کوہلو ٹی دیر نا نیستی نا برخلاف مخلوق بلوچستان پنجاب بھلا روڈ ءِ ڈپٹی کمشنر آفس نا مون آ ٹیر ہشیسہ بند کرے۔ برانز کروک آک پی ایچ ای کارندہ تا برخلاف کوک پاڑو کریر۔

گیشتری حوال تا ردئٹ نیو کلی، مری کالونی و گاڑداوغ ئٹ تدوکا اسہ تُوہ آن کُننگ نا دیر نا نیستی ءِ۔ مخلوق کُننگ نا ساف آ دیر نا پڑی پڑی کن بلکنگ ءِ۔ محکمہ پی ایچ ای نا آفس اٹ کلف خلوکے۔ ایکسین و اسٹاف ہم ساڑی افس۔

مخلوق بڑز کارندہ غاتیان خواست کرینے کہ ضلع نا مُر ئنا علاقہ غاتیٹ مالو آن دیر تننگ نا بست و بند اف داسہ شار ئنا خڑک علاقہ نیو کلی، مری کالونی و گاڑدواغ ءِ ہم پی ایچ ای نا کارندہ غاک دیر تننگ آ بے سہب مسونو۔

بھلا روڈ نا اُرے اسکان بند کننگ آن گڈ اسسٹنٹ کمشنر کوہلو عبدالستار مینگل نا کماشی ئٹ ہیت و گپ آن گڈ ملنگا۔ ضلعی بست و بندی کوالخواک برانز کروک آتے باور کریفیر کہ اِرا دے ئٹ دیر تس ءِ برجاء کننگو۔

بلوچستان نا علاقہ زیارت و دکی ٹی مروکا ویل آتیٹ مسہ بندغ بیران و پنج بندغ ٹپی مسونو۔

گیشتر حوال تا رد ئٹ زیات ٹی کچھ موڑ نا ہند آ گاڑی کلٹی مننگ نا سوب آن مسہ بندغ بیران و چار بندغ ٹپی مسونو، ٹپی آک دمدستی وڑ ئٹ خڑک ئنا ہیلتھ سینٹر سر کننگار۔ کذیت کروک آتیٹ حبیب اللہ بادیزئی، نصراللہ بادیزئی، کلیم اللہ بادیزئی اوار ءُ۔

رسینگوک حوال تا رد ئٹ ویل گاڑی نا ترند بننگ نا سوب آن مسونے اندن ویل ئنا گواچی مروکا بندغ آک پشین آن ءُ۔

پین حوال ئسے نا رد ئٹ دکی ٹی سم کاری نا ویل اٹی اسہ بندغ اس ٹپی مسونے۔

سم کاری نا ویل خالہ شہر نا علاقہ کراہی میدان ٹی اِرا قبیلہ نا ٹولی تا نیام اٹی زمین نا جیڑہ غا مسونے۔

لیویز آن رسینگوک حوال تا رد ئٹ کراہی میدان نا مش تیا مالو آن سنگر کروک اسہ قبیلہ نا بندغ آک ایلو قبیلہ نا بندغ آتیا تینا مون سم کاری کریر ہراڑان اسہ بندغ اس عبداللہ جان صالح محمد سکنہ خالہ شار بھاز ٹپی مس۔

ٹپی آ بندغ سول ہسپتال دکی ٹی درمان مننگ آن گُڈ پین دراخی کہ کوئٹہ آ رادہ کننگا۔

راجی حوالکاری میڈیا نا برخلاف پاکستان نا جیڑہ

ٹی بی پی سرگپ

سال آتیا تالان چم بازی و طاغت تخوک حکومتی عہدہ تیا فوج نا امنائی تون مخلوق ءِ تخنگ نا سوب آرمی پاکستان ئٹ اسہ سوگو متوازی و اوار ءُ حکومت اس ٹہیفنگ آ سرسہب مسونے۔ آجو تجزیہ کروک آتا پاننگے کہ ساڑی “جمہوری حکومت” آرمی نا ہور تیا چرینگوک آ دُتک آ سیاسی دروشم ءِ، ہرا ملک ئٹ بش مروک نغد کاری توار تا رکھ ئٹ اُسل بے سہب مسونے۔ ترقی پسند و قوم پرست سیاست کن سیاسی میدان نا بند کننگ آن گڈ داسہ فوج نا تیوہ غا توفک آک راجی حوالکاری میڈیا آ توروک ءُ، ہرا سلامت آ اسٹ آ میدان ءِ ہراڑے ترقی پسند سیاسی طاغت و نغدکار آتا پارہ غان فوج آ نغدکاری و سیاسی شرہ تون مون تروئی تمک۔

