تفتان بھلا روڈ آ شیخ واصل نا خڑک علاقہ ٹی ببری ریلوے پاٹک آ مال دروک ریل و ٹرالر نا نیامٹ شکست مسونے۔
رسینگوک حوال تا رد ئٹ ویل نن نا 3 بجہ نا خڑک مسونے، ویل اٹی مال دروک ریل نا انجن و بھاز آ بوگیک کلٹی مسر، و ویل ٹی ریل نا انجن ٹرالر نا زیا بسونے۔
دائسکان ریل ئنا شکست ٹی ہچ ءُ جانی نسخان متنے، مال بردار ریل تفتان آن بننگ ئس۔
حوال رسینگ تون تحصیلدار مستونگ و لیویز کوالخواک ہند آ سرمسر، و بھلا کرین نا کمک ئٹ ویل ئنا گواچی مروکا ریل نا بوگی تے ارفنگ کہ آپریشن برجاہ ءِ۔
بی ایم سی بحالی کن برانز کروک آتا مرگ اسکان ہڑتال نا پڑو۔
بی ایم سی بحالی تحریک نا پارہ غان کہی توہ آن برانزی مچی مننگے ولے ہر وار حکومت نا پارہ غان ہیت و گپ مریک برانزی مچیک ایسر کننگ مریرہ۔ ولے حکومت ہر وار تینا ہیت آتے سلپک، اندا سوب آن بی ایم بحالی تحریک نا پارہ غان برانزی مچیک بندات کننگ مریرہ۔
اندا ردئٹ اینو ام اسے برانزی مچی اس کننگا ولے حکومت و کوئٹہ انتظامیہ نا پارہ برانزی مچی کروکاتے لٹ کُٹ کریسہ بندی کننگ نا کوشست کننگا۔ ولے اوکان بیدس ام برانز کروکا خلقت گورنر و وزیر اعلیٰ نا اُرانا مونا توسر، اوفتا دا پاننگ اس تانکہ بی ایم سی نا ویل آک ایسر مفسہ نن تینا دا برانز ءِ ایسر کپنہ۔
کوئٹہ انتظامیہ تون ہیت و گپ آن پد بلوچستان حکومت تون اوڑدہی آ امنا کریر۔ گڑا بی ایم سی بحالی تحریک نا ذمہ وار آک صوبائی وزیر اسد بلوچ، عبدالرؤف رند و سردار نور احمد بنگلزئی تون اوڑدہی کننگ نا وختا اوفتا و حکومتی وفد نا نیام ٹی بھاز آ ہیت آتے امنا کننگ متو اندا سوب آن دا تحریک نا ذمہ وار آک تا مرگ اسکان ہڑتال نا پڑو کرینو۔
اوفتا پاننگے کہ ہمو وخت اسکان ننا ہیت آتے امنا کننگ مفک ننا حق و قانودی آ گرج آک پورو کننگ مفسہ ہمو وختسکان نن تامرگ ہڑتال آ تولینہ۔
بی ایم سی بحالی تحریک نا غٹ آن بھلا خواست دادے کہ بی ایم سی ایکٹ ٹی بدلی کننگ مرے۔ وائس چانسلر و رجسٹرار بی ایم سی ءِ بُھس کرینو اوفتے دا عہدہ غاتیان کشنگ مرے۔ اندن پین ہم اوفتا خواست آک اریر۔
بلوچستان نا علاقہ آواران ٹی گدرینگوک منہ دے مست پاکستانی فورسز نا کمکار گمان کروک شش بندغ ءِ دریسہ بیگواہ کننگا۔ دا بندغ آتے دزگیر کننگ نا ذمہ واری بلوچ سلاء بند تنظیم بی آر اے ارفے۔
دا بندغ آتے ارفنگ آن کننگ گڈ بندغی حق آتیکن توار ارفوک تنظیم وائس فار بلوچ مسنگ پرسنز، ہیومن رائٹس کونسل آف بلوچستان، ہیومن رائٹس کمیشن آف پاکستان پنی تنظیم آک پاریر کہ نن بلوچ سلاء بند تنظیم نا ذمہ وار آتیان خواست کینہ کہ او بندغی حق نا بنیات آ دافتے یلہ کیر۔
