ ءِ کہ ڈھکوک ادارہ تا پاننگ آ پولیس اوفتا برانزی ریلی ءِ توننگ نا کوشست کننگے۔
بیدس داڑان کہ شاہینہ نا خون نا پٹ و پول و خونی نا دزگیری کن اقوام متحدہ نا بندغی حق آتا ہائی کشمنر، پاکستان نا 58 زالبول صحافیک اسہ دستخط کروک چھٹی ئسے نا دروشم ئٹ و مسہ سپورٹنگ باڈیز آک خواست کرینو ولے خونی واہم نروک ءِ و شاہینہ نا خاہوت نا ردئٹ پولیس ءِ خونی نا دزگیری ئٹ ہچو است خواہی اس اف۔
تربت ئٹ خون ئنا زوت تدینی تا پد ئٹ یا تو مون پہ مون ریاستی فوج اوار مسونے یا گڑا ہمو ٹولی ہرافتے مننگ کروک وڑئٹ فوج نا مخ تفی دوئی ءِ۔ ہر ہمو بندغ ہرا بلوچستان نا معروضی حالیت آتیان دیخہ سمائی ءِ، او جُوان گمان کننگ کیک کہ دن انگا مقدمہ آتیٹ انصاف نا امیت دیوانہ نا تُغ ءِ۔