تدوکا وخت ئٹ، سوشل میڈیا آ ساڑی پاکستانی فوج آ نغدکار بلاگر آتے چُپ کریفنگ کن زوراکی نا بیگواہی و بیدادی کون “آزموندہ چم” آتے کاریم ئٹ ہتنگا۔ سنہ 2017 ئٹ چار پنی ءُ بلاگرز و پاکستانی فوج نا نغدکار سلمان حیدر، وقاص گورایا، عاصم سعید و احمد رضا نصیر ءِ اغواء کریسہ بے ڈس کننگا۔ چار آ بلاگر آتے دوارہ تیوی ملک ئٹ مروک برانز آتا زور آ یلہ کننگا ولے دا چار بندغ آک مُستی پاکستان ئٹ ہندی مننگ کتور۔ وقاص گورایا نیدرلینڈ سرمننگ آن گڈ پاش دا پارینے کہ اودے اغواء و اوڑا بیدادی کننگوکا پاکستانی آرمی نا ڈھکوک ادارہ “آئی ایس آئی” ئس۔

بلاگر آتا دُن پاش اغواء و اوکان گڈ بش مرو توار نا سوب پاکستانی ڈھکوک ادارہ غاتے ہرا جہانی بے شرفی ارفوئی تما، اوکان گڈ نغدکار آتے چُپ کریفنگ کن پین اندر ءُ چم کاریم ئٹ ہتنگا۔

اپریل 2019 ئٹ، فیس بک پاکستانی فوج نا بھاز اکاونٹس آتے بلاک کرے، ہرا فوج نا ملازم آک چلیفنگ ئسر۔ فیس بک نا پارہ غان شینک کروک حوال نا ردئٹ اوفک 103 پیجز، گروپس و اکاونٹس بلاک کرے، ہرا “سوگو و پک مفروک رویہ” ءِ تینا کریسہ پاکستان تون بے چیٹی بش کروک کاریم تیٹ اوار ئسر۔

گواچنی دا “سوگو و پک مفروک رویہ” پاکستانی فوج نا دشمن آتا برخلاف ہمو ” ففتھ جنریشن وارفیئر” ءِ، ہرانا بابت پاکستان نا مسکوئی ڈی جی آئی ایس پی آر میجر جنرل غفور پاریکہ۔ و خننگوک وڑئٹ ففتھ جنریشن وارفیئر ئٹ پاکستانی فوج نا دژمن راجی حوالکاری میڈیا غا ساڑی سیاسی نغدکار آکو۔

پاکستانی فوج نا راجی حوالکاری میڈیا ڈٹ ڈول دا مسونے کہ پاکستان نا مظلوم و محکوم تپہ یا راج آتا پارہ غان راجی حوالکاری میڈیا غا بش مروک توار ءِ پد بٹنگہ، داڑکن “ماس رپورٹنگ” نا وڑڈول ءِ کاریم ئٹ ہتیسہ، دننگا توار تے بلاک کرفنگک، یا گڑا دا توار تے کوک پاڑو ئٹ بیگواہ کننگ و پام ءِ مُر کننگ کن اسہ دروغ نا بیانیہ ئٹ تخلیق کریسہ آرمی نا حق یا حکومت نا حق ئٹ ہیش ٹیگ ہتنگک۔

ریاستی بیانیہ نا پین شابیتی تون پچار کن، ہمو تیوہ غا حوالکاری ویب سائٹس آتے پاکستان ٹیلی کمیونیکیشن اتھارٹی نا پارہ غان کننگانے، ہرا فوج نا ہیت ئٹ بننگ آن بیدس آجو رپورٹنگ کننگ ئسر۔ دی بلوچستان پوسٹ میڈیا گروپ نا اردو و انگلش سروس نا ویب سائٹ پاکستان ئٹ بلاک ءُ۔ اندن وائس آف امریکہ نا اردو سروس ہم بلاک کننگانے۔