وائس فار بلوچ مسنگ پرسنز چاگردی احوالکاری نا سائٹ ٹوئٹر آ پارے کہ بلوچ سلاہ بند تنظیم آواران آن ہرا شش بندغ ءِ بیگواہ کرینے اوفتے انسانی ہمدردی نا بنیات آ یلہ کے۔
اندن ہیومن رائٹس کونسل آف بلوچستان ام چاگردی احوالکاری نا سائٹ آ پارے کہ نن بلوچ ریپبلکن آرمی آن خواست کینہ کہ او دا بندغ آتے، ہرافتے آواران آن ارفنگانے ہچو نسخان اس تف و اوفتے زوت یلہ کننگ مرے۔
ہیومن رائٹس کمیشن آف پاکستان ام پارینے کہ نن بی آر اے آن خواست کینہ او آواران آن ارفوک مزور کار آتے یلہ کے ۔ اوفتا شرف و بندغی حق آتا اصول آتا احترام کے۔ دا بندغ آتے ضمانت نا خاطر کن کاریم اٹ ہتپ۔
ایچ آر سی پی، بی آر اے سے مطالبہ کرتا ہے کہ وہ آواران میں زیر حراست مزدوروں کو رہا کرے۔ ان کے وقار اور انسانی حقوق کے وسیع تر اصولوں کا احترام کیا جائے اور انہیں ضمانت کے طور پر استعمال نہ کیا جائے۔#Awaran
— Human Rights Commission of Pakistan (@HRCP87) September 3, 2020
ایلو پارہ غان بلوچ سلاء بند تنظیم بی آر اے نا احوال کار بیبرگ بلوچ چاگردی احوالکاری نا ویب سائٹ آ دا بندغ آتے ارفنگ نا ذمہ واری ءِ ارفیسہ پارینے کہ پنجاب آن تعلق تخوکا پاکستانی فوج نا شش کمکار آتے بندی کننگانے ہرا ننا تنظیم تونو۔
او مونی پارینے کہ دافتا زند ئنا فیصلہ غٹ بندغی و قانودی اصول تا ردئٹ کننگ مریک۔ نن بندغی حق آتا تنظیم آتے دا پاننگ خوانہ کہ ننا جنگی قانود آک کوزہ گیر نا قانود آن جتاؤ۔
بلوچستان نا علاقہ ڈیرہ مراد جمالی ئٹ ایلم اس سم کاری کریسہ تینا جند ئنا اِرا ایلم ءِ کسفے و نرا۔
گیشتری حوال تا ردئٹ صدر تھانہ نا ہد حویل ئٹ گوٹھ حاجی محمد شریف ہجوانی ئٹ محمد پناہ پنی دوبہ دار پستول ئٹ سم کاری کریسہ تینا جند ئنا اِرا ءِ کسفے و علاقہ غان نرا۔
پولیس تدینی ہند آ سرمریسہ ہڑتوم آ بندغ تا جون تے دوئی کرے و پوسٹ مارٹم کن سول ہسپتال آ درے ہراڑے الّمی کاریم تیان گڈ جون تے خاہوت ءِ تا تننگا۔
صدر پولیس دوبہ دار نا دزگیر کن مُستی گام ارفنگے۔ تدینی نا سوب آک اُرائی چِک و تاڑ پاننگرہ۔
سعید نور براہوئی شاعری اٹ اسہ پوسکنو رنگ اس ہتنگ نا کوشست کننگ ءِ۔ او دا رد ئٹ بیدس “ٹِک” آ شاعری مون آ ہتنگ ءِ۔ سعید نور نا بیدس ٹِک آن منہ شاعری دا رنگ ئٹی ءُ:
لُڑا اے طُرّہ , او کاٹم ءِ دام امر مروئے !
او کُل ءِ گوہا ، کہ داسہ او رام امر مروئے !