پی ٹی اے آ ساندہ نغدکاری مسونے کہ دا ادارہ اسہ “ریگولیٹری اتھارٹی” ئسے نا جاگہ غا بیرہ پاکستانی فوج نا اسہ ازباب ئسے۔ پی ٹی اے یوٹیوب آن دا خواست ءِ کننگے کہ او پاکستان ئٹ تینا اسہ دفتر اس ملے، نئے تو یوٹیوب بلاک کننگو، کہ پاکستان ئٹ یوٹیوب ءِ ضابطہ ئٹ ہتنگ مرے۔ جہانی مخلوق مالو آن پاکستان آ “بیگو” کون آ لائیو اسٹریمنگ ایپ و زوتیٹ پنچ ڈیٹنگ ایپس آ پابندی خلنگ نا سوب آن مذمت کرینے۔ آئی ایس پیز ( انڈیپینڈنٹ سروس پروائڈرز) دا دعویٰ کرے کہ پاکستان قابلِ اعتراض مواد آتیا پابندی نا پن ئٹ سیاسی توار آتیا پابندی خلنگ خوائک۔

چس کروک آ ہیت دادے کہ اخس ترندی تون آرمی نا سوگو “ٹرولز اینڈ بوٹس” راجی حوالکاری میڈیا غا کاریم کننگو، اوفتا کاریمک ہموخس ترندی تون ہلنگسہ ءُ۔ 31 اگست 2020 آ فیس بک پاکستان آن تعلقدار 103 ویب پنہ، 78 گروپس، 453 بندغ نا اکاونٹس و 107 انسٹاگرام اکاونٹس تیا تالان اسہ نیٹورک ئسے “سوگو و پک مفروک رویہ” نا سوب ایسر کرے۔ فیس بک نا ردئٹ دا اکاونٹس آک سوگو وڑئٹ خلقت نا شرہ نا مون ءِ ہڑسرہ و اوفتا اکاونٹس تے بلاک کرفنگ کن رپورٹ کریرہ، ہرا پاکستانی آرمی و حکومت نا نغد کار ئسر۔ مُستی دا اکاونٹس آک برجائی تون پاکستانی فوج، آئی ایس آئی و پی ٹی آئی حکومت نا سفت ءِ کریرہ۔

برانز کروک آک مرک اسکان بین ہڑتال ءِ ایسر کریر، مُستی برانز برجاء مرو۔

بلوچستان نا دارالحکومت کوئٹہ ئٹ بولان میڈیکل کالج بحالی تحریک نا ردئٹ خوانندہ و ایلوفتا پارہ غان بناء کروک مرک اسکان بین ہڑتال ءِ اینو ایسر کننگا۔

تدوکا چار دے آن برجاء بین ہڑتال آ تولوک خوانندہ آتا طب ترندی تون بد مریسہ ئس و اوفتے چارمیکو دے ہم ہسپتال آ دننگا۔

بلوچستان نا قوم پرست جماعت آتون اوار ایلو ڈلہ غا سیاسی بندغ تا پارہ غان خوانندہ تے مرک اسکان بین ہڑتال ءِ ایسر کننگ نا وار وار آ خواست کننگاسس۔

واہم اینو بی ایم سی بحالی تحریک ءِ حکومت نا پارہ غان پک باور کریفنگا کہ اوفتا خواست آتون امنائی کننگو و 9 ستمبر آ کابینہ اجلاس ئٹ ایکٹ ئٹ ترمیم کننگو۔

بی ایم سی بحالی تحریک دا باور کریفنگ آن گڈ مرک اسکان بین ہڑتال ءِ ایسر کریسہ ایلو تولوک برانز ءِ برجاء تخنگ نا پڑو کرے و پاننگا کہ ننے ساندہ مذاکرات نا پن آ ریفنگانے، ہراتم اسکان ایکٹ ئٹ ترمیم مفک نن تینا تولوک برانز ءِ برجاء تخون۔

کوئٹہ ٹی مشرقی بائی پاس نا علاقہ ٹی سُم کاری آن نیاڑی ئس کزیت کرے۔ ریسکیو کروک آتا حوال تا رد ئٹ مشرقی بائی پاس ہشتمیکو کوچہ ٹی سُم کاری آن نیاڑی ئس کزیت کرے ہرا نا جون المی کاروائی آن گُڈ خاہوت نا دو ٹی تننگا۔

حوال تا ردئٹ زالبول نا خون غیرت نا پن آ کننگانے۔ ویل ئنا رد ئٹ پولیس پٹ و پول کننگ ءِ۔

تمبو نوتال نا خڑک ترند بروکا مزدہ ٹرک موٹر سائیکل تون ڈک لگا ہراڑان موٹر سائیکل سوار بندغ مرگ نا گواچی مس، گاڑی چلیفوک ہند آن نرا۔

پولیسں نا پاننگ ءِ نوتال پولیس تھانہ نا ہد ہویل ئٹ بھلا روڈ آ ترند بروکا مزدہ ٹرک موٹر سائیکل ءِ ڈک خلک ہرانا سوب آن موٹر سائیکل سوار محبوب علی بوہڑ بیران مس، و گاڑی چلیفوک گاڑی ءِ ہلیسہ نرنگ ٹی سرسہب مس۔

حوال رسینگ تون پولیس ہند آ سر مس و جون ءِ ہسپتال سرکرے ہراڑے المی کاروائی آن گُڈ جون ءِ خاہوت نا دو ٹی تس و گاڑی ءِ دوٹی الیسہ ڈرائیور نا پٹ و پول بناء کرے۔

اندن کوئٹہ ٹی ٹریکٹر نا ڈک لگینگ آن چُنا اس بیران مس۔

ایدھی آن رسینگوک حوال تا رد ئٹ مشرقی بائی پاس آ ٹریکٹر نا ڈک لگینگ آن اسہ چُنا اس بیران مس، ہرانا جون ہسپتال آ سرکننگا ہراڑے المی آ کاروائی آن گُڈ خاہوت نا دو ٹی تننگا، ویل ئنا سر و سوج برجاہ ءِ۔

بیروت تراک آن گڈ تدینی ہند آ کمکاری کاریم تیٹ گٹ بندغ تا پاننگے کہ تموک ماڑی تیٹ داسہ زند ئنا ہچو ڈس اس سلتنے۔ داڑان گڈ ڈیر آتا شیف آن سینسر نا کمک ئٹ خننگوک زندہ بندغ آتا ساڑی مننگ نا امیت آک ایسر مسر۔

بیروت بندرگاہ غا اگست نا بناء ئٹ مروک تراک آن کم و وَد 191 بندغ کسکنو۔ دا زمانہ امن ئٹی لبنان ئت مروک تیوی آن بھلا تدینی ءِ۔ تدینی ءِ اسہ توہ اس گدرینگ آن گڈ دائسکان ہم ہفت بندغ بیگواہ ءُ۔

چار شمبے نا نن گند کشیسہ پٹوک آ کچک ڈیر نا شیف آن کس ئسے نا گند ءِ مارا۔ ہائی ٹیک سینسرز آن ہم پک مس کہ ماڑی تا ڈیر نا شیف آن اُست ئنا درپہ اس ساڑی ءِ، ہراڑان گڈ کمکار ٹیم آک پٹ و پول ءِ بناء کریسر۔

مسہ دے ئٹ بھلو کچ اسیٹی ڈیر ءِ مُر کننگان گڈ ہم چلی آن تعلقدار ریسکیو کاریم نا چاہندار فرانسسکو لر مانڈا پارے کہ ڈیر نا شیف داسہ زند ئنا ہچو ڈس اس سلتنے۔

میڈیا تون حوال کریسہ او پارے کہ تکنیکی بنماس آ داسہ نن پاننگ کینہ تموک ماڑی تیٹ زند ئنا ہچو ڈس اس سلتنے۔

او پارے کہ اِرا زالبول کمکار باسک ہفتہ نا دے اسہ ٹنڈیل ئسے نا کمک ئٹ ہموڑے سر مسر ہراڑے زند ئنا ساڑی مننگ نا گمان ئس ولے ہچس دو بتو۔

لر مانڈا نا ردئٹ علاقہ ءِ رکھ کننگ و ہچو زیمی بندغ ئسے نا ڈیر نا شیف آ ساڑی مننگ ءِ پک کننگ نا کاریم برجاء مرو۔

انجینئر ریاض اسد نا ردئٹ تدینی ہند آ کاریم کروک آک ڈیر نا اِرا بشخ مُر کریر ہراڑان گڈ اوفک سیڑھی تیا سر مسر، او ہند آ ننے کس دو بتو۔

داڑان مُست سول ڈیفنس ایجنسی نا آپریشن ڈائریکٹر جورج ابو موسی سُہب نا وخت آ پاریسس کہ کس ئسے نا زندہ ساڑی مننگ نا گمان بھاز کم ءِ۔

سول ڈیفنس افسر قاسم خاطر نا پاننگ ئس کہ اوفتا ٹیم ہمت ہلپرو۔ نن ہمو وخت اسکان ہند ءِ یلہ کپرون ہراتم اسکان ڈیر نا تیوی جاچ ہلپنہ۔