گروک ءِ رومال و ہورا ءِ گُد ہٙموکا ہڑسار
دا مہر ولدا وا ڈہہہ اٹ عام سام امر مروئے
گڑاس اوکا، گڑاس داکہ حوال مسّٙک
مٙلوکے درگہ سلوکے وا گام ، امر مروئے !
دٙسّے کس ئس گُل، کٙسر کسر و گٙلِی گٙلِی ٹی
دعا و مہر اٹ دا سلسلہ عام، امر مروئے !
او ہٙڈ او سُو او، اِرٙٹ ولے او اٙسِٹ و روح او
کُلہٙو اسٹّی کہ داوڑو عام امر مروئے !
لِکّھِو امر ای لار ءِ
ہر ٹِک داسہ گار ءِ
او رحم امر کرو ءِ ؟
ٹوہک سُم اٹ او سار ءِ
دا لُٹّ اٹی وا ساڑی
سرکار و سڑدار ءِ
رُم اٹ ہموڑے سٙر مٙہ
در کار ہراڑے دار ءِ
ڈکّٙھہ ۔۔ کرے او حملہ
روح اٹ دا داسہ لار ءِ
لُمّہ وا لار اٹی ءِ
کہ مار گُم گار ءِ
سلوکا رادہ مرے ہراڑے
او ڈس داسہ ہرے ہراڑے
اسٹ اسٹ آ امہ ہرا وڑ
او گام گام ءٙ درے ہراڑے
کٙلٙک آسودہ ، حال ءِ دڈدی
دا وٙڑ کمال اُر، ہرے ہراڑے
دا مرگ ءِ مرگ ئس درو ے داکہ
دا گال ء کس ئس کرے ہراڑے ؟
سوال داوڑ کروءِ حال ئس
ہراڑے ئس او سرِے ہراڑے ؟
ہالو ہالو لاڈے لڈے ئس ہمسر ئس
مس گار کٙسک دا سر کرے حوال ءِ کس
۔
دڑد ءِ درو دڈد ئس ولے دڈد ہم مرو !
دم دٙر سلوکُٹ ای اگہ دا وٙڑ کہ مٙس
۔
کڑد اٹ اوڑدہ ءِ اسے معصوم ئس ہم
اِلّا ہمہ کل ء گلہ دار ءِ کس ئس
۔
ماڑی و وڈّی اودے لحد آ سر کرے
داسہ ہرے اوڑے مگہ کوکار ءِ وٙس
۔
اودے ہرے دا مال مڈّی آ گُمّٰر
دے ئس مرو ءِ اودے ہم لگو ءِ ڈٙس
ہٙکّٰل کرے سالار
مُڑ دار مس سردار
_
ڈٙکّوکا ہر دڑد اٹ
ساڑی ءِ او ہروار
_
دارُو مرے کہ دٙم !
او کُل اٹی درکار
_
ای اٙلّو اٹ سُد اٹ
لکھاٹ ءٙ اودے سار
_
روح ءِ ڈٙلہ او ڈُکھ ئس
گوہا کرے کُو کار
آسرہ ئس اٙک ہرا ڑا
مٙڑد او مُڑدہ ءِ داسا
۔
آئڑ اٹ ہم مور ءِ راگ اٹ
اودے دا وٙڑ مہر گُڈّا
۔
ساء وٙدم سمّو ! ای گوری
سار اٹی روح اوڑا لگّا
۔
ہرگڑا داڑے رُدِک اُر !