لبنان ئٹ کمکاری کاریم تیکن خواست نا پوسکنا ازباب و لائخی تا مفرنگ نا سوب چلی، فرانس و امریکہ نا چاہندار آک دا کاریم ئٹ کمک کننگو۔

راجی حوالکاری نا ویب سائٹ آتیا لبنانی مخلوق چلی نا کمکاری باسک آتے ہیرو پاریسہ اوفتا سفت ءِ کرینے۔ لبنان ئٹ جمعہ نا دے کہوک آتا شرف ئٹ اسہ منٹ ئٹ چُپی اس کننگا۔

بلوچستان نا علاقہ کیچ تربت ٹی سم کاری آن بلوچ زالبول اینکر شاہینہ شاہین کسفنگا۔

ہسپتال نا بندغ آتا پاننگ ءِ کہ نادرست بندغ آتا پارہ غان شاہینہ شاہین ءِ ٹپی حالیت ٹی ہسپتال آ رسیفنگا۔ ہراڈے او علاج کننگ آن مست بیران مس۔

ہسپتال والاتا پاننگ ءِ کہ شاہینہ شاہین ءِ اِرا سم لگانے و خلننگ ناتا سوب سما اف۔

مونی خبر نا ردئٹ کہ ہرا بندغ گاڑی ٹی شاہینہ شاہین ءِ ہسپتال آ رسیفے او تینا گاڑی ہلانے جند تا نرّانے و پولیس گاڑی ءِ تینا کوزہ ٹی کرینے۔

یاتی مرے کذیت کروکا شاہینہ شاہین پی ٹی وی ٹی اینکر ام مسونے۔ اسے بلوچی میگزین “دزگہار“ نا ایڈیٹر ام اس۔ او بلوچستان یونیورسٹی آن فائن آرٹس ڈیپارٹمنٹ آ خواناسس۔ اندا سوب آن او عکس کشی ام کریکہ۔

آزات جمالدینی
1916 – 1981

دی بلوچستان پوسٹ

پنچ ستمبر بلوچی بولی نا پنی آ شاعر و زانتکار آزات جمالدینی نا 39 سال دے ءِ۔

آزات جمالدینی نا پورو پن عبدالواحد آزات جمالدینی ءِ۔ آزات نا ودی مننگ نا بابت اونا ایلم عبداللہ جان جمالدینی نوشتہ کیک کہ “ننا باوہ جاگہ اس پائک کہ عبدالواحد آزات جمالدینی نا ودی مننگ نا تاریخ 1916 دو شمنبے نا دے خلق جمالدینی نوشکی ٹی ودی مسونے۔” ولے بھاز کتاب آتیٹی اونا ودی مننگ نا سال 1918 نوشتہ کننگانے۔ اندن اونا گڈیکو ہند آ اونا ودی مننگ نا تاریخ 1916 نوشتہ ءِ۔

آزات جمالدینی بنماسی خواننگ ہمو خلق نا مسیت آن کرے۔ ولے دنکہ او وختا بلوچستان ٹی انگریز آتا راج اس اندا سوب آن انگریز آک بھاز اسکول جوڑ کننگ اسر اندن نوشکی ٹی ام اسے پرائمری اسکول اس جوڑ کریر۔ گڑا آزات جمالدینی نا باوہ میر خان جان تینا مار آزات جمالدینی ءِ اندا اسکول آ داخل کرے۔ شش جماعت اندا اسکول آ خواننگ آن گڈ مونی خواننگ کن شالکوٹ آ راہی کننگا انتیکہ شالکوٹ آ انگریز 1886  ٹی سنڈیمن نا پنٹ اسے ہائی اسکول اس جوڑ کریسس۔ آزات جمالدینی ام اندا اسکول آ خواننگ کن بس ولے آزات جمالدینی ءِ دا بورڈنگ اسکول دوست بتو۔ عبداللہ جان جمالدینی نوشتہ کیک کہ “آزات جمالدینی اسے آزات تب ءُ انسان اس ئس، اودے بورڈنگ اسکول اٹ بند مننگ دوست بتو اندا سوب آن او خواننگ ءِ یلہ کریسہ ڈھکوئی تینا سنگت آتون اوار کراچی آ ہنا۔” او مونی نوشتہ کیک کہ  “گواچن ئٹ او و اونا سنگتاک شور و صلہ کریسر کہ کراچی آن انڈیا کن کانہ فلمی جہان آ، ولے اونا سنگت آک ممبئی آ سر مسر آزات جمالدینی کراچی آ سلیس۔”