کُر ءُ ولّٰر کو وٙسم وا
۔
آلُم ءِ مودہ ٹی ہڑدے
گولٙوی کہ کور ءِ ولدا
گُٹّو مہر اٙک، سگ ہم دٙمدٙر
دڑد ءِ ڈٙکّٰہ، وا ہم گٙل کر
مُٹ اٹ ڈوک ءِ، دعویٰ سوگٙو
روح ءِ رعکس اٹ، ای اُٹ وا سُر
کاٹُم مُلک اٹ ،اے کے اسّور
داسہ او ہم مسّور ٹُکُر
ڈُکالی ءِ داڑے ہر کٙس
حوال ءِ دا اوڑا کر سٙر
لمہ لال اک مُلک اٹ *کورگُم
دڑد اک داڑے، اوڑے، ہردٙر
لاو ئس او دادے درگہ
کورے داسہ کاہک مُرمُر ؟
(کورگم ۔۔۔ لاپتہ)
سعید نور
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
سی اگست جہانی بیگواہی تا ایسری نا دے ئنا ردئٹ وائس فار بلوچ مسنگ پرسنز نا پارہ غان چیئرمین نصراللہ بلوچ نا کماشی ٹی کوئٹہ پریس کلب آ اسے مچی اس اڈ تننگا۔
دا مچی ٹی بیگواہ مروکا راشد حسین نا لمہ، بیگواہ جہانزیب بلوچ نا لمہ، بیگواہ امداد بلوچ نا ایلم، بی ایس او نا اسرار بلوچ، پی ٹی ایم نا زبیر شاہ آغا، ریڈ ورکر فرنٹ نا کریم پرھار، این ڈی پی نا شاہ زیب ایڈوکیٹ، بی این پی نا جاوید بلوچ، شاعر و ادیب پروفیسر ڈاکٹر منظور بلوچ، مہیم خان بلوچ، ڈاکٹر حئی بلوچ، ڈاکٹر حکیم لہڑی، وی بی ایم پی نا چیئرمین نصراللہ بلوچ و ایلوفک تینا خیال آتا درشانی کریر۔
بروکا مہمان آک تران کرسٹ پاریر کہ بلوچ نیشنلزم، بلوچ مزاحمت و بلوچ نا درد تکلیف ءِ مفاد پرست آک جتا وڑ تیٹی مون آ ہتنگ ءُ، اوٹی سرگڑدانی ودی کننگ ءُ۔ بلوچ مزاحمت ءِ رنگ برنگی نعرہ غاتیٹی بشخ کننگ ءُ۔ بلوچ نیشنلزم ءِ نسل پرست و جذباتی پاریسٹ ءُ ولے افسوز نا ہیت دادے کہ دا غٹ گڑاتیٹی بدر آتون اوار ننا تیناک ام اریر۔
اوفک پاریر دا وختا بلوچ، پشتون، سندھی و ایلو محکوم آ راج آتے اسے وڑ ظلم و بیدادی تون مون تننگو گڑا اینو وخت ئنا گرج آک اندادو کہ فیڈریشن ٹی اوار غٹ مظلوم و محکوم قوم آک اسٹ مریر اسٹ ایلو کن توار ارفر۔ اگہ پسنی ٹی ظلم اس مریک تو اونا درد ژوب، پشاور، حیدرآباد ٹی مارنگہ و توار ارفنگے۔
مونی پاریر کہ دا پروگرام نا مسخت دادے کہ جہانی زوراکی نا بیگوائی نا دے ئنا ردئٹ نن جہان آ تینا توار ءِ سر کین و جہان تون ایلو انسانی حق آتا تنظیم آتے دا باور کرفن کہ ریاست پاکستان ننا زیہا انت وڑئنا ظلم کننگ و ننا ایڑ، ایلم، لمہ باوہ غاک ہرا دڑد آتیان گدرینگسہ ءُ۔
بندغی حق آتا جہانی تنظیم ایمنسٹی انٹرنیشنل نا پننگ ءِ کہ ایران ئٹ تدوکا سال مروک حکومت نا برخلاف برانز کروک آتے فورسز کارندہ غاک تینا مون دزگیر کریر و اوفتیتون بھاز بیدادی کریر۔