اسے وار ولدا کراچی آن بننگ آن پد خواننگے بندات کرے ولے دا وار سنڈیمن اسکول نا جاگہ غا اسلامیہ ہائی اسکول آ ہنا۔ دئے جماعت اسکان ہموڑے  خوانا۔

اندن 1950 نا زمانہ اس کہ عبداللہ جان جمالدینی و اونا سنگتاک لٹ خانہ نا بنیات تخار گڑا آزات جمالدینی نا لٹ خانہ تون اواری نا سوب آن بلوچی شاعری نا پارہ غا بس۔

آزات جمالدینی اولیکو وار پرنٹ میڈیا ءِ درستی راستی کرفنگ کن توئی “بلوچی” نا شنکاری 1954 ٹی کرے۔ اونا خواری تا سوب “بلوچی” مخلوق ئٹ پنی مس، داڑاسکان کہ خلیجی ملک آتیٹ اونا خواست مس۔ میگرین بلوچی بولی و بلوچ راج نا حق آتا بابت معلومداری تالان کرے ہراڑان او وخت نا حکومت خلیس ئٹ تما و میگزین آ پابندی خلنگا۔

میگزین آ پابندی آن گڈ آزات جمالدینی ءِ شش توہ اسکان جیل ٹی بندی کننگا۔ یلہ مننگ آن گڈ او ایران آ ہنا ہراڑے او ریڈیو زاہدان تون کاریم بناء کرے و بلوچی پروگرام آتے شنک کرے و ایرانی بلوچ آتا بد آ حالیت آتیا ہیت ءِ بناء کرے۔ دا سوب اودے اوکان ہم نوکری آن کشنگا۔ اوکان او دبئی آ ہنا ہراڑے اسٹ آ مسخٹ بلوچی ءِ شابیتی بشخنگ ئس و اوڑے او بھلو شاعری اس کرے ولے بدبختی، اسہ دز اس اونا بیگ ءِ درے ہراٹی اونا پاسپورٹ و گڑا تیتون اوار شاعریک ئسر۔

آزات جمالدینی دبئی آن خالی دو بلوچستان آ بس و اسیکہ وا “بلوچی” نا شنک کاری نا موکل کن خواست کرے ہرادے امنائی رسینگتئو و بلوچی آ پابندی برجاء سلیس۔

توئی بلوچی نا شنک کننگ آن پد 1977 ٹی “مستاگ” ڈائجسٹ ءِ شینک کرے۔

بلوچی شاعری نا پڑا “مستین توار” نا پنٹ اونا کتاب 1953 ٹی چھاپ و شینک مس و ارٹمیکو شاعری نا کتاب “رژن” نا پنٹ شینک مس۔

اندن بلوچی بولی و ادب نا دا پنی آ شاعر و زانتکار 5 ستمبر  1981 دا جہان ءِ یلہ کریسہ کذیت کرے۔

آزات جمالدینی نا بلوچی شاعری نا گڑاس رنگ؛

“گون جذبہ ءُ جوش ءَ تران کنن

ما عہد ءُ قسم ، پیمان کنن

حونان ءَ وتی ریچان کنن

جانان ءَ وتی قربان کنن

برز نام و بلوچ ءِ شان کنن

ما عہد کنن ، پیمان کنن

آزات بلوچستان کنن “

———

“ تمام عمر ء نہ دیستین وش دل ءِ روچ

ہمیشہ اے کپوک ء بخت ء کار انت

عجب نازرک ء وختے آحتہ اے براس

نہ کسے را بہ کسے اعتبار انت  “

نادر قمبرانی آن اکبر بارکزئی اسکان
ارٹمیکو بشخ

نوشت: محبوب شاہ

دی بلوچستان پوسٹ

دا ہیت آ جہان نا کل مکتبہ فکر، عرض، ہررنگ و نسل، ہر زبان پاروکا مسلمان و غیر مذہب آک امنہ کیرہ کہ ظلم آخر ظلمءِ چائے بندغ ئسے آ مرے یا قوم ئسے آ، کشمیر آ مرے یا افغانستان آ فلسطین شام و بوسنیا غا یا پین کس آ انسان تیا آ مرے یا ساہدار تیا کس انا کس ءِ ظلم انا مون اٹ سلوئی تمک۔ سلنگ کتو، توار چست کروئی تمک، توار چست کننگ کتو، کم از کم است اٹ ظلمء بد پاے، یا احتجاج” پیشانیء تینا تر شاغے، اںہن ہم ہر بندغ ظلم انا خلاف تینا وس انا کچ اٹ گڑا نا گڑاس وک خلیک، دا ہم اسے چنکو کمک اس پاننگک، دا ہم ایمان نا نشانی ء منٹو پائک،
وخت وخت ای فکر کیوہ، اگہ ای ظلم انا خلاف تینا خنگے بند کیو گڑا تینا ضمیرے امر کیو۔