ایمنسٹی انٹرنیشنل چار شمبے دو ستمبر آ اسہ رپورٹ اس شینک کرینے ہراٹی پاننگانے کہ تدوکا سال نومبر ئٹ حکومت نا برخلاف مروک برانز آتے توننگ کن ایرانی فورسز برانزی تا برخلاف طاغت ئتون مون تسر و اوفک بندغی حق آتے لتاڑار۔ تنظیم نا ردئٹ برانز کروک آتے دزگیر کننگ آن گڈ اوفتے ڈوہداری ءِ منیفنگ کن اوفتیتون بیدادی کننگا۔
ایمنسٹی انٹرنیشنل نا ردئٹ تہران ئٹ حکومت نا برخلاف برانز نا بناء تیل نا نرخ آتیٹ ودکی نا برخلاف مسوسس، ہرا اریسہ تیوی ملک ئٹ تالان مسر۔ اوفتے ایسر کننگ کن فورسز شابیت ءُ پڑ ئسے آ دزگیری کرے و زیات علاقہ آتیٹ انٹرنیٹ ءِ بند کننگا۔ ایرانی حکومت طاغت ءِ زیات کاریم اٹ ہتیسہ لس خلقت ءِ دزگیر کرے ہرا دائسکان جتا جیل آتیٹ بندی ءُ۔
ایمنسٹی نا پاننگ ءِ کہ دن انگا درزن آ تدینی تا پٹ و پول ءِ کرینے ہرافتیٹ دئے سال اسکان نا چُنک سن چناتے ہم دزگیر کننگا۔ تنظیم نا پاننگ ءِ کہ مخلوق نا شاہدی تیان “لس دزگیری، مخلوق نا زوراکی نا بیگواہی، بیم نا گواچی کننگ نا تدینیک و دن انگا ایلو بیدادیک بندغی حق آتا لتاڑنگ نا گوڑیفوک ءُ اسہ مرغنو لڑ اس مون آ بسونے۔”
تدوکا سال دسمبر ئٹ اقوام متحدہ تون تفوک بندغی حق آتا چاہندار آتا پاننگ ئس کہ ایران ئٹ برانز آتا وختا سد آ بندغ آتا کہنگ نا خلیس ارے۔ ایمنسٹی ہم تینا رپورٹ ئٹ سہہ سد آن زیات بندغ نا کہنگ ءِ پک کرینے۔ ولے ایران دا بیدادی تا ذمہ وار ہمو ٹولی تیا تخک ہرافتے اسرائیل، امریکا و سعودی عرب کون آ پیشن نا طاغت آتا مخ تفی دوئی ءِ۔
آن لائن لوز گنج آئی او ایس، و اینڈروڈ پروگرام تیٹی کاریم اٹ ہتنگ مریک۔
اپسالا یونیورسٹی سویڈ بلوچی ڈکسنری ءِ ساجد حسین نا یات گیری نا دروشم ئٹ مون آ ایسنے۔ جہانی پڑ آ اولیکو وار آن لائن بلوچی آن انگلش و انگلش آن بلوچی لوز گنج ءِ پلے اسٹور و آئی او ایس ئٹ دوئی کننگ مریک۔
دا آن لائن لوز گنج ئٹ شہید مروک صحافی و لسانیات نا چاہندار ساجد حسین ہم کاریم کرینے۔ اندا سوب دا لوز گنج اونا پن آ کننگانے۔
یاتی مرے اپسالا یونیورسٹی جہان نا اسٹ آ یورپی یونیورسٹی ءِ ہراڑے بلوچی خوانفنگک۔
نادر قمبرانی آن اکبر بارکزئی اسکان
نوشت: محبوب شاہ
دی بلوچستان پوسٹ
وخت و حالیت آک اسے جتاو سُر اسے ٹی رُم کیرہ، وخت و حالیت رُم کروکا وڑ آٹ بھاز گڑا بدل کننگ نا بود تخک۔ وخت چندی بدلی تا رہی آن گدرینگسا چنکا چنکا انسان تے بھاز بھلو بندغ وخت وخت اس بھلا بھلا انسان تے چونک کیک۔ ہراتم پلوے چنڈا ہراتم پالوءِ بدل کرے ہمو تم وخت و حالیت آتا وڑ اسیٹی پوسکنو گڑاس ودی کیک۔ ہندن انسان نا زند پوسکنا کسر تا گچین کاری نا وخت آ انسان ءِ بے وس کیک۔ وخت وختس وخت اسے دیو آمبارو چک اسے نا رنگ اٹ بندغء تینا چانپول اٹی ارفک، بے چرت بال کیک۔