ایماندار پروفیسر نادر قمبرانی نا حساب بلوچ سیاسی کارواں تون اوار براہوئی ادب نا ہمو سرخیل ادیب و دانشور شاعر نوشتہ کار آتیٹی مریک ہراکے تینا زند انا اسے بھلو بشخ اس تینا غریب و مظلوم عوام نا خوشحالی کن تینا وطن ءِ ظالم و جابر آ بوتار تیان چڈاہںفنگ کن تینا و بیگانہ حکمران تپہ تون مڑ تسونے۔ ایماندار چک و تاڑ و جدوجہد نا پڑا مدام وخت حالیت آتے پوہ مسکہ، ہندا وجہ اس راج انا مراعات ہلوکا براہوئی بلوچی نا پنی آ دانشور آتون سنگتی نا باوجود او اسے ہندنو کسر اس گچین کرے ہراکے پت آن پُر اس۔ نادر جان مدام تینا مزحمتی شاعری ٹی تینا سردار نواب و ظالم حکمران تا ثناء و صفت نا خلاف تینا قوم ئنا ورناکے، تینا شوان و بزغر و خواری کش کے تینا انین آ شاعری ٹی جی او جان کرینے۔ و غریب آ مخلوق ءِ شعور تننگ کن حکمران تپہ نا ظلم و جبر انا خلاف بغاوت کننگ نا درس تسونے۔ دا مقصد کن او خلق آتیان بیدس پٹ و بیاوان تا گٹ او گرا ٹی خلق او شارا تیٹی تنظیم کاری ہم کریسس۔ تینا ضمیر نا توار ءِ سرکننگ کن سیاست آن بیدس مزحمتی مضمون و براہوئی ادب اٹ مزحمتی شاعری آن کمک ہلککہ۔ ہندن ہستین او تینا مخلوق نا ویل و ڈکھ آتیٹی اوار تماکہ، اوکے شعور سوچ و سیاسی جدوجہد نا پڑو ہم کریکہ، نادر جان نا مزحمتی شاعری آن ہندا گمان مریک کہ دا مڈی دتر نا خیسنی ٹی نوشتہ مسونے، او تینا زبان اٹ تینا شاعری نا پاسداری ءِ ہم کرینے۔

براہوئی ادب نا پڑا بھاز کم ہندنو ادیب شاعر و نوشتہ کار ودی مسونے ہراکے ادب آن سیاست اسکان پن کٹانو۔ اسے قومی ءُ کڑد اسیتون دا جہان آن رخصت کرینو۔

بد قسمتی آن راج اٹ ہرا سٹ راست پارینے اونا گدان پوٹو مسونے، اونا ٹوپ انا سرکول مدام بُس مسونے، اوتا پچ آتیا پخیر نا رلی آنبار شیف بڑزا آگڑیک خلوک مسونوں۔

براہوئی بلوچی ادب نا چندی پنی آ خواجہ غاک شاعر ادیب و نوشتہ کار آک سرکار نا سیء پہلو آ ہلنگ کن بے وس آ راست ءِ گٹو کرینوں، ایوارڈ نا تاجء کاٹم نا دستار و تمغہ غاکے دو انا دوخوار جوڑ کرینوں، شروخ تروکا تشت آتیٹی ٹمکوکا بند انگا لفافہ غاتا ڈھکوکا چیک آتا کمک اٹ تینا پوسکن آ پوشاک آکے شرف تسونو، تینا بولی و ادب اٹ دا وڑ انا بندغ آتا ہچ ءُ کمتی اس اف کس تینا سودا ءِ گاڑی سیتون کس تینے موٹر سائیکل اسینا مون اٹ بہا کرینے۔ کس اس فوٹو نا پد آن حکومت آتا ترجمان مس کس لفافہ سے نا بدل اٹ تینا ضمیر ءِ رکابی ٹی تخا، کس اس ایوارد نا رند اٹ ترڈو ہلک تو کس فاطمہ جناح ءِ عرب آتا نسل ہتون گنڈا، و کس اس بدر آکے زافران نا سیاہی ٹی نوشت اٹ ایس۔
کس ءِ تہمم نا طریقہ بتوکہ سیرت النبی نا کتابءِ نوشتہ کرے، کس اس کلءِ زند مونے قبلہ گا تتوسسس قرآنی آیات آکے براہوئی ٹی ترجمہ کرے۔

براہوئی ادب اٹ ہندنوں بندغ ہم ودی مس ہراکے تینا قبیلہ نا بارواٹ سما الو ایوارڈ نا استخواہی ٹی گبر آتا شجرہ نسب ءِ انار نا دیر اٹ نوشتہ کرے، کسس براہوئی زبان نا الف ب آن ولد الو ہمو عربی نا لوز آکے زیر زبر شد و مد کرے۔

راست ءِ ادبء ادب اف اہیت کننگ نا،دروغ ابو اخس ہنین پائک۔ ولے ہندا ملک اٹ بے ادب آ راست گوک ادب نا عاشق آک راج انا مست انگا ملنک آک حبیب جالب، فیض احمد فیض، احمد فراز، صباء دشتیاری، نادر جان قمبرانی، کوننگا بندغ آک علم ادب نا خواجہ غاک ہندا بد بخت آ راج انا بندغ اسر ہراکے بیدس مراعات آن راست نوشتہ کننگ نا رواج ءِ زندہ و آجو کریر ہرا مرعات نا نشہ ٹی غرق ادبء خنی بنی کریر۔ ادب نا ہندا صوفی تا سوب آن اینو راست ہر ظلم و جبر انا خلاف مون پاش چرینگیک نہ تو ننا راج اٹ ننا ادب نا ڈکشنری آن دا لوز چیوخت بال کریسس۔ صوفی ازم اٹ ہندا پاننگانے کہ دنیا نیک و راست گو بندغ آتا کوپہ غا تخوکے دا مخلص و ایمانداراک اگہ متوسہ تو جہان آن جمری آ سیخا ہمو وخت کشکاسس، سخاوت نا کندوری ہمے تم مچ مسسس۔ دا بندغ آتا بارواٹ ہراوخت پکر کیوہ، است بے دھول آن چھاپ خلیک۔ ہند فرشتہ غا انسانک ہراکے تاریخء جہان نا بقا نا ضامن پارنیوں، داہم انسان ئسر، دافتے ہم است ئس، فرشتہ الوس، ہندا مشی آ ڈغار نا استار ئسر ہراکے انسانیت کن تینا بد قسمت آ راج اکن ڈکھ آتا باریم ءِ کاٹم آ ارفیر، قوم انا ناجوڑ و گند الوکا زند ءِ لکھ اس کریر۔

پکار دادے ہر انسان تینا ذات اٹ انسانیت کن اسے انسان اسے پٹے ہرا تینکے نہ ایلو تیکن زندہ سلے۔

کوئٹہ ایئرپورٹ نا مونا پی ٹی ایم نا پارہ غان دھرنا تننگو۔

پشتون تحفظ موومنٹ نا ذمہ وار پاکستان قومی اسمبلی نا باسک محسن داوڑ سیاسی دورہ اسیکن بلوچستان نا دارالحکومت کوئٹہ آ بننگ اس ولے کوئٹہ ایئرپورٹ آ اودے توننگانے۔

محسن داوڑ چاگردی احوال کاری نا سائٹ ٹوئٹر آ پارینے کہ ای کوئٹہ غا سرمسٹ ولے سیکیورٹی ایجنسیز آتا پارہ غان کنے توننگا و دا پاننگا کہ 90 دے اسکان بلوچستان ٹی اونا بننگ بند کننگانے۔

دی بلوچستان پوسٹ نا نمائندہ دا بابت کوئٹہ ئٹ پی ٹی ایم نا ذمہ وار اسیتون حوال کرے و اریفیتہ کہ محسن داوڑ نا کوئٹہ آ بننگ نا انت مسخت ءِ، او پارے کہ محسن داوڑ نا اولیکو پروگرام مسونے کہ بلوچ بیگواہ تا بابت وائس فار بلوچ مسنگ پرسنز نا وائس چیئرمین ماما قدیر تون اوڑدہی کننگ ءِ، و بلوچ، پشتون ویل نا زیہا میڈیا تون ہیت گپ کننگ ءِ۔

دا وختا محسن داوڑ ءِ کوئٹہ ایئرپورٹ آ توننگ نا برخلاف پشتون تحفظ موومنٹ نا پارہ غان کوئٹہ ایئرپورٹ آ دھرنا تسونو تولوک ءُ۔