اندن بندغ بے وس مریسہ اوڑتون اوار بال کننگءِ بنا کیک۔ دنیا نا مونا وخت انا شل انگا زیل آتا پنجہ سخت توروکا بندغء پاش وڑٹ گٹو کننگ آ خنک۔ ولے ہمو دڑد ہمو خل انسان ءِ سوگو و بے مٹ کننگ اٹ کمک ایتک۔ وخت قوم آتا تاریخءِ شیف بڑزا کننگ نا حالیت ودی کیک ولے زندہ انگا قوم آتیٹی بے مٹ آ راشونک قباہلی آ کماش آک ہمت و غیرت نا خواجہ غاک آک حالیت نا لوڑ و دنز اٹ جلونٹ کننگ نا مون اٹ لوڑ و دنز انا مونے ہڑسنگ کن بے مٹ ءُ فیصلہ کیرہ۔
دنیا ٹی اینو بھاز آ قوم آک حالیت و وخت انا بے رحم کاٹار نا مون آ سلنگ کپسہ نہ اوڑتون رُم کننگ کیرہ۔
ہندا وڑ اٹ کس اس تینا بولیء کس اس تینا قومء تو کس اس تینا باوہ پیرئی آ ڈغارءِ مش تیٹی کورنگے۔
ولے ننا مون اٹ ڈغار تون اوار تینا شناخت و نسل ءِ بچفنگ نا بنداوی ویل آک اسے نہار اس آخا بلکہ چندی نہار تا رنگ اٹ بابٹوک ویل آتون اوار سلوکءُ۔ ننا انت اس کہ ارے ننا افس ولے ننا وطن اٹ ہندنو سیاسی و قبائلی و ادبی ءُ کماش ارے ہرا تینا وطن تون لیلیٰ غامبار عشق کرینو، وطن نا رکھ و زیبائی کن تینا زندے ستی و ستی گرٹی رینگڑ آ پچ آتون و کشکوکا چوٹ آتیٹ گدریفینو، اونا عشق اٹ پاو نا چٹ ءِ ہم خن تیا تخانو۔
پیر انگا لمہ باوہ تینا مارآنا نکء دوکے لمہ نا گد اٹ تفوک تینا جغر نا ٹکرے بروے مننگ آ تینا خن تیٹ خنانو۔
وطن نا ہرا ہرا شہے مرید آتا گپء کیو ہرا ہرا منفی کڑد آتا مون آن پچء چکیو۔
ہندن جنگی آ داستان تیامبار عشقیہ داستان آتیٹی مدام اسے کڑد اسینا حوالہ تننگک ہراکے ہر وڑ اٹ عشق ءِ بے سہب و نامراد کننگ کن اسے منفیءُ سوچ اسے تون کل داستان نا ہر کنج اٹ ہر پاناد آ تل ودی کننگ کن روایات آکے پرغیسہ بج آن جہلو کیک۔
ھانی و شئے مرید نا داستان مرے یا شیریں فرہاد نا مہر آن پر انگا کسہ، بیبگر و گراناز مرغن آ سفر مرے، دوستین و شیرین نا انیین آ گپ آک مریر یا لیلی مجنوں نا ڈکھ آک۔
ہندن جنگی آ داستان تیامبار سردار خان محمد زرکزئی مرے یا بابو نوروز، نورا مینگل او علی دوست مریر یا اکبر او بالاچ، ادب نا پڑا نادر قمبرانی ایوارڈ ہلنگ آن نہ من مرے یا صباء دشتیاری ہلوکا ایوار آتے پدی ایتے۔
براہوئی و بلوچی ادب اٹ اسے نہ اسے رنگ اٹ دا سوچ انا تاریخی کڑدار آتے عشق و مہر انا مون اٹ جوان کننگ نا درس اٹ تدریس نا اسے گچین رنگ اس گروشک ایتک۔
بھاز جاگہ منفی سوچ ہندا گروشک تروکا رنگ ءِ بے چس کننگ کن ربڑ اٹ ڈکنگ نا کوشست کیک ۔ دا ننا تاریخ نا بشخ آ کو، ننا تاریخ نا پنہ غاتیا خنورے جاگہ اس میر چاکر رند سازش آتا دام گوفک تو جاگہ اس اسے بلہ اس لٹ بند کریسہ مش انا ٹول آ سرمننگ تون او شیرین فرہاد نا اُست آتا نیام اٹ کاٹار اس غت ایتک۔ ہراتم کنے عش انا دا داستان تینا فکر کننگ نا کمک دو بریک تو ای اندا نتیجہ غا سر مریوہ کہ اگہ میر چاکر نا سازش متوکہ تو ھانی و شئے مرید نا داستان ہمر پنی مسکہ۔
اگر نوروز خان نا طوفک خاخر دتوکہ تو خان محمد زرکزہیء دیر نازیفیکہ، اگر پیرانگا نوروز خانء قران نا پن اٹ شیف کتوسہ تو نوروز خان اینو ہم خونیس پاننگاکہ، پارلیمانی قوم پرست آتا ڈیوا نیم شف آ بے تیل آن دم تسکہ،
اگر دشمن نا سازش اٹ خان محمد کلپر سلال اکبر بگٹیء خلتوکہ تو اکبر خانء دیر آجوہی نا کسر آ شاغاکہ، فرنگی تا لشکر کشی متوکہ تو شیرین فرہادءِ دیر چائسکہ، منتھرا متوکہ تو رامائنء دیر حوال کریکہ، اگر عیدو متوکہ تو سرحدی چھاپہ مار آتا داستان آکے دیر نوشت اٹ ایسکہ۔
مننگ کیک ہندا تاریخ نا راستگی ءِ ہندا منفی کڑدار آتا مون انگا مون متوکہ تو دا جہانی آ بے مٹ آ رنگ آک جہان نا مون آ تالان متوسہ۔
اینو راج اٹ اخس کے قومی مذہبی عشقیہ کڑدار آتا کڑد ٹِل آ پھلءِ ہندا منفی کڑد والا خواجہ غاتا منفی سوچ آنا سوب آن ءِ اگہ ہر پارہ غا مننگ مننگ نا توار مسکہ تو فلسفہءِ نہ من مننگ نا انت مسکہ، اینو ننا موضوع بے مقصد و بے وجہ اف، ساقی گڑاس تو ارے ہرا پڑدہ ٹی بے پڑدہ سرنگے، خوامخواہ ہر اسٹ بے وفا، بے مروت، بے شرم و بےحیا مفک۔ ایہن ہم قصور دھوکہ تروکا نا اف بلکن اعتبار کروکا ناءِ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچستان نیشنل پارٹی نا سرکماش سردار اختر مینگل راجی حوالکاری تا سائٹ ٹوئٹر آ بیگواہ مروکا ورنا سمیع بلوچ نا لمہ نا کلہو نا ردئٹ ٹوئٹ اس کریسہ پارے کہ اگہ دا ملک اٹ انصاف مروس گڑا نن دا دے تے خنتونا۔
او مونی پارے کہ دا ملک ئنا حاکم آتے تینا جند ئنا عدالت آتیا باور اف۔ انتیکہ حاکم آک ننتون دا رویہ اٹ مون تننگو، دا غٹ تاریخ ٹی نوشتہ مرور۔
یاتی مرے اِرا سال مست 31 اگست 2018 آ نوشکی ٹی سیل و سوات نا جاگہ زنگی ناوڑ آن پاکستانی فورسز 10 ورنا ءِ بیگواہ کرے ہرا دائسکان بیگواہ ءُ۔ دا ورنا تیٹی سمیع بلوچ، عبدالرب، بلال احمد، عبدالرشید، محمد آصف تون اوار ایلوک ئسر۔
اندن ہمو دے آ فورسز کارندہ غاک اسے ورنا نظام باوہ نا پن پیر محمد ساسولی ءِ سم کاری کریسہ کسفیر۔